މެލޭޝިޔާއަށް ދާ މީހުންގެ ކޮވިޑް ޓެސްޓަށާއި ކަރަންޓީނަށް އޮންލައިންކޮށް ފައިސާ ދެއްކޭނެ: ހައި ކޮމިޝަން
ކޮވިޑް-19 ޓެސްޓަށާއި ކަރަންޓީންވުމަށް ދައްކަންޖެހޭ ފައިސާ 15 ނޮވެމްބަރ 2020 އިން ފެށިގެން އޮންލައިންކޮށް ދެއްކޭނެ
މެލޭޝިޔާ ސަރުކާރުން އަންނަނީ އެ ގައުމަށް އެތެރެވުމަށް މަޑުމަޑުން ލުއިތަކެއް ދެމުން
މެލޭޝިޔާއަށް ދަތުރުކުރާ ފަރާތްތަކުގެ ކޮވިޑް-19 ޓެސްޓަށާއި ކަރަންޓީނަށް ދައްކަން ޖެހޭ ފައިސާ އޮންލައިންކޮށް ދެއްކޭނެގޮތަށް މެލޭޝިއާ ސަރުކާރުން ހަމަޖައްސައިފިއެވެ.
މޯލްޑިވްސް ހައި ކޮމިޝަން އޮފް މެލޭޝިޔާއިން ހޮނިހިރު ދުވަހު ބުނީ ކޮވިޑް-19 ޓެސްޓަށާއި ކަރަންޓީން ވުމަށް ދައްކަންޖެހޭ ފައިސާ 15 ނޮވެމްބަރ 2020 އިން ފެށިގެން MySafeTravel ނުވަތަ MySG ގެ MyQr މެދުވެރިކޮށް އޮންލައިންކޮށް ދެއްކޭނެ ގޮތް ހަމަޖައްސާފައި ވާނެ ކަމަށެވެ. އަދި މިގޮތަށް ހަމަޖެއްސުމާ ގުޅިގެން ފީތައް މެލޭޝިއާއަށް ދަތުރުކުރަން ފެށުމުގެ ކުރިން ދައްކަންޖެހޭނެ ކަމަށާއި އަދި ފައިސާ ދައްކާފައިވާ ކަމުގެ ލިޔުން މެލޭޝިއާއަށް އާދެވުމާއެކު އެއަރޕޯޓްގެ ކަމާބެހޭ ފަރާތްތަކަށް ހުށަހަޅަން ޖެހޭނެ ކަމަށްވެސް ބުނެފައިވެއެވެ.
އޮންލައިން ޕޭމަންޓް ޕޯޓަލްތައް މި ވެބްސައިޓްތައް މެދުވެރިކޮށް ބޭނުންކުރެވޭނެ ކަމަށް ބުނެފައިވެއެވެ.
www.myeg.com.my www-nadma.gov.my www.moh.gov.my
މެލޭޝިޔާއަކީ ގިނަ ދިވެހިން ދިރިއުޅެމުންދާ އަދި ގިނަ އަދަދަކަށް ދިވެހިން ދަތުރު ކުރަމުން ދާ ގައުމަކަށް ވުމާއެކު މިކަންކަމަށް މެލޭޝިއާއަށް ދަތުރުކުރައްވާ ފަރާތްތަކުން ސަމާލުވުމަށް މޯލްޑިވްސް ހައި ކޮމިޝަން އޮފް މެލޭޝިޔާއިން ބުނެފައިވެއެވެ.
