ރާއްޖޭގައި އުފެދުނު އެންމެ މޮޅު ފްރީސްޓައިލާ މުޙައްމަދު ސައިފް ޒާހިރު އޭނާގެ އަމިއްލަ ބްރޭންޑް އިފުތިތާހުކޮށްފިއެވެ.
ބުރާސްފަތި ދުވަހުގެރޭ ޒުވާނުންގެ މަރުކަޒުގައި ބޭއްވި ރަސްމިއްޔާތެއްގައި ސައިފުގެ ބްރޭންޑް އިފުތިތާހުކޮށްދެއްވީ ކުޅިވަރާ ބެހޭ ވުޒާރާގެ ސީނިއާ ޕޮލިސީ ޑިރެކްޓަރު އަދި ޖަމުޢިއްޔާތަކުގެ ރަޖިސްޓްރާ އަޙްމަދު އިރާޝެވެ.
"ރާއްޖެއެމްވީ" އަށް ދިން އިންޓަވިއުއެއްގައި ސައިފް ވަނީ ރާއްޖޭގައި ފްރީސްޓައިލް ކުރިއަރުވަން ބޭނުންވާ ކަމަށް ބުނެފައެވެ. ސައިފް ބުނީ އޭނާގެ އަމިއްލަ ބްރޭންޑަކީ ރާއްޖޭގައި ފްރީސްޓައިލް ކުރިއެރުވުމަށް އުފެއްދި ބްރޭންޑެއް ކަމަށާއި، މުސްތަގުބަލުގައި ރާއްޖެއިން މޮޅެތި ފްރީސްޓައިލަރުން އުފެދިގެން އަންނާނެ ކަމަށް އުންމީދުކުރާ ކަމަށެވެ.
ސައިފް އިތުރަށް ބުނީ އޭނާގެ ބްރޭންޑާއެކު ފްރީސްޓައިލް ކުރިއަރުވަން ކުރަމުން އަންނަ މަސައްކަތް އިތުރަށް ފުޅާވެގެން އަންނާނެ ކަމަށާއި، މި ބްރޭންޑާއެކު އެކެޑަމީގެ މަސައްކަތް ވަރަށް އަވަސް މުސްތަގުބަލެއްގައި ފެށިގެން އަންނާނެ ކަމަށެވެ. އަދި އެކެޑަމީގެ މަސައްކަތް ފުޅާކޮށް އިތުރު ކޯޗުންނާއެކު އެކެޑަމީ ހިންގުމަކީ އޭނާގެ އަމާޒެއް ކަމަށް ސައިފް ބުންޏެވެ.
މި ރަސްމިއްޔާތުގައި ސައިފް ވަނީ އޭނާގެ ބްރޭންޑުގެ ޕާޓުނަރުން ހަމަޖައްސާފައެވެ. އެގޮތުން ގްރޫމިން ޕާޓްނަރަކަށް އަލްފާ ޑެން ހަމަޖެއްސިއިރު، ކިޓް ޕާޓްނަރަކަށް ހަމަޖައްސާފައިވަނީ ކެޕްޓަން މޯލްޑިވްސްއެވެ. އަދި އޮފިޝަލް ފޮޓޯގްރާފަރުގެ ގޮތުގައި ހަމަޖައްސާފައިވަނީ ޝަމުއްކޮ ފޮޓޯގްރަފީއެވެ.
ފްރީސްޓައިލުގައި ވިދާލި ސައިފް ވަނީ 2010 ވަނަ އަހަރާއި 2012 ވަނަ އަހަރު ރާއްޖޭގައި ބޭއްވި ރެޑްބުލް ސްޓްރީޓް ސްޓައިލް މުބާރާތުން އެއްވަނަ ހޯދައި، އެ މުބާރާތުގެ ދެވަނަ ބުރުގައި ވާދަކޮށްފައެވެ.
ފްރީސްޓައިލް ކުރުމުގެ އިތުރުން ސައިފް އަންނަނީ ޒުވާނުން ބާރުވެރިކުރުމަށް އެތައް މަސައްކަތްތަކެއް ކުރަމުންނެވެ. އަދި ބޮޑުބެރު ޖެހުމުގެ ދާއިރާގެ އިތުރުން ހުށަހެޅުމުގެ ދާއިރާއިންވެސް ސައިފް އަންނަނީ ވިދާލަމުންނެވެ. މީގެ އިތުރުން ސައިފް އަކީ ޒުވާނުންގެ މަޖިލީހުގައި މުނިފޫހިފިލުވުމުގެ ދާއިރާ ތަމްސީލު ކުރަމުން އަންނަ މެންބަރެވެ.
