2021 ވަނަ އަހަރަށް ލަފާ ކުރާ ދައުލަތުގެ ބަޖެޓުގައި ހިމަނާފައިވާ ބޮޑެތި މަޝްރޫއުތަކަށް ބޭނުންވާ ފައިސާ ހަމަޖެހިފައިވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓަށް ބަހުސް ކުރައްވަމުން ބައެއް މެމްބަރުން ވަނީ ބޮޑެތި މަޝްރޫއުތަކުގެ މަސައްކަތްތައް އިގްތިސާދު ހަމައަކަށް އެޅެންދެން މަޑުޖައްސާލުމަށް ގޮވާލައްވާފައެވެ. މިކަމާއި ގުޅިގެން މަޖިލިހުގައި ހުންނަވާ ވާހަކަ ދައްކަވަމުން މިނިސްޓަރ ވިދާޅުވީ މި ބަޖެޓު ރަނގަޅަށް ބަލާލުމުން، ހިމަނާފައިވާ ބޮޑެތި މަޝްރޫއުތަކަށް ފައިސާ ހަމަޖެހިފައިވާނެ ކަން ސާފުވާނެ ކަމަށެވެ.
އެގޮތުން މިނިސްޓަރ ވަނީ މާލޭގެ ކޮމަރޝަލް ޕޯޓު ގުޅީފަޅަށް ބަދަލުކުރުމުގެ މަޝްރޫއު އާއި 34 ރަށެއްގެ ފެނާއި ނަރުދަމާގެ މަޝްރޫއު ބޭނުންވާ ފިނޭންސް އިންޑިއާއިން ރާއްޖެއަށް ފޯރުކޮށްދީފައިވާ އެހީ އާއި ލޯން ފެސިލިޓީތަކުން ހަމަޖެހިފައިވާ ކަން ފާހަގަކުރެއްވިއެވެ. އަދި މި ސަރުކާރުން ނަގާފައިވާ ލޯނުތަކަކީ ކުރީ ސަރުކާރުތަކުން ނެގި ލޯނުތަކާއި އަޅާބަލާއިރު އިންޓްރެސްޓު ކުޑަ ލޯނުތަކެއް ކަން މިނިސްޓަރ ވަނީ ތަކުރާރުކޮށް ފާހަގަކުރައްވާފައެވެ.
އެކަމު އަސްލު ހަގީގަތުގައި ރަނގަޅަށް ބަޖެޓު ބައްލަވާލެއްވުމުން އިއްޒައްތެރި މެމްބަރުންނަށް ފާހަގަވާނެ އަޅުގަނޑުމެން މާލޭ ކޮމަރޝަލް ޕޯޓު ބަދަލުކުރުމަށް މިހާރުވެސް ފަންޑިން ހަމަޖެހިފަ. އިންޑިއަން އެގްޒިމް ބޭންކުން އަޅުގަނޑުމެންނަށް ލައިން އޮފް ކްރެޑިޓް ފެސިލީޓީން ފަންޑިންގް ހަމަޖެހިފައި ދިގު މުއްދަތުން، ކުރީގެ ސަރުކާރުތަކުން ނުނަގާ ވަރަށް ވުރެ އިންޓްރެސްޓު މާ ކުޑަކޮށް އަޅުގަނޑުމެން ނަގާފައި ހުރި ލޯނުތައް، ގާތްގަނޑަކަށް 100 މިލިއަން ޑޮލަރުގެ ހިލޭ އެހީއާއި އެކު ކުރަން ފަށާ މަސައްކަތްތަކެއް. 34 ރަށެއްގެ ފެނާއި ނަރުދަމާ އެއީ ގާތްގަނޑަކަށް 169 ރަށުގެ 1.2 ބިލިއަން ރުފިޔާގެ ޕްރޮޖެކްޓްސް. އެހެންމަ މި މަސައްކަތަކީ އޯލްރެޑީ ފަންޑެޑް، އަޅުގަނޑުމެންނަށް ލިބިފަ ހުރި ފައިސާއިން އަޅުގަނޑުމެން ކުރަން ޖެހޭ ކަންކަން.ފިނޭންސް މިނިސްޓަރ އިބްރާހިމް އަމީރު
މީގެ އިތުރުން މިނިސްޓަރ އަމީރު ވިދާޅުވީ މިހާރު ކުރަން ޖެހޭ މަސައްކަތަކީ ރާއްޖޭގެ އިގްތިސާދީ ހަރަކާތްތައް ހިންގަން ފެށުން ކަމަށާއި އެ މަސައްކަތްތަކަށް ލިބިފައިވާ ފައިސާއިން އެކަންކަން ކުރައްވާނެ ކަމަށެވެ. އަދި މީގެ ނަތީޖާއަކަށް ވެގެން ދާނީ ރާއްޖޭގެ އިގްތިސާދު އިތުރަށް ފުޅާ ވެގެން ދިއުން ކަމަށް އޭނާ ވިދާޅުވިއެވެ.
މަޝްރޫއުތަކަށް ފަންޑު ހޯދުމަށް ސަލާން ޖަހަން ޖެހިފައިވާ ކަމަށް މެމްބަރުން ދައްކަވާ ވާހަކަތަކަށް ރައްދުދެއްވާ މިނިސްޓަރ ވިދާޅުވީ ވެސް ބަޖެޓު ހިންގުމަށާއި އަދި ވިޔަފާރިތައް ހިންގުމަށް ލޯނު އަދި ގްރާންޓު ހޯދުމަކީ އެހެން ގައުމުތަކުގައި ވެސް އާއްމު ކަމެއް ކަމަށެވެ. އަދި އެއީ އަބަދުވެސް ކުރާނެ ކަމެއް ކަމަށެވެ.
އަންނަ އަހަރު ޕީއެސްއައިޕީއަށް ހުށައަޅާފައިވާ އަދަދަކީ 8306.2 މިލިއަން ރުފިޔާއެވެ. މިއީ މި ހިނގާ 2020 ވަނަ އަހަރާ އަޅާބާލާއިރު 49.3 އިންސައްތަ އިތުުރު އަދަދެއް ކަމަށް ފިނޭންސް މިނިސްޓްރީން ވަނީ ބުނެފައެވެ. އެ މިނިސްޓްރީން ބުނީ ކޮވިޑާއި ގުޅިގެން މި އަހަރުގެ ބަޖެޓު މުރާޖާ ކުރިއިރު ޕީއެސްއައިޕީގެ ތެރެއިން މަޑުޖައްސާލެވުނު މަޝްރޫއުތަކަށް ވެސް އަންނަ އަހަރުގެ ބަޖެޓުން ޖާގަދީފައި ވާނެ ކަމަށެވެ.
އަންނަ އަހަރަށް ހުށައަޅާފައިވާ ޕީއެސްއައިޕީގެ ތެރޭގައި ދައުލަތުގެ އާއްމު ބަޖެޓުން 3258.3 މިލިއަން ރުފިޔާ ހަރަދުކުރާނެ ކަމަށް ވަނީ އަންދާޒާކޮށްފައެވެ. އަދި ލޯނުތަކުން 3890.4 މިލިއަން ރުފިޔާއާއި ބޭރުގެ ހިލޭ އެހީއިން 561.5 މިލިއަން ރުފިޔާގެ އިތުރުން ޓްރަސްޓު ފަންޑުން 596.2 ހަރަދު ކުރުމަށް ވަނީ ހަމަޖެހިފައެވެ.
ނަމަވެސް އޮޑިޓަރ ޖެނެރަލް އޮފީހާއި މޯލްޑިވްސް މަނިޓަރީ އޮތޯރިޓީން ވަނީ ބަޖެޓުގައި ހިމެނިފައިވާ ބައެއް ކަންކަމާއިމެދު، ހާއްސަކޮށް ބައެއް މަޝްރޫއުތަކަށް ފިނޭންސް ކުރުމުގައި ހުރި ދަތިތަކުގެ ކަންބޮޑުވުން ވަނީ ފާޅުކޮށްފައެވެ.
