ރައްޔިތުންގެ މަޖިލީހަށް އެންމެ ރަނގަޅަށް ޖަވާބުދާރީވާ ސަރުކާރަކަށް މިސަރުކާރު ވާނެ: ރައީސް
ދެކެވަޑައިގަންނަވަން ބޭނުންފުޅުވަނީ ކޮންމެ ބާރެއްވެސް އެބާރެއްގެ އިމުގެ ތެރޭގައި މަސައްކަތްކުރަމުން އަންނަތަން ކަމަށް ރައީސް ވިދާޅުވި
ރައްޔިތުންގެ މަޖިލީހުގެ ރައީސް އާއި ރައީސުލްޖުމްހޫރިއްޔާ
ރައްޔިތުންގެ މަޖިލީހަށް އެންމެ ރަނގަޅަށް ޖަވާބުދާރީވާ ސަރުކާރަކަށް މިސަރުކާރު ވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެ އެވެ.
ރާއްޖެޓީވީގެ ފަށާއިރު ޕްރޮގްރާމްގައި ރައްޔިތުންގެ މަޖިލީހުން ސަރުކާރުގެ ތެރެއަށް މާބޮޑަށް ވަނުމަށް މަސައްކަތްކުރާކަމަށް ދެކެވޭ ވާހަކަތަކާއި ގުޅޭގޮތުން އެއްސެވި ސުވާލަށް ޖަވާބުދެއްވަމުން ރައީސް ވިދާޅުވީ ޤާނޫނު އަސާސީގައި ވަރަށް ސާފުކޮށް ތިން ބާރުގެ އިން ވަކިކޮށްފައިވާ ކަމަށެވެ. ދެކެވަޑައިގަންނަވަން ބޭނުންފުޅުވަނީ ކޮންމެ ބާރެއްވެސް އެބާރެއްގެ އިމުގެ ތެރޭގައި މަސައްކަތްކުރަމުން އަންނަތަން ކަމަށް ރައީސް ވިދާޅުވިއެވެ.
އަދި އެމަނިކުފާނަކީ ގިނަ ދުވަސްތަކެއްވަންދެން ރައްޔިތުންގެ މަޖިލީހުގައި މަސައްކަތް ކުރި މީހަކަށްވާއިރު އެހޭދަކުރެއްވި ދުވަސްތަކުގެ ތެރޭގައި އެންމެ ރަނގަޅަށް މަސައްކަތްކުރުމުގެ ފުރުސަތު ލިބިގެންގޮސްފައިނުވާ ކަމަށް ރައީސް ވިދާޅުވިއެވެ. އޭރު ވެރިކަމުގެ ނުފޫޒު ވަރަށް ބޮޑަށް މަޖިލީހުގެ ތެރެއަށް ވެރިވެފައިއޮތް ކަމަށް ރައީސް ވިދާޅުވިއެވެ.
ރައީސް ވިދާޅުވީ މަޖިލީހުގެ މަސައްކަތްތައް ހުންނަ ގޮތުން ބައެއް ފަހަރު ދަތިއުނދަގޫވާ ކަންކަން ހުންނަ ކަމަށެވެ. އެކަންކަން މަޖިލިސް ކުރިއަށްދާވަރަކަށް ހަމަޖެހިގެންދާނެ ކަމަށް ރައީސް ވިދާޅުވިއެވެ. އަދި ސަރުކާރު ޖަވާބުދާރީ ކުރުމަށްޓަކައި ކުރަންޖެހޭ މަސައްކަތްތައް ވަރަށް ބާރަށް ކުރައްވާ ކަމަށް ރައީސް ވިދާޅުވިއެވެ.
19 ވަނަ ރައްޔިތުންގެ މަޖިލީހަކީ ސަރުކާރު ހިންގާ މައި ޕާޓީ އެމްޑީޕީގެ ސުޕަރ މެޖޯރިޓީ އޮތް މަޖިލީހެކެވެ. އެއާއެކުވެސް މަޖިލީހުން އަންނަނީ ސަރުކާރު ޖަވާބުދާރީ ކުރުވުމަށް ގިނަ މަސައްކަތްތަކެއް ކުރަމުންނެވެ.
