މިއަދު މި އަންގައިދިނީ ރާއްޖެއިން އިސްލާމް ދީން ފޮހެ ނުލެވޭނެ ކަން: ޝާހިދު
ކަޅުވަކަރު މިސްކިތް އަލުން ހުޅުވީ އަންގާރަ ދުވަހު
ކަޅުވަކަރު މިސްކިތް
ކަޅުވަކަރު މިސްކިތް އަލުން ރާވާ ހުޅުވުމަކީ މި ބިމުން އިސްލާމް ދީން ފޮހެ ނުލެވޭނެ ކަމުގެ ވަރުގަދަ މެސެޖެއް ކަމަށް މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު ވިދާޅުވެއްޖެއެވެ.
ރާއްޖެ އިސްލާމްވި ދުވަހާއި ދިމާކޮށް ކަޅުވަކަރު މިސްކިތް ހުޅުވުމާއި ގުޅިގެން މިނިސްޓަރ ޝާހިދު ކުރެއްވި ޓްވީޓެއްގައި ވިދާޅުވީ އައިސް ސްކޭޓިން ރިންކެއް ހަދަން ރައީސް ޔާމީން ނަންގަވާ އެއްލާލެއްވި އާސާރީ ކަޅުވަކަރު މިސްކިތް މާލޭ ބޮޑުގަނޑުވަރު ގޯތިތެރޭ އަލުން ބަހައްޓަވައި ދެއްވުމީ ރާއްޖެ އިސްލާމްވި ދުވަހު ރައީސް އިބްރާހިމް މުހައްމަދު ޞާލިޙް ދެއްވި އަގުހުރި ހަދިޔާއެއް ކަމަށެވެ.
ސަލްޓަން ޕާކުގައި ހުރި ކަޅުވަކަރު މިސްކިތް ނަގާފައި ވަނީ، ރައީސް ޔާމީންގެ ސަރުކާރުގައި 2016 ވަނަ އަހަރުގެ ތެރޭގައެވެ. އެ މިސްކިތް ނެގުމަށް ފަހު ރައީސް ޔާމީންގެ ސަރުކާރުން ވަނީ އެތަނުގައި ވިންޓަރ ޕާކެއް އަޅާފައެވެ. އޭރު މިސްކިތް ނެގުމަށް ފަހު ތިނަދޫގައި ހުންނަ ކަލްޗަރަލް ޕާކު ސަރަހައްދަށް ބަދަލުކުރާނެ ކަމަށް ބުނި ނަމަވެސް، ކުރީ ސަރުކާރުން އެ މަސައްކަތް ކޮށްފައެއް ނުވެއެވެ.
ކަޅުވަކަރު މިސްކިތަކީ ރާއްޖޭގައި ހުރި ހިރިގަލު މިސްކިތްތަކުގެ ތެރެއިން އެންމެ ދުވަސްވީ އެއް މިސްކިތެވެ. އަދި މި މިސްކިތަކީ އާސާރީ ތަރިކައަކަށް ވާއިރު، އަންނަން އޮތް ޖީލުތަކަށް މިސްކިތް ރައްކާތެރިކުރުމަކީ އަމާޒެއް ކަމަށް ހެރިޓޭޖް މިނިސްޓްރީން ވަނީ ބުނެފައެވެ.
