ރާއްޖެ މިނިވަން ޤައުމެެއްގެ ގޮތުގައި ދެމިއޮތުމުގެ މަސްދަރަކީ އިސްލާމްދީން: ރައީސް
ރާއްޖެ އިސްލާމްވި ދުވަހުގެ ތަހުނިޔާ އަރިސް ކުރެއްވި
ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު- ރައީސް ވަނީ ދުވަހުގެ ތަހުނިޔާ އަރިސް ކުރައްވާފައި
ރާއްޖެ މިނިވަން ޤައުމެެއްގެ ގޮތުގައި ދެމިއޮތުމުގެ މަސްދަރަކީ އިސްލާމްދީން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ވިދާޅުވެއްޖެއެވެ.
ރާއްޖެ އިސްލާމްވި ދުވަހުގެ ތަހުނިޔާ އަރިސް ކުރައްވައި ރައީސް ސޯލިޙު ކުރެއްވި ޓްވީޓެއްގައި ވަނީ ދިވެހިރާއްޖެ އިސްލާމްވި ދުވަހުގެ ތަހުނިޔާ އާއި އިޚްލާޞްތެރި ހެޔޮ އެދުން ރައްޔިތުނަށް އަރިސް ކުރައްވާފައެވެ.
ރައީސް ވިދާޅުވީ، މި ރާއްޖެ މިނިވަން ޤައުމެެއްގެ ގޮތުގައި ދެމިއޮތުމުގެ މަސްދަރަކީ އިސްލާމްދީން ކަމަށެވެ. އަދި މާތް ﷲ އިސްލާމްދީނުގެ ނޫރު އަބަދުވެސް ދިވެހި ފަސްގަނޑުގައި ދެމެހެއްޓެވުން އެދި ދުއާ ކުރައްވާ ކަމަށް ރައީސް ވިދާޅުވިއެވެ.
އިސްލާމްދީނުގެ ހިދާޔަތު ދިވެހިންނަށް ލިބުނީ ހިޖުރައިން 548 ވަނަ އަހަރުގެ ރަބީޢުލްއާޚިރު މަހުގެ 2 ވަނަ ދުވަހުއެވެ. އެއީ މީލާދީން 1153 ވަނައަހަރެވެ. އަދި ދިވެހިރާއްޖެއަށް އިސްލާމްދީން އައުމާއިއެކު ކުރިން އަޅުކަން ކުރަމުން އައި ބުދުދީނުގެ މޮނާސްޓްރީތައް ފަސްއަޅާ ފޮރުވާލުމަށްފަހު، އިސްލާމްދީނުގެ މިސްކިތްތައް ބިނާކުރެވުނެވެ.
