އެއަރޕޯޓް ކާގޯއިން ކޮވިޑަށް ޕޮޒިޓިވްވި މީހުންގެ އަދަދު 32 އަށް އަރައިފި
އެއަރޕޯޓް ކާގޯއިން އެންމެ ފުރަތަމަ ޕޮޒިޓިވް ކޭސްއެއް ފެނިފައިވަނީ މިމަހުގެ 5 ވަނަ ދުވަހު
ވެލާނާ އިންޓަރނޭޝަނަލް އެއަރޕޯޓް
ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ކާގޯ ޑިޕާޓްމަންޓުން ޕޮޒިޓިވްވި މުވައްޒަފުންގެ އަދަދު 32 އަށް އަރައިފިއެވެ.
ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ހާމަކޮށްފައިވާ ގޮތުގައި ވެލާނާ އިންޓަރނޭޝަނަލް އެއަރޕޯޓުގެ ކާގޯ ޑިޕާޓްމެންޓުން ހޯމަ ދުވަހު އިތުރު 10 ޕޮޒިޓިވް ކޭސް ފެނިފައިވެއެވެ.
އެއަރޕޯޓް ކާގޯއިން އެތަނުގެ މުވައްޒަފކު އެންމެ ފުރަތަމަ ކޮވިޑް-19 އަށް ޕޮޒިޓިވްވެފައިވަނީ މި މަހުގެ 5 ވަނަ ދުވަހުއެވެ. އޭރު މި ކްލާސްޓާއިން 12 މީހަކު ޕޮޒިޓިވްވެ، އިތުރު ބަޔަކު ވެސް އޭގެފަހުން ޕޮޒިޓިވްވެފައިވެއެވެ.
ރާއްޖޭގައި ކޮވިޑް ހާލަތު ރަނގަޅުވަމުން އައިސް، އަދި އަޅާފައިވާ ބައެއް ފިޔަވަޅުތަކަށް ލުއިތައް ދެމުންދިޔައެވެ. އެގޮތުން، ފާއިތުވި ދެ މަސްދުވަހަށް ފަހު، ކޮވިޑް-19 އަށް ޕޮޒިޓިވް ކޭސްތަކުގެ އަދަދު މިވަނީ 100 އަށް ވުރެ މައްޗަށް އަރާފައެވެ.
މިހާރު ޕޮޒިޓިވްވާ ކޭސްތައް އިތުރުވި ނަމަވެސް، ގިނައީ ދެނެގަނެވިފައިވާ ކްލަސްޓަރތަކާ ގުޅުންހުރި ކޭސްތަކެވެ. އެގޮތުން އެއަރޕޯޓުގައި މަސައްކަތްކުރާ ޗައިނާ ދެ ކުންފުންޏެއްގެ މުވައްޒަފުންނާ ގުޅުންހުރި ކްލަސްޓަރއެއް ވެސް ވަނީ ދެނެގަނެވިފައެވެ. މި ކްލަސްޓަރތަކުން މިހާތަނަށް 90 މީހަކު ވަނީ ކޮވިޑަށް ޕޮޒިޓިވްވެފައެވެ.
މީގެ އިތުރުން ރިސޯޓެއްގެ ގޮތުގައި ތަރައްގީ ކުރަމުންދާ ރަށްފަޅުހުރާއިން ހޯމަ ދުވަހު ވަނީ 21 މީހަކު ޕޮޒިޓިވްވެފައެވެ. އަދި އާދިއްތަ ދުވަހު އެ ރަށުން 26 މީހަކު ޕޮޒިޓިވްވިއެވެ. މިއާއެކު އެ ރަށުން ޕޮޒިޓިވްވި މީހުންގެ އަދަދު ވަނީ 47 އަށް އަރާފައެވެ.
