ދެވަނަ ކުއާޓާގައި ވައްކަމާއި ފޭރުމުގެ މައްސަލަ ތަކުގައި މާލެއިން ހައްޔަރު ކޮށްފައިވަނީ އެންމެ އަންހެނެކެވެ.

ހޯމަ ދުވަހު ފުލުހުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި އޭޕްރީލް 1 އިން ޖޫން 30 އަށް ވައްކަމާއި ފޭރުމުގެ 1001 މައްސަލަ ހުށައަޅާފައިވާއިރު 673 މައްސަލަ ހުށައަޅާފައިވަނީ ގްރޭޓަރ މާލެ ސަރަހައްދުންނެވެ.

އެގޮތުން މި ތަފާސްހިސާބުތަކުގައި ދައްކާ ގޮތުގައި މާލެއިން ވައްކަމުގެ 395 މައްސަލަ ރިޕޯޓް ކޮށްފައިވާއިރު ފޭރުމުގެ 82 މައްސަލަ ރިޕޯޓްކޮށްފައިވެއެވެ. އަދި މީގެ ތެރެއިން 95 އިންސައްތަ ފޭރުމުގެ މައްސަލަތަކުގައި އެއްވެސް ކަހަލަ ހަތިޔާރެއް ބޭނުންކޮށްފައެއް ނުވެއެވެ. މި މައްސަލަ ތަކުގައި 259 މީހަކު ހައްޔަރުކޮށްފައިވާއިރު އޭގެ ތެރޭގައި ހިމެނެނީ އެއް އަންހެނަކާއި، 258 ފިރިހެނެކެވެ.

ވައްކަމުގެ 520 މައްސަލައިގެ ތެރެއިން އެންމެ ގިނައިން ރިޕޯޓްކޮށްފައި ވަނީ ސައިކަލު ވަގަށް ނެގި މައްސަލަތަކެވެ. އެގޮތުން 127 ސައިކަލެއް ވަގަށްނަގައިގެން ރިޕޯޓްކޮށްފައިވެއެވެ. މޯބައިލް ފޯނު ނަގައިގެން 121 މައްސަލައެއް ރިޕޯޓްކޮށްފައިވާއިރު، އެ ކުއާޓަރުގައި ފައިސާ ވަގަށް ނަގައިގެން 25 މައްސަލައެއް ރިޕޯޓްކޮށްފައިވެއެވެ.

މާލެއިން ވައްކަމާއި ފޭރުމުގެ އެންމެ ގިނަ މައްސަލަ ރިޕޯޓްކޮށްފައި ވަނީ މާފަންނުންނެވެ. މާފަންނުން 205 މައްސަލައެއް ރިޕޯޓްކޮށްފައިވާއިރު އޭގެ ތެރެއިން 179 މައްސަލައަކީ ވައްކަމުގެ މައްސަލައަށް ވާއިރު އަނެއް 26 މައްސަލައަކީ ފޭރުމުގެ މައްސަލައެވެ.

ދެވަނައަށް މާލެ ސިޓީއިން އެންމެ ގިނަ މައްސަލަ ރިޕޯޓްކޮށްފައި ވަނީ ހުޅުމާލެއިންނެވެ. އެގޮތުން ޖުމްލަ 117 މައްސަލަ ރިޕޯޓްކޮށްފައިވެއެވެ. މާލެ ސިޓީއިން ވައްކަމާއި ފޭރުމުގެ އެންމެ މަދު މައްސަލަތައް ރިޕޯޓްކޮށްފައި ވަނީ ވިލިމާލެއިންނެވެ. ވިލިމާލެއިން ރިޕޯޓްކޮށްފައިވަނީ އެންމެ 13 މައްސަލައެވެ.

ވައްކަމާއި ފޭރުމުގެ މައްސަލައިގައި އައްޑޫސިޓީއިން 73 މައްސަލައެއް ރިޕޯޓްކޮށްފައިވާއިރު، ފުވައްމުލަކު ސިޓީއިން ރިޕޯޓް ކޮށްފައިވަނީ 34 މައްސަލައެވެ. އަދި އެހެނިހެން އަތޮޅުތަކުން 220 މައްސަލައެއް ރިޕޯޓްކޮށްފައިވެއެވެ.