ފްރާންސްގައި ކޮވިޑްގެ ނުރައްކާ ބޮޑު، ފާއިތުވެދިޔަ 24 ގަޑިއިރު އެކަނިވެސް 271 މަރު

ފްރާންސްގައި ކޮވިޑް-19 ގެ ނުރައްކާ ބޮޑު ވަމުން އަންނަ ކަމަށާއި، ފާއިތުވެދިޔަ 24 ގަޑިއިރު އެކަނިވެސް އެގައުމުން 271 މީހުން ކޮވިޑް-19 ގެ ބަލީގައި މަރުވެފައިވާކަމަށް އެ ގައުމުގެ ސިއްހަތާއި ބެހޭ ވުޒާރާއިން ބުނެފި އެވެ.

ފްރާންސްގެ ސިއްހަތާއި ބެހޭ ވުޒާރާއިން އެންމެ ފަހުން ނެރުނު ތަފާސް ހިސާބުތައް ދައްކާގޮތުން އެގައުމުން ފާއިތުވެދިޔަ 24 ގަޑިއިރު އެކަނިވެސް އެގައުމުން 38,619 މީހުން ވަނީ ކޮވިޑަށް ޕޮޒިޓިވްވެފައެވެ.

މީގެ އިތުރުން ފްރާންސްއިން ފާއިތުވެދިޔަ 24 ގަޑިއިރު 271 މީހުން ކޮވިޑްގެ ބަލީގައި މަރުވެފައިވާއިރު، އެގައުމުގެ ސިއްހަތާއި ބެހޭ ވުޒާރާއިން ބުނީ މިހާރު އަޅާފައިވާ ފިޔަވަޅުތައް އިތުރަށް ވަރުގަދަ ކުރުމަށް މަސައްކަތް ކުރަމުން އަންނަ ކަމަށާއި، އެގޮތުން އެގައުމުގައި ކުރިޔަށްދާ ކުޅިވަރު ހަރަކާތްތައް ހުއްޓައިލާން ޖެހިދާނެ ކަމަށެވެ.

ފްރާންސްއަކީ މުޅި ދުނިޔެއިން 4 ވަނައަށް އެންމެ ގިނަ މީހުން ކޮވިޑަށް ޕޮޒިޓިވްވެފައިވާ ގައުމެވެ. އެގޮތުން އެގައުމުން މިހާތަނަށް 1،787،324 މީހުން ކޮވިޑަށް ޕޮޒިޓިވްވެފައިވާއިރު 40،439 މީހުން ވަނީ މިބަލީގައި މަރުވެފައެވެ.