ފަސްޓް ލޭޑީއާ ގުޅުވައިގެން ދޮގު މައުލޫމާތު ފަތުރާފައިވާތީ އެމްއެންއެން އިން މައާފަށް އެދެން ޖެހޭ: ލިޓިޖެންޓްސް ފަރމް
10 ނޮވެމްބަރު 2020 | އަންގާރަ 05:13އެމްއެންއެން އިން ޝާއިއު ކޮށްފައިވާ ލިޔުން އިސްލާހު ކުރުމަށް ލިޓިޖެންޓްސް ފަރމް އިން ވަނީ ބުނެފަ
ރައީސުލްޖުމްހޫރިއްޔާގެ އަނބިކަނބަލުން، ފަޒްނާ އަޙްމަދު
ފަސްޓް ލޭޑީ ފަޒްނާ އަހްމަދު އާ ގުޅުވައިގެން ފަތުރާފައިވަނީ ދޮގު މައުލޫމާތު ކަމަށާ އެކަމަށް މޯލްޑިވްސް ނިއުސް ނެޓްވޯކް (އެމްއެންއެން) އިން މައާފަށް އެދެން ޖެހޭ ކަމަށް ލިޓިޖެންޓްސް ފަރމް އިން ބުނެފި އެވެ.
ލިޓިޖެންޓްސް ފަރމް އިން ބުނީ އެމްއެންއެން އިން ރައީސުލްޖުމްހޫރިއްޔާގެ އަނބިކަނބަލުން، މ. ދީފްރަމްއާގޭ ފަޒްނާ އަޙްމަދާ ބެހޭ ގޮތުން، މާލޭ ސިޓީ ކައުންސިލުން ލޮނު ޒިޔާރަތްކޮޅުގައި ޤާއިމުކުރަމުންދާ ޕާކާ ގުޅުވައި، ޝާއިޢު ކޮށްފައިވަނީ ދޮގު މައުލޫމާތު ކަމަށް އިގުރާރު ވުމާއެކު އެކަމަށް މައާފަށް އެދެންޖެހޭ ކަމަށެވެ. އަދި މިކަން އިސްލާހު ކުރުމަށް ވެސް ލިޓިޖެންޓްސް ފަރމް އިން ވަނީ ބުނެފަ އެވެ.
އެގޮތުން ލިޓިޖެންޓްސް ފަރމް އިން ނެރުނު ބަޔާނެއްގައި ބުނީ ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސްގެ ބްރޯޑްކާސްޓްކުރާ ފަރާތުގެ ކޮންޓެންޓްގައި ހިފަހައްޓަންޖެހޭ ހަމަ ނުވަތަ މިންގަނޑުތަކުގެ ގޮތުގައި ކަނޑައަޅާފައިވާ 03 ވަނަ ހަމައިގެ 1 ވަނަ ނަންބަރުގައި އޮންނަ މާއްދާއާއި ޚިލާފަށް ފަޒްނާ އަޙްމަދުގެ ޢިއްޒަތާއި ޤަދަރަށާއި، އުނިކަންލިބި، މުޖުތަމަޢުގައި އެކަމަނާއާއިމެދު ނުބައިތަޞައްވުރެއް އުފެދިދާނެ ގޮތަކަށް އެމްއެންއެން އިން ޙަޤީޤަތާއި ޚިލާފު މަޢުލޫމާތު ޝާއިޢުކޮށްފައި ވާކަމަށެވެ.
މީގެ އިތުރުން ބްރޯޑް ކާސްޓް ކުރުމުގެ ޤަވާޢިދު ގެ 41 ވަނަ މާއްދާގައި "ބްރޯޑްކާސްޓްކުރާ ފަރާތުން އެއްވެސް ކޮންޓެންޓެއް ހުށަހެޅުމުގައި ޚިދުމަތް ލިބިގަންނަ ފަރާތްތަކަށް ކަނޑައެޅިގެން ކަމެއް އޮޅޭގޮތަށް ގެނެސްދެވިއްޖެނަމަ، މި ގަވާއިދުގެ ދަށުން އެކުލަވާލައިފައިވާ ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސްގައިވާ ގޮތުގެމަތިން އެ ކުށް އިޞްލާޙުކޮށްފައި، އެކަމަށް މަޢާފަށް އެދެންޖެހޭނަމަ، އެކަމަށް މަޢާފަށް އެދެންވާނެ" ކަމަށް އޮންނާނެ ކަމަށެވެ.
މި ގަވައިދު މިހެން އޮތް ކަމުގައި ވީނަމަވެސް، އެމްއެންއެން އިން އެއްވެސް އަސާސެއްގެ މައްޗަށް ބުރަވުމެއްނެތި، ފަޒުނާ އަޙްމަދާއި ބެހޭ ގޮތުން ޙަޤީޤަތާއި ޚިލާފަށް އެ ނޫހުގެ ވެބްސައިޓްގައި ޝާއިޢު ކޮށްފައިވާ ލިޔުން އިޞްލާ ހުކުރުމަށާއި، އަދި މި ލިޔުމަކީ ޙަޤީޤަތާއި ޚިލާފް ލިޔުމެއްކަމަށް އިޢުތިރާފްވެ، މަޢާފަށް އެދުމަށް ފަޒްނާ އަޙްމަދުގެ ޤާނޫނީ ވަކީލުންގެ ޙައިޘިއްޔަތުން އެ ފަރމް އިން ވަނީ ބުނެފައެވެ.
