އިމިގްރޭޝަންގެ މަސައްކަތްތައް ލާމަރުކަޒުކުރުމާއި ހިދުމަތް ދިނުމުގައި ކާމިޔާބު ދެ އަހަރު
ހިދުމަތްތައް ލާމަރުކަޒީ ކުރުމުގެ ގޮތުން ވަނީ ގިނަ މަސައްކަތް ކޮށްފަ
އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ)
ފާއިތުވި ދެ އަހަރު އިމިގްރޭޝަންގެ ހިދުމަތްތައް ހޯދަން އަންނަން ފަރާތްތަކަށް ލުއިފަސޭހެ ހޯދައިދިނުމުގައި ބޮޑެތި ކާމިޔާބީތަކެއް ހޯދިފައިވާ ކަމަށް އެ އިދާރާއިން ހާމަކޮށްފިއެވެ.
އިމިގްރޭޝަންއިން ހޯދި ކާމިޔާބީތައް ފާހަގަކޮށް އާންމުކުރި ބަޔާނެއްގައި އިމިގްރޭޝަނުން ބުނެފައިވަނީ، ފާއިތުވި ދެ އަހަރުގެ ތެރޭގައި އިމިގްރޭޝަންއިން ހިދުމަތްތައް ލާމަރުކަޒީ ކުރުމުގެ ގޮތުން ވަނީ ގަން އިންޓަރނޭޝަނަލް އެއަރޕޯޓުން ބިޒްނަސް ވިސާ ދޫކުރަން ފަށާ، އަލަށް ރާއްޖެ އަންނަ ބިދޭސީ މަސައްކަތްތެރިންނަށް މި އެއަރޕޯޓުން ރާއްޖެ އެތެރެވެވޭނެ އިންތިޒާމު ވަނީ ހަމަޖައްސާފައެވެ. އަދި އެ އިދާރާއިން ވަނީ މި އެއަރޕޯޓުގައި 'ޑޮކިއުމަންޓް އެގްޒަމިނޭޝަން ލެބް' އެއް ގާއިމް ކޮށްފައެވެ.
އިމިގްރޭޝަނުން ވަނީ ހއ. އަތޮޅުގައި އެ އިދާރާގެ އޮފީހެއް ގާއިމްކޮށްފައެވެ. އަދި 'ރަށުން' ގެ ނަމުގައި ރަށްރަށުން ޕާސްޕޯޓުގެ ހިދުމަތަށް އެދެވޭނެ އިންތިޒާމް ވަނީ ހަމަޖައްސާފައެވެ.
އޭގެ އިތުރުން، އިމިގްރޭޝަންއިން ވަނީ ބޯޑަރ ސެކިއުރިޓީ ހަރުދަނާ ކުރުމުގެ ގޮތުންވެސް ފާހަގަކޮށްލެވޭ ކާމިޔާބު މަސައްކަތްތަކެއްކޮށްފައެވެ. އެގޮތުން މި މަސައްކަތުގެ ދަށުން ކުރެވުނު އެންމެ ފާހަގަކޮށްލެވޭ މަސައްކަތަކީ "ޑައިރެކްޓު އެކްސެސް ޓު ދި އިންޓަޕޯލް އިންފޮމޭޝަން ސިސްޓަމް" އެއްބަސްވުމުގައި ސޮއިކުރުމެވެ.
ބޯޑަރ ސެކިއުރިޓީ ހަރުދަނާކުރުމުގެ ގޮތުން އެ އިދާރާއިން ކޮށްފައިވާ އިތުރު މަސައްކަތަށް ބަލާއިރު ސީޕޯޓު ކްލިއަރެންސް ދިނުމަށް މޯބައިލް ސިސްޓަމެއް ތައާރަފްކޮށް ބޭނުންކުރަން ވަނީ ފަށާފައެވެ. އަދި "އެން-ރޫޓް ކްލިއަރެންސް" ހިދުމަތް ދޭން ފެށުމުގެ އިތުރުން އެމްއެމްއޭގެ ފައިނޭންޝިއަލް އިންޓެލިޖެންސް ޔުނިޓާއެކު އެއްބަސްވުމެއްގައި ވަނީ ސޮއިކޮށްފައެވެ.
ރާއްޖޭގައި ބޮޑުވެފައިވާ މައްސަލައެއް ކަމުގައިވާ އިންސާނީ ވަގުފާރީގެ މައްސަލަ ހައްލުކުރުމަށްވެސް ބޮޑެތި މަސައްކަތްތަކެއް ކުރެވުނު ކަމަށް އިމިގްރޭޝަނުން ވަނީ ބުނެފައެވެ. އެގޮތުން އިންސާނީ ވަގުފާރިއަށް ތުހުމަތު ކުރެވޭ 27 މައްސަލަ ވަނީ ތަހުގީގީ އިދާރާތަކަށް ފޮނުވާފައެވެ.
އިމިގްރޭޝަން އޮފީހުން ތައާރަފްކުރި އޮންލައިން ޕޯޓަލް 'އިމުގާ' ގެ ކާމިޔާބީއާ ގުޅޭގޮތުންވެސް އިމިގްރޭޝަނުން ވަނީ ބައިވަރު ކަންކަން ފާހަގަކޮށްފައެވެ. އެގޮތުން އެ ޕޯޓަލް މެދުވެރިކޮށް ފަސިންޖަރުން އައުމުގެ ކުރިން އެ މީހުންގެ މައުލޫމާތު ދެނެގަނެވޭނެ ނިޒާމެއް ވަނީ ގާއިމް ކޮށްފައެވެ. މި ޕޯޓަލް މެދުވެރިކޮށް ދިވެހި ޕާސްޕޯޓުގެ ހިދުމަތް ދޭން ފަށާފައިވާއިރު، ސީޕޯޓުގެ ހިދުމަތްވެސް ވަނީ ދޭން ފަށާފައެވެ. އަދި ދުނިޔޭގެ ކޮންމެ ހިސާބަކުންވެސް އެ އިދާރާއަށް ހުށަހަޅާ ލިޔުންތައް ބަލައިގަނެ ޖަވާބު ދިނުމުގެ އިންތިޒާމެއް ވަނީ ހަމަޖައްސާފައެވެ.
އިމިގްރޭޝަންއިން ބުނީ ފޯރުކޮށްދޭ ހިދުމަތްތައް ހަރުދަނާ ކުރުމުގެ ގޮތުންވެސް މަސައްކަތްތަކެއް ކުރެވިފައިވާ ކަމަށެވެ. އެގޮތުން އިމިގްރޭޝަންއިން ވަނީ އެ އިދާރާގެ ތަފާސްހިސާބުތައް ޝާއިއުކޮށްފައެވެ. އަދި ކުރިން ބިޒްނަސް ވިސާ ޕްރޮސެސް ކުރުމަސް ގިނަ ވަގުތު ނަގާއިރު މި ވަގުތު ވަނީ 48 ގަޑިއިރަށް ކުޑަކޮށްފައެވެ.
ވަރކް ވިސާގެ އިތުރުން އެހެނިހެން ވިސާތަކުގެ ހިދުމަތް ހަމަހަމަކަމާއި ފަސޭހަކަމާއެކު ފޯރުކޮށްދިނުމަށްޓަކައި އޮންލައިންކޮށް ހިދުމަތް ފޯރުކޮށްދިނުމާއި، މެރިޖް ވިސާ ހޯދުމުގައި ދިމާވާ ދަތިތައް ވަނީ ހައްލުކޮށްފައެވެ. އަދި އިމިގްރޭޝަންގެ ކޯލް ސެންޓަރުގެ ހިދުމަތް ތައާރަފްކޮށް، ރާއްޖޭގައި ދިރިއުޅޭ ބިދޭސީންގެ މައުލޫމާތު މޮނީޓަރކޮށް ބެލެހެއްޓުމަށްޓަކައި 'އަތޮޅު' ގެ ނަމުގައި މޮޑިއުލްއެއް ތައާރަފްކޮށްފައެވެ.
އެ އިދާރާއިން ވަނީ ފާއިތުވި 12 އަހަރު ތެރޭގައި ފުރަތަމަ ފަހަރަށް ސްޓްރެޓިޖިކް ޕްލޭންއެއް އެކުލަވާލާ އެޔަށް އަމަލު ކުރަން ފަށާފައެވެ.
އިމިގްރޭޝަންއިން ވަނީ ރާއްޖޭގެ އިގްތިޞާދު ކުރިއެރުވުމާ މީހުން ބިނާކުރުމަށް ވެސް ގިނަ މަސައްކަތްތަކެއް ކޮށްފައެވެ. އެގޮތުން ޓޫރިޒަމް ޕްރޮމޯޓް ކުރުމުގެ ގޮތުން އިމިގްރޭޝަންއިން ވަނީ މޯލްޑިވްސް ބޯޑަރ މައިލްސް އިފްތިތާހުކޮށްފައެވެ.
މީހުން ބިނާ ކުރުމުގެ ގޮތުން 26 އޮފިސަރަކަށް މަތީ ތައުލީމު ހާސިލް ކުރުމުގެ ފުރުސަތު ދިނުމާއެކު އިމިގްރޭޝަންގެ މަސައްކަތާ ގުޅުން ހުރި ދާއިރާތަކުން 180 އިމިގްރޭޝަން އޮފިސަރުން އަދި އެހެނިހެން މުއައްސަސާ ތަކުން 66 މީހުންނަށް ވަނީ ތަމްރީނު ދީފައެވެ.
