މަސައްކަތް ކުރެވޭނެ މާހައުލެއް ނެތް ކަމަށް ބުނެ ފުވައްމުލަކު މެޖިސްޓްރޭޓަކު އިސްތިއުފާދީފި
16 ނޮވެމްބަރު 2020 | ހޯމަ 17:23ސަސްޕެންޑް ކުރުމަށް ފަހު ސަސްޕެންޝަން ވަނީ އުވާލާފައި
މަގާމުން އިސްތިއުފާ ދެއްވި ފުވައްމުލަކު މެޖިސްޓްރޭޓް މުލްހާ އަލީ
ކޯޓުގައި މަސައްކަތްކުރާނެ މާހައުލެއް ނެތުމުގެ އިތުރުން ޒާތީ ގޮތުން ފިއްތުންތައް ކުރިމަތިވާ ކަމަށް ބުނެ ޏ. ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް މުލްހާ އަލީ މަގާމުން އިސްތިއުފާ ދެއްވައިފި އެވެ.
މުލްހާ މަގާމުން އިސްތިއުފާ ދެއްވާފައިވަނީ ޖުޑީޝަލް ސާވީސް ކޮމިޝަން (ޖޭއެސްސީ) އިން ބަލަމުންދާ މައްސަލައަކާއި ގުޅިގެން ސަސްޕެންޑް ކުރުމަށް ފަހު ސަސްޕެންޝަންގެ މުއްދަތު ހަމަވެގެން އޮފީހަށް ނިކުންނަން ފެށިތަނާއެވެ. މައުލޫމާތު ލިބިފައިވާ ގޮތުން މުލްހާ އިސްތިއުފާ ދެއްވާފައިވަނީ ހޯމަ ދުވަހު އެވެ.
މެޖިސްޓްރޭޓް ކަމުގެ މަގާމުން މުލްހާ ސަސްޕެންޑްކުރީ ޖުލައި މަހުގެ ހަވަނަ ދުވަހުއެވެ. ޖޭއެސްސީން ދިޔައީ މުލްހާގެ ގިނަ މައްސަލަތަކެއް ބަލަމުންނެވެ. އޭގެ ތެރޭގައި ފުލުހުން ހިންގި ތަހުގީގަކަށް ހުރަސް އަޅައި ހެކި ނައްތާލުމަށް ތުހުމަތު ކުރެވޭ މައްސަލަވެސް ހިމެނެ އެވެ.
ސަސްޕެންޝަން އުވާލިޔަސް އޮފީހުގައި މަސައްކަތް ކުރެވޭނެ މާހައުލެއް ނެތުމުގެ އިތުރުން ޒާތީ ގޮތުން ފިއްތުންތައް ކުރިމަތިވާތީވެ މުލްހާ އިސްތިއުފާ ދެއްވާފައިވާކަން ''ރާއްޖެ.އެމްވީ'' އަށް ވަނީ ކަށަވަރު ކޮށްދީފައެވެ. މީގެ ކުރިން އެޓާނީ ޖެނެރަލްގެ އޮފީހުގައިވެސް މަސައްކަތް ކުރައްވާފައިވާ މުލްހާ، މެޖިސްޓްރޭޓް ކަމުގެ މަގާމަށް އައްޔަން ކުރައްވާފައިވަނީ 2018 ވަނަ އަހަރުގެ އޮކްޓޫބަރު މަހުގެ 28 ވަނަ ދުވަހު އެވެ.
