ކުދި އަދި މެދުފަންތީގެ ވިޔަފާރި ކުރިއެރުވުމަށް ބަޖެޓުން އެސްޑީއެފްސީއަށް ސީޑް ކެޕިޓަލްގެ ގޮތުގައި 400 މިލިއަން!
ކުދި އަދި މެދު ފަންތީގެ ވިޔަފާރީތައް އުފެދި ތަރައްގީ ކުރުމަށް ދައުލަތުގެ ބަޖެޓުން މުހިއްމު އިސްކަމެއްދީފައިވޭ
އެސްޑީއެފްސީ ހުޅުވުމުގެ ރަސްމިއްޔާތުގެ ތެރެއިން
ކުދި އަދި މެދު ފަންތީގެ ވިޔަފާރީތައް ތަރައްގީ ކުރުމަށް މުހިންމު އިސްކަމެއްދީ އެސްއެމްއީ ޑިވެލޮޕްމަންޓް ފައިނޭންސް ކޯރޕަރޭޝަން (އެސްޑީއެފްސީ)ށް ސީޑް ކެޕިޓަލްގެ ގޮތުގައި 400 މިލިއަން ރުފިޔާ ބަޖެޓުގައި ހިމަނާފައިވާނެކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މިނިސްޓަރ އަމީރު ވިދާޅުވީ، އިޤްތިސާދު ކުރިއެރުމުގައި އެންމެ ބޮޑު ދައުރެއް އަދާކުރަނީ ޕްރައިވެޓް ސެކްޓަރ، ހާއްސަކޮށް ކުދި އަދި މެދު ފަންތީގެ ވިޔަފާރިތަކުންކަމަށާއި އަދުގެ ކުދި އަދި މެދު ފަންތީގެ ވިޔަފާރީ ތަކަކީ މާދަމާގެ ބޮޑެތި ވިޔަފާރިތައްކަމަށެވެ.
އަދި، ހަރަކާތްތެރި ޕްރައިވެޓް ސެކްޓަރއެއް އުފެއްދުމަށްޓަކައި ކުދި އަދި މެދު ފަންތީގެ ވިޔަފާރީތައް އުފެދި ވިޔަފާރިތައް ފުޅާވާންޖެހޭކަން ފާހަގަކުރައްވައި މިނިސްޓަރ ވަނީ 2021 ވަނަ އަހަރު ކުދި އަދި މެދު ފަންތީގެ ވިޔަފާރީތައް އުފެދި ތަރައްގީ ކުރުމަށް ދައުލަތުގެ ބަޖެޓުން މުހިއްމު އިސްކަމެއްދީފައިވާކަން ހާމަކޮށްފަ އެވެ. އެގޮތުން އެސްޑީއެފްސީ މެދުވެރިކޮށް ލޯނު ދޫކުރަމުންދާނެކަމަށާއި އެސްޑީއެފްސީއަށް ސީޑް ކެޕިޓަލްގެ ގޮތުގައި 400 މިލިއަން ރުފިޔާ 2021 ވަނަ އަހަރު ދޫކުރާނެކަމަށް މިނިސްޓަރ ވިދާޅުވި އެވެ.
އަދި އެސް.އެމް.އީ ޤާނޫނުގައިވާ ގޮތުގެ މަތިން އިތުރު 50 މިލިއަން ރުފިޔާ އިންވެސްޓް ކުރެވޭނެކަންވެސް މިނިސްޓަރ ފާހަގަކުރެއްވި އެވެ. ކޮވިޑް-19 ރިލީފް ލޯނު ފޯރުކޮށްދިނުމުގައި ވެސް އެސްޑީއެފްސީއިން ވަނީ މުހިންމު ރޯލެއް ކުޅެދީފައިވާކަން ފާހަގަކުރައްވަފައި މިނިސްޓަރ ވަނީ މިހާތަނަށް އެސް.ޑީ.އެފް.ސީންނީ 507 ވިޔަފާރީ ތަރައްގީ ކުރުމަށް 708 މިލިއަން ރުފިޔާގެ ލޯނު އެޕްރޫވްކޮށްފައިވާކަމަށް ވިދާޅުވެފަ އެވެ.
އަދި ކޮވިޑް-19ގެ ރިލީފް ލޯނުގެ ގޮތުގައި 2،100 އެއްހާ ވިޔަފާރިއަށް 364 މިލިއަން ރުފިޔާގެ ލޯނު ދޫކޮށްފައިވާކަމަށް މިނިސްޓަރ ވަނީ ވިދާޅުވެފަ އެވެ.
