އަންނަ އަހަރަށް ލަފާ ކުރާ ބަޖެޓުގައި ތައުލީމީ ދާއިރާއަށް 4 ބިލިއަން ރުފިޔާ!
އަމާޒަކީ، ފެންވަރު ރަނގަޅު ތަޢުލީމެއް ރާއްޖޭގެ 5 ސަރަޙައްދުން ވެސް ލިބޭނެ މަގު ފަހިކޮށްދިނުން
އިއްޒުއްދީން ސްކޫލް ހުޅުވުމުގެ ރަސްމިއްޔާތުގައި ރައީސް ޞާލިހުއާއި ނައިބް ރައީސް ފައިސަލް އަދި އެޑިއެކޭޝަން މިނިސްޓަރ ޢާއިޝަތު އަލީ
2021 ވަނަ އަހަރުގެ ބަޖެޓުގައި ތައުލީމީ ދާއިރާއަށް 4 ބިލިއަން ރުފިޔާ ހިމަނައިފި އެވެ.
ހޯމަ ދުވަހުގެ ޖަލްސާގައި އަންނަ އަހަރަށް ލަފާ ކުރާ ބަޖެޓު ހުށައަޅުއްވާދެއްވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ މި ބަޖެޓަކީ އިޤްތިސާދީ ހަރަކާތްތައް ފުޅާވަމުންދާ ދަނޑިވަޅެއްގައި ބޭނުންވާ ވޯރކްފޯސް ބިނާކުރުމަށާއި، ތައުލީމަށްޓަކައި ހިޖުރަކުރަން ޖެހޭ މިންވަރު ކުޑަކުރުމަށް އިސްކަންދީގެން ކަނޑައެޅިފައިވާ ބަޖެޓެއް ކަމަށެވެ.
ތައުލީމީ ދާއިރާއަކީ އެއް ދާއިރާއަކުން އެންމެ ގިނަ އަދަދަކަށް މަޝްރޫއުތައް ރޭވިފައިވާ އެއް ދާއިރާ ކަން ފާހަގަކުރައްވާ މިނިސްޓަރ ވިދާޅުވީ 114 ރަށެއްގައި މަޝްރޫއުތައް ހިންގުމަށް ރޭވިފައިވާ ކަމަށެވެ. އަދި އޭނާ ވަނީ ހަރަދު ކުރުމަށް ނިންމާފައިވާ ކަންކަމާއި ގުޅޭގޮތުން މަޖިލީހުގައި ވާހަކަދައްކަވާފަ އެވެ.
ސަރުކާރުގެ އަމާޒަކީ، ފެންވަރު ރަނގަޅު ތަޢުލީމެއް ރާއްޖޭގެ 5 ސަރަޙައްދުން ވެސް ލިބޭނެ މަގު ފަހިކޮށްދިނުން ކަމަށް މިނިސްޓަރ ވިދާޅުވި އެވެ. މީގެއިތުރުން ހެނދުނުގެ ނާސްތާ ޕްރޮގްރާމް، ބަދަލުތަކަކާއެކު އިތުރަށް ހަރުދަނާކޮށް އެފިޝަންޓްކޮށް އަންނަ އަހަރުވެސް މި ޕްރޮގްރާމް ކުރިއަށް ގެންދިއުމަށް ބަޖެޓުކުރެވިފައިވާކަމަށް މިނިސްޓަރ ވިދާޅުވި އެވެ.
