ޓެރަރިޒަމްގެ އަަމަލެއް ހިންގަން އުޅުމުގެ ތުހުމަތުގައި ހަ މީހަކު ހައްޔަރުކޮށްފި
12 ނޮވެމްބަރު 2020 | ބުރާސްފަތި 07:37މީގެ ތެރޭގައި ހިމެނެނީ 18 އަހަރާއި 34 އަހަރާ ދެމެދުގެ ދިވެހި ފިރިހެނުން
މާލޭގައި ފުލުހުން ހިންގި ހާއްސަ އޮޕަރޭޝަނެއްގެ ތެރެއިން
ރާއްޖޭގައި ޓެރަރިޒަމްގެ އަމަލެއް ހިންގަން އުޅުނު ކަަމަށް ތުހުމަތު ކުރެވޭ މީހުން ހޯދަން ކުރިޔަށްގެންދާ އޮޕަރޭޝަންގެ ތެރެއިން މިހާތަނަށް ހަ މީހަކު ހައްޔަރު ކޮށްފައިވާ ކަމަށް ފުލުހުން ހާމަކޮށްފިއެވެ.
އެ އޮޕަރޭޝަން ފަށާފައިވަނީ ހަރުކަށި ފިކުރުގެ ބަޔަކު ރާވަމުން ދިޔަ ކަމަށް ތުހުމަތުކުރެވޭ ޓެރަރިޒަމްގެ އަމަލަކާ ގުޅޭގޮތުން ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެންނެވެ. ނަމަވެސް ފުލުހުން އެކަން ނާކާމިޔާބުކޮށްލާފައެވެ.
މާލެ އާއި މާލެ އަތޮޅު ކަނޑުމަތީގެ އިތުރުން ތ. ތިމަރަފުށީގައި ކުރިޔަށްގެންދާ އޮޕަރޭޝަންގެ ތެރެއިން ކަނޑުމަތީގައި އޮތް ދޯންޏަކުން ތިން މީހަކާއި، ތިމަރަފުށިން ދެ މީހެއްގެ އިތުރުން މާލެއިން މީހަކު ހައްޔަރު ކޮށްފައިވާ ކަމަށް ފުލުހުން މައުލޫމާތުދެއެވެ. މި މީހުންގެ ތެރޭގައި ހިމެނެނީ 18 އަހަރާއި 34 އަހަރާ ދެމެދުގެ ދިވެހި ފިރިހެނުންނެވެ.
ހަރުކަށި ފިކުރުގެ މީހުން ހައްޔަރު ކުރުމުގެ ހާއްސަ އޮޕަރޭޝަނެއް ފުލުހުން ފަށާފައިވާއިރު، ސީރިއާގައި ހިންގަމުންދާ ދާހިލީ ހަނގުރާމައިގައި ބައިވެރިވުމުގެ ތުހުމަތުގައި ޒުވާނަކު ދާދި ފަހުން ވަނީ ހައްޔަރުކޮށްފައެވެ. އޭނާ މި ވަގުތު ބަންދުގައި ހުރީ ނެޝަނަލް ރީއިންޓަގްރޭޝަން ސެންޓަރުގައެވެ.
ރާއްޖޭގައި ދީނީ ހަރުކަށި ފިކުރުގެ މީހުންގެ އަދަދު އިތުރުވަމުން އަންނަ ކަމަށް ކަމާ ބެހޭ އިދާރާތަކުން ވަނީ ހާމަކޮށްފައެވެ. އެގޮތުން މީހުންގެ ފުރާނައަށް ގެއްލުންދޭން ފަސްނުޖެހޭ 1،400 މީހުން ރާއްޖޭގައި އުޅެމުންދާ ކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވަނީ މީގެ ކުރިން ވިދާޅުވެފައެވެ.
