އަނދުން ހުސައިން: މި ސަރުކާރުން 213 ތަރައްޤީގެ މަޝްރޫއު ފަށައި ދެފުށް ފެންނަ ޑިމޮކްރަސީއެއް ޤާއިމުކޮށްދިން!

މި ސަރުކާރަށް 2 އަހަރު ވެގެން ދިޔައިރު ތަރައްޤީގެ މަޝްރޫއުތައް ފެށުމުގެ އިތުރުން، ދެފުށް ފެންނަ ޑިމޮކްރަސީއެއް ޤާއިމުކޮށްދީފައިވާ ކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ވިދާޅުވެއްޖެއެވެ.

އަންގާރަ ދުވަހު މެމްބަރު ޝަހީމް ކުރެއްވި ޓްވީޓެއްގައި ވިދާޅުވީ، މި ސަރުކާރުން 213 ތަރައްޤީގެ މަޝްރޫއެއް ފައްޓާފައިވާ ކަމަށާއި، އޭގެ އިތުރުން، ލާމަރުކަޒީ ނިޒާމު ޔަޤީން ކޮށްދީފައިވާ ކަމަށެވެ. އަދި އެއާއެކު، ދެފުށް ފެންނަ ޑިމޮކްރަސީއެއް ޤާއިމު ކޮށްދީފައިވާކަން ވެސް މެމްބަރު ޝަހީމްގެ ޓްވީޓުގައި ފާހަގަ ކުރެއްވިއެވެ.

މެމްބަރު ޝަހީމް ވަނީ ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙުގެ ސަރުކާރުގެ ފުރަތަމަ 2 އަހަރަކީ ކާމިޔާބު 2 އަހަރުކަން ފާހަގަ ކުރައްވައި ރައީސް ސޯލިޙަށް މަރުޙަބާ ދަންނަވާފައެވެ.

ރައީސް ސޯލިޙު ރައީސް ކަމުގެ ހުވާ ކުރެއްވީ 2018 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ. އެގޮތުން ސަރުކާރަށް 2 އަހަރު ފުރިފައިވާއިރު، ޖުމްލަ ގޮތެއްގައި ރައީސް ސޯލިޙުގެ މެނިފެސްޓޯ ތަންފީޒު ކުރުމުގައި ކުރެވިފައިވާ މަސައްކަތްތައް ގިނަ ބަޔަކު ފާހަގަ ކުރެއެވެ. ޚާއްސަ ގޮތެއްގައި ކޮވިޑުގެ މި ޙާލަތުގައިވެސް ސަރުކާރުން ގެންދަނީ ރައްޔިތުންނަށް ވެފައިވާ ވައުދުތައް ފުއްދަވައިދެއްވަމުންނެވެ.