ފުރަބަންދު ކަރަންޓީނު އުވާލަން އަދި އަވަސް: ޑރ. ނަޒްލާ
13 ނޮވެމްބަރު 2020 | ހުކުރު 04:06ބަލި ފެތުރުން ކޮންޓްރޯލްކުރުމަށް މިހާތަނަށް ގެންގުޅެވުނު އެންމެ ރަނގަޅު އުސޫލަކީ ފުރަބަންދު ކަރަންޓީނު
ބޯޑަރު ހުޅުވި ފަހުން ފުރަތަމަ ފަހަރަށް ރަސްދޫއަށް އައި ފަތުރުވެރިންނަށް މަރުހަބާ ކިޔަނީ
އެއް ރަށުން އަނެއް ރަށަށް ދަތުރުކުރުމުގައި ކަރަންޓީނުވާން އޮންނަ އުސޫލަކީ އެންމެ ރަނގަޅު އުސޫލު ކަމަށާއި ކަރަންޓީނު އުވާލަން އަދި އަވަސް ކަމަށް ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެ އެވެ.
އެޗްއީއޯސީގައި ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ ފުރަބަންދު ކަރަންޓީނު ނުވަތަ އެއް ރަށުން އަނެއް ރަށަށް ދަތުރުކުރުމުގައި ކަރަންޓީނު ވާން ޖެހޭ ޖެހުމަށް އޮންނަ އުސޫލަކީ މުޅި ރާއްޖެއަށް ބަލި ފެތުރުން ކޮންޓްރޯލްކުރުމަށް މިހާތަނަށް ގެންގުޅެވުނު އެންމެ ރަނގަޅު އުސޫލު ކަމަށެވެ.
ޑރ. ނަޒްލާ ވިދާޅުވީ އަބަދު ކަރަންޓީނު ވާން ޖެހޭ ގޮތަށް ތިބޭނީކީ ނޫން ކަމަށާއި އެއީ ބަލި އޮތް ހާލަތަށް ބަލާފައި އަޅާ ފިޔަވަޅެއް ކަމަށެވެ. އަދި މި ހަފުތާއަށް ބަލާއިރު ގުޅުމެއް ނެތް ކޭސްތަކުގެ އަދަދު 22 ޕަސަންޓުގައި އުޅޭކަން ވެސް އޭނާ ފާހަގަކުރެއްވި އެވެ.
ޑރ. ނަޒްލާ ވިދާޅުވީ މިހާތަނަށް މާލެއިން ރަށްރަށަށް ފުރަބަންދު ކަރަންޓީނަށް ގޮސް، ކަރަންޓީނުވެ ނިމިގެން ޓެސްޓުކުރުމުން 198 މީހުން ޕޮޒިޓިވްވެފައިވާ ކަމަށާއި، އަދި އެފަރާތްތަށް ކަރަންޓީން ނުކޮށް ދޫކޮށްލިނަމަ، ކޭސްތަކުގެ އަދަދު އިތުރުވުމަކީ އެކަަށީގެންވާ ކަމެއް ކަމަށެވެ.
ޑރ. ނަޒްލާ ވިދާޅުވީ، އެޗްއީއޯސީގެ މަގުސަދަކީ ރައްޔިތުންނަށް ދަތިތަކެއް ކުރިމަތިކުރުން ނޫން ކަމަށާއި އެންމެ އިސްކަމެއްދޭނީ އަބަދުވެސް ރައްޔިތުންގެ ރައްކާތެރިކަން ކަށަވަރު ކުރުމަށް ކަމަށެވެ.
ޑރ. ނަޒްލާ އިތުރަށް ވިދާޅުވީ ފަތުރުވެރިންނާ ހިލާފަށް ދިވެހިން އަމިއްލަ ރަށްރަށަށް ދާއިރު، އާއިލާގެ މީހުންގެ ގާތަށް ޒިޔާރަތްކޮށް އާންމު ހިދުމަތްދޭ ތަންތަނަށް ވެސް ދާނެ ކަމަށާއި މި ހާލަތުގައި ކަރަންޓީނު އުވާލައިފިއްޔާ ބަލި ފެތުރުމުގެ ފުރުސަތު އޮންނާނެ ކަމަށެވެ.
އަދި ގުޅުމެއް ނެތް ކޭސްތަކުގެ އަދަދު މަދުވަމުން އަންނަ ނަމަ، ކަރަންޓީނު އުވައިލުމާ މެދު އިތުރަށް ވިސްނާނެ ކަމަށް ވެސް ޑރ. ނަޒްލާ ވިދާޅުވި އެވެ.
