ޔުނިސެފުން ރާއްޖެއަށް ޓެސްޓް ކިޓާއި ލެޕްޓޮޕް ހަދިޔާކޮށްފި
17 ނޮވެމްބަރު 2020 | އަންގާރަ 08:00ޖުމްލަ 1.7 މިލިއަން ރުފިޔާގެ ތަކެތި ޔުނިސެފުން ހަދިޔާކުރި
ޔުނިސެފުން ހޯމަ ދުވަހު ރާއްޖެއަށް ހަދިޔާކުރި ތަކެތި ހަދިޔާކުރަނީ
ޔުނިސެފުން ރާއްޖެއަށް ކޮވިޑް-19 އަށް ޓެސްޓް ކުރުމަށް ބޭނުންކުރާ ޓެސްޓް ކިޓް އަދި ލެޕްޓޮޕް ހަދިޔާކޮށްފިއެވެ.
ޔުނިސެފުން ހޯމަ ދުވަހު ރާއްޖެ ހަދިޔާކޮށްފައި ވަނީ 5،000 ޕީސީއާރު ޓެސްޓް ކިޓް އަދި 46 ލެޕްޓޮޕްއެވެ. މި އެހީއާ ގުޅިގެން ޔުނިސެފުން ބުނެފައި ވާގޮތުގައި، ހަދިޔާކުރި ލެޕްޓޮޕްތަކަކީ ހެލްތު އިމަޖެންސީ އޮޕަރޭޝަން ސެންޓަރުގެެ މަސައްކަތް ހަރުދަނާ ކުރުމަށް ގޮތުން ހަދިޔާކުރި ލެޕްޓޮޕްތަކެކެވެ.
ޓެސްޓް ކިޓާއި ލެޕްޓޮޕްތަކުގެ ޖުމްލަ އަގު 1.7 މިލިއަން ރުފިޔާއަށް އަރާ ކަމަށް ޔުނިސެފުން ބުނެއެވެ. އަދި ރާއްޖެއިން ކޮވިޑް-19 އާ ދެކޮޅަށް ކުރާ މަސައްކަތަށް މިހާތަނަށް 17 މިލިއަން ރުފިޔާގެ އެހީތެރިކަން ފޯރުކޮށްދީފައިވާ ކަމަށް ވެސް ޔުނިސެފުން ހާމަކުރެއެވެ. މީގެ އިތުރުން ކުރިއަށް އޮތް ދުވަސްތަކުގައި އިތުރު އެހީތައް ވެސް ރާއްޖެއަށް ފޯރުކޮށްދޭނެ ކަމަށް ޔުނިސެފުން ބުނެއެވެ.
ރާއްޖެއިން މިހާތަނަށް 12،000 އަށް ވުރެ ގިނަ މީހުންނަށް ކޮވިޑް ޖެހިފައިވާއިރު، އެކްޓިވް ކޭސްތަކުގެ އަދަދު 947 މީހުންނަށް ވަނީ އިތުރުވެފައެވެ. މީގެ ތެރެއިން ހޮސްޕިޓަލުގައި ފަރުވާދެމުން ދަނީ 59 މީހަކަށެވެ. މި ބަލީގައި ރާއްޖެއިން މިހާތަނަށް 45 މީހަކު މަރުވެފައިވާއިރު، މި މަހުގެ މިހާތަނަށް ހަތް މީހަކު ވަނީ މަރުވެފައެވެ.
