އިމިގްރޭޝަންއިން "އިމުގާ" މެދުވެރިކޮށް ފޯރުކޮށްދޭ ޚިދުމަތްތައް އަނެއްކާވެސް އިތުރުކޮށްފި އެވެ.

އިމިގްރޭޝަންއިން ނެރެފައިވާ އިއުލާނެއްގައި ބުނެފައިވަނީ، 15 ނޮވެމްބަރ 2020 އިން ފެށިގެން އިމިގްރޭޝަން އިން ގިނަ ހިދުމަތްތަކެއް އެކުންފުނީގެ އޮންލައިން އެޕްލިކޭޝަން އިމުގައި މެދުވެރިކޮށް ލިބެން ހުންނާނެ ކަމަށެވެ. މި ޚިދުމަތްތަކަށް އެދި ހުށަހަޅާނީ އިމިގްރޭޝަންގެ އޮންލައިން ޕޯރޓަލް imuga.immigration.gov.mv މެދުވެރިކޮށެވެ.

އެގޮތުން ދޭން ހަމަޖެހިފައިވާ ބައެއް ހިދުމަތް ތަކަގެ ތެރޭގައި އެހެން ކުންފުނިތަކުންނާއި އަމިއްލަ ފަރާތްތަކުން އިމިގްރޭޝަންއަށް އެކިއެކި ކަންކަމުގައި ހުށަހަޅާ ސިޓީއާއި އެހެނިހެން ލިޔެކިއުންތައް ހުޝައެޅޭނެ ކަމަށެވެ.

އަދި ކަނޑުމަގުން ދަތުރުކުރާ އުޅަނދު ފަހަރަށް ސައިން އޮން ވުމާއި، އުޅަނދުފަހަރުން ސައިން އޮފް ވުމާއި އަދި ކްރޫ ޓްރާންސްފަރ ޚިދުމަތް ޕޯރޓަލް މެދުވެރިކޮށް ފޯމު ހުށަހެޅުމުން، އެ ފޯމުތައް ޕްރޮސެސް ކުރުމަށްފަހު، ޚިދުމަތަށް އެދިލެއްވި ފަރާތްތަކަށް އެދިލެއްވި ޚިދުމަތާއި ގުޅޭ ގޮތުން ދެން އަމަލު ކުރަންވީ ގޮތުގެ އިރުށާދުތަކަށްވެސް އިމުގާ މެދުވެރިކޮށް ލިބެން ހުންނާނެ ކަމަށެވެ.

މީގެ އިތުރުން ވާރކް ވީޒާ ފިޔަވައި އެހެނިހެން ވީޒާ އެޕްލިކޭޝަން ފޯމާއި، ރައްޓެހީންނަށް ޒިޔާރަތް ކުރުމަށް ނުވަތަ ޑިޕެންޑެންޓުންގެ ގޮތުގައި އަންނަ ފަރާތްތައް ނުވަތަ ދިވެއްސަކާއި ކައިވެނި ކުރުންފަދަ ބޭނުންތަކަށް ރާއްޖެ ގެންނަ ފަރާތްތައް ގެނައުމަށް ސްޕޮންސަރޝިޕް ޑިކްލަރޭޝަން ފޯމު ހުށައެޅޭނެ ކަމަށާއި އަދި ޕޯޓަލް މެދުވެރިކޮށް ފޯމު ހުށަހެޅުމުން، ޚިދުމަތަށް އެދުނު ފަރާތްތަކުން ހުށަހެޅި އެޕްލިކޭޝަން ޕްރޮސެސް ކުރުމަށްފަހު، އަމަލް ކުރަންވީގޮތް ވެސް ޕޯޓަލް މެދުވެރިކޮށް އަންގައިދެވޭނެ ކަމަށް މި އިއިލާނުގައި ބުނެފައިވެ އެވެ.

އިމިގްރޭޝަނުން ބުނީ، އޮންލައިންކޮށް އެޕްލިކޭޝަން ހުށަހެޅުމުގެ ހިދުމަތް ތަޢާރަފު ކުރުމާއި ގުޅިގެން[email protected]މެއިލް މެދުވެރިކޮށް ދެމުންދިޔަ ޚިދުމަތްތަކަށް އެދެމުންދާނީ އޮންލައިން ޕޯރޓަލް މެދުވެރިކޮށް ކަމަށެވެ.

އަދި 11 ނޮވެމްބަރ 2020 ގެ ކުރިން ވިޒާ އައުކުރުމަށް އަދި މެއިލް ކުރައްވާފައިވާ ފަރާތްތަކުގެ ތެރެއިން ލިޔެކިއުންތައް ފުރިހަމަވެފައިވާ ފަރާތްތަކުގެ އެޕްލިކޭޝަން ކުރިއެކޭ އެއްގޮތަށް ޕްރޮސެސް ކުރެވޭނެ ކަމަށްވެސް އިމިގްރޭޝަނުން ބުނެފައިވެ އެވެ.

އޮންލައިން ޕޯރޓަލް ތަޢާރަފު ކުރެވުނު ކަމުގައި ވީ ނަމަވެސް، މިހާރު ވެސް އަމަލު ކުރަމުން ދާ ގޮތަށް ޑްރޮޕް ބޮކްސް މެދުވެރިކޮށް ސިޓީ ހުށަހެޅުމަށް ހަމަޖެހިފައިވާ އުޞޫލުން ސިޓީ އާއި ލިޔެކިއުން ހުށަހެޅޭނެ ކަމަށްވެސް ބުނެފައިވެ އެވެ.