ހުޅުމާލޭ ހޮސްޕިޓަލަށް ގެންދިޔަ ބިދޭސީ މީހާގެ މަރަކީ ކޮވިޑް މަރެއް، މިއީ 40 ވަނަ މަރު!
8 ނޮވެމްބަރު 2020 | އާދީއްތަ 18:18މަރުވެގެން ހޮސްޕިޓަލަށް ގެންދިޔުމުން އޮންނަ ޕްރޮޓޮކޯލްގެ ތެރެއިން ކޮވިޑަށް ޓެސްޓު ކުރި
އޭނާ ހުޅުމާލޭ ހޮސްޕިޓަލަށް ގެންދިޔަ އިރުވެސް މަރުވެފައިވާ ކަމަށް އެޗްޕީއޭއިން މައުލޫމާތު ދޭ
ހުޅުމާލެ ހޮސްޕިޓަލަށް ގެންދިޔަ ބަންގްލަދޭޝް މީހާގެ މަރަކީ ކޮވިޑް މަރެއް ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެކަމާ ގުޅޭގޮތުން އާދިއްތަ ދުވަހު ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނީ، އެމީހާ މަރުވެގެން ހޮސްޕިޓަލަށް ގެންދިޔުމުން އޮންނަ ޕްރޮޓޮކޯލްގެ ތެރެއިން ކޮވިޑަށް ޓެސްޓު ކުރިއިރު ޕޮޒިޓިވްވެފައިވާ ކަމަށެވެ. އެޗްއީއޯސީއިން މައުލޫމާތު ދީފައިވާ ގޮތުގައި އެ މީހާއަކީ 43 އަހަރުގެ މީހެކެވެ.
އެ މީހާގެ މަރަކީ ކޮވިޑް މަރެއްގެ ގޮތުގައި މިހާތަނަށް ކަނޑައަޅާފައިނުވާ ކަމަށާއި، އިތުރަށް ބަލަން ޖެހޭ ކަންކަން ބަލަމުންދާ ކަމަށް އެޗްއީއޯސީން އޭރު ވަނީ ބުނެފައެވެ.
އެކަމާ ގުޅޭ ފަހުގެ މައުލޫމާތު ހިއްސާ ކުރަމުން އާދިއްތަ ދުވަހުގެރޭ އެޗްޕީއޭއިން ކުރި ޓްވީޓެއްގައި ވަނީ އެމީހާގެ މަރަކީ ކޮވިޑް މަރެއްގެ ގޮތުގައި ކަނޑައަޅާފައިވާކަން ބަޔާން ކޮށްފައެވެ. އެގޮތުން އޭނާ ހުޅުމާލޭ ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށާއި، ހޮސްޕިޓަލަށް ގެނަ އިރުވެސް އެއްވެސް ހަރަކާތެއް ނެތް ކަމަށް އެޗްޕީއޭއިން ބުނެފައިވެއެވެ.
އޭނާގެ މަރާއެކު މިހާތަނަށް ރާއްޖެއިން ކޮވިޑް ޖެހިގެން މަރުވި މީހުންގެ ޖުމުލަ އަދަދަކީ 40 އެވެ.
