ގަދަކަމުން ބާސެލޯނާގައި އެ ޓީމުގެ ކެޕްޓަން ލިއޮނެލް މެސީ މަޑުކުރުވުމަކީ ހައްލެއް ނޫން ކަމަށް ބާސެލޯނާއަށް ކުރި ކުޅުނު ޕޯޗުގަލުގެ ލެޖެންޑް ލުއިސް ފީގޯ ބުނެފިއެވެ.

މި ނިމުނު ޓްރާންސްފާ ބާޒާރުގައި މެސީ ވަނީ ބާސާ ދޫކޮށްލަން ނިންމައި، އެކަން އެ ކުލަބުގެ މެނޭޖުމަންޓަށް އަންގާފައެވެ. ބާސާއާއެކު މެސީ ހަދާފައިވާ އެއްބަސްވުން އަންނަ އަހަރުގެ ހޫނު މޫސުމުގައި ހަމަވަން އޮތްއިރު، މިހާރު އޮތް އެއްބަސްވުމުގައިވާ ގޮތުން މެސީ ގެންދަން ބޭނުންވާ ކުލަބަކުން، އެއްބަސްވުން އުވާލަން 700 މިލިޔަން ޔޫރޯ ދައްކަން ޖެހެއެވެ. އެހެންކަމުން މެސީ ވަނީ އެއްބަސްވުން ބަދަލުކޮށް، ހިލޭ އެ ކުލަބު ދޫކޮށް ދިޔުމުގެ ފުރުސަތު ތަނަވަސްކޮށްދިނުމަށް އެދެފައެވެ.

އެކަމަކު މެސީގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެއްބަސްނުވުމާ ގުޅިގެން، މެސީ ވަނީ އޭނާގެ ނިންމުން ބަދަލުކޮށް މި ސީޒަނުގައި ބާސާގައި މަޑުކޮށްފައެވެ.

ސްޕެއިނުގެ ނޫހަކަށް ދިން އިންޓަވިއުއެއްގައި ފީގޯ ބުނީ މެސީ ފަދަ ކުޅުންތެރިއަކު ބާސާ ދޫކޮށްލަން ނިންމަންޖެހޭ ސަބަބުތަކެއް ހުންނާނެ ކަމަށާއި، ބާސާ ދޫކޮށްލަން މެސީ ބޭނުންވިއިރު، ގަދަކަމުން ކުލަބުގައި މެސީ މަޑުކުރުވުމަކީ ހައްލެއް ނޫން ކަމަށެވެ. އެކަމުން ކުޅުންތެރިޔާއަށާއި ކުލަބަށްވެސް ގެއްލުން ލިބޭނެ ކަމަށް ފީގޯ ބުންޏެވެ.

ފީގޯ އިތުރަށް ބުނީކޮންމެ ކްލަބަކުންވެސް މެސީ ފަދަ ކުޅުންތެރިއެއް ބޭނުންވާނެ ކަމަށާއި، އެހެން ނަމަވެސް މެސީ ގެންދެވޭނެ ފެންވަރު ނެތި އެކަން ކުރަން އުޅުމަކީ ރަނގަޅު ކަމަކަށް ނުވާނެ ކަމަށެވެ. އެގޮތުން މެސީ ހޯދަން އުޅޭ ކުލަބަކުން މެސީ ފަދަ ކުޅުންތެރިއަކަށް ދޭން ޖެހޭ ބޮޑު މުސާރަ ދެވޭނެ ކަމާ މެދުވެސް ވިސްނަން ޖެހޭނެ ކަމަށް ފީގޯ ވަނީ ބުނެފައެވެ.

މި ސީޒަނުގެ ނިޔަލަށް ބާސާއާއެކު މެސީ އެއްބަސްވުމުގައި ހުރިއިރު، ޖެނުއަރީ މަހު އޭނާ ބޭނުންނަމަ އިޚުތިޔާރުކުރާ ކުލަބަކާއެކު އެއްބަސްވުމެއްގައި ސޮއިކުރުމުގެ ފުރުސަތު މެސީއަށް ލިބެއެވެ. މެސީ ހޯދުމަށް އެންމެ ބޮޑަށް މަސައްކަތް ކުރަމުން އަންނަ ކުލަބަކީ ޕެޕް ގާޑިއޯލާގެ މެންޗެސްޓާ ސިޓީއެވެ. އަދި ޕީއެސްޖީންވެސް މެސީ ހޯދުމަށް މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ. އެކަމަކު ދާދި ފަހުން މެސީގެ އޭޖެންޓް އަދި އޭނާގެ ބައްޕަ ޖޯޖް މެސީ ވަނީ މެސީ ޕީއެސްޖީއާ މަޝްވަރާކުރާ ކަމަށް ދެކެވޭ ވާހަަކައިގައި ހަގީގަތެއް ނެތް ކަމަށް ބުނެފައެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައި އެޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އެގޮތުން މިހާތަނަށް 640 ލަނޑު މެސީ ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު 10 ފަހަރު ހޯދާފައެވެ. އަދި ޗެމްޕިއަންސް ލީގު ހަތަރު ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީ އަކީ މި އެވޯޑް އެންމެ ގިނައިން ހޯދި ކުޅުންތެރިޔާއެވެ.