ޕޮޗެޓީނޯ ހޯދަން ޕީއެސްޖީންވެސް މަސައްކަތް ކުރަނީ

ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯ ހޯދަން ޕީއެސްޖީންވެސް މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

މިދިޔަ އަހަރުގެ ނޮވެންބަރު މަހު ޓޮޓެންހަމުގެ ކޯޗުގެ މަގާމުން ވަކިކުރި ޕޮޗެޓީނޯ އަދި ޓީމަކާ ހަވާލުވެފައެއް ނުވެއެވެ. ޕޮޗެޓީނޯ ޓޮޓެންހަމުގެ ކޯޗުގެ މަގާމުން ވަކިކޮށްފައިވަނީ ފަސް އަހަރަށް ފަހުއެވެ. އޭނާ ވަނީ އެ ޓީމުގައި ކާމިޔާބު މަސައްކަތްތަކެއް ކޮށްފައެވެ. އެގޮތުން އެ ޓީމަށް އަލަށް ޔުއެފާ ޗެމްޕިއަންސް ލީގުގެ ފައިނަލުން ފުރުސަތު ހޯދައިދީ ރަނގަޅު ޓީމެއް އެކުލަވާލިއެވެ.

ޕޮޗެޓީނޯ ހޯދުމަށް ޕީއެސްޖީން މަސައްކަތް ފެށީ މި ސީޒަނަށްފަހު އެ ޓީމުގެ ކޯޗަކަށް މިހާރު ހުރި ތޯމަސް ޓުޗެލްގެ އެއްބަސްވުން ހަމަވާތީ ކަމަށް ރިޕޯޓުތައް ބުނެއެވެ. ދާދި ފަހުން ޓުޗެލް ވަނީ ޕީއެސްޖީގެ އެއްބަސްވުން އައު ކުރުމުގެ ވާހަކަތަކުގައި މާ ބޮޑު ކުރިއެރުމެއް ނުލިބޭނަމަ، އަންނަ އަހަރު އޭނާ އެ ޓީމުން ނުފެނުމުގެ ފުރުސަތު އެބައޮތް ކަމަށް ބުނެފައެވެ.

މިދިޔަ ސީޒަނުގެ ޗެމްޕިއަންސް ލީގުގެ ފައިނަލުގައި ކުޅުނު ޕީއެސްޖީން މި ފަހަރު އެ މުބާރާތުގައި ކުޅުނު ތިން މެޗުގެ ތެރެއިން ދެ މެޗުން ވަނީ ބަލިވެފައެވެ. އަދި ފްރެންޗް ލީގުގެ އެއްވަނައިގައި އެންމެ ފަހުން ކުޅުނު ހަތް މެޗުން ވެސް މޮޅުވެގެން ޕީއެސްޖީ އޮތްއިރު، އެ ޓީމު ލީގުގެ ފުރަތަމަ ދެ މެޗުން ވަނީ ބަލިވެފައެވެ.

ޕޮޗެޓީނޯ ހޯދުމަށް ޕީއެސްޖީން މަސައްކަތް ފެށިއިރު، އޭނާ ހޯދުމަށް މެންޗެސްޓާ ޔުނައިޓެޑާއި މެންޗެސްޓާ ސިޓީންވެސް އަންނަނީ މަސައްކަތް ކުރަމުންނެވެ. އެކަމަކު ޕޮޗެޓީނޯ ބަދަލުވާން ބޭނުންވަނީ ޔުނައިޓެޑަށް ކަމަށް ވަނީ ރިޕޯޓުކޮށްފައެވެ.

ދާދި ފަހުން ޕޮޗެޓީނޯ ބުނީ އޭނާ އިންތިޒާރުކުރަނީ ރަނގަޅު މަޝްރޫއަކަށް ކަމަށާއި، މިހާރު ހުރީ ރަނގަޅު އޮފާއެއް ލިބިއްޖެނަމަ ޓީމަކާ ގުޅެން ތައްޔާރަށް ކަމަށެވެ. އަދި މީގެ ކުރިން އޭނާ ވަނީ އަނބުރާ އިނގިރޭސި ޕްރިމިއާ ލީގުގެ ކުލަބަކާ ގުޅެން ބޭނުންވާކަމަށްވެސް ބުނެފައެވެ.

އުމުރުން 48 އަހަރުގެ ޕޮޗެޓީނޯ ހޯދުމަށް ސިޓީ އާއި ޔުނައިޓެޑުގެ އިތުރުން ޕީއެސްޖީންވެސް މަސައްކަތް ކުރަމުން އަންނައިރު، މީގެ ކުރިން އޭނާ ހޯދުމަށް ބާސެލޯނާ އާއި ރެއާލް މެޑްރިޑުންވެސް ވަނީ މަސައްކަތް ކޮށްފައެވެ. އޭގެ ތެރެއިން ބާސާއިން ވަނީ އެ ޓީމުގެ ކޯޗަކަށް ރޮނާލްޑް ކޫމަން ހަމަޖެއްސުމުގެ ކުރިން ޕޮޗެޓީނޯއާއެކު މަޝްވަރާ ކޮށްފައެވެ.