ހަތަރު އަތޮޅެއްގެ 16 ރަށެއްގައި 71 ގެސްޓްހައުސް ހުޅުވަން ހުއްދަދީފި
8 ނޮވެމްބަރު 2020 | އާދީއްތަ 08:18ޓްރާންސިޓް ކަރަންޓީން ފެސިލިޓީގެ ގޮތުގައި ބޭނުންކުރުމަށް މާލެސިޓީން މިހާތަނަށް ވަނީ، 42 ގެސްޓްހައުސްއަކަށް ހުއްދަދީފަ
ހުޅުމާލެގައި ހުންނަ ގެސްޓްހައުސްއެއް، މާލޭ ސަރަހައްދުގެ ގެސްޓްހައުސްތަކަށް ހުއްދަ ދީފައިވަނީ ޓްރާންސިޓް ފެސިލިޓީތަކުގެ ގޮތުގައި ބޭނުން ކުރުމަށް
މިހާތަނަށް ރަށްރަށުގައި ހުރި ގެސްޓް ހައުސްތަކުގެ ތެރެއިން 71 ގެސްޓް ހައުސްއެއް އަލުން ހުޅުވުމުގެ ހުއްދަދީފައިވާ ކަމަށް ޓުއަރިޒަމް މިނިސްޓްރީން ބުނެފިއެވެ.
"ރާއްޖެއެމްވީ" އަށް މައުލޫމާތު ދެމުން ޓުއަރިޒަމް މިނިސްޓްރީން ބުނީ، އާދިއްތަ ދުވަހުގެ ނިޔަލަށް ރާއްޖޭގެ ހަތަރު އަތޮޅަކުން 16 ރަށެއްގައި ހިންގާ 71 ގެސްޓް ހައުސްއެއް އަލުން ހުޅުވުމުގެ ހުއްދަ ދޫކޮށްފައިވާ ކަމަށެވެ. އަދި މިއީ މާލެ ސިޓީގައި ޓްރާންސިޓް ކަރަންޓީ ފެސިލިޓީގެ ގޮތުގައި ބޭނުންކުރާ ގެސްޓްހައުސްތައް ނުހިމަނާ ހުއްދަދީފައިވާ ގެސްޓް ހައުސްތަކުގެ އަދަދެވެ.
ޓްރާންސިޓް ކަރަންޓީން ފެސިލިޓީގެ ގޮތުގައި ބޭނުން ކުރުމަށް މާލެސިޓީން މިހާތަނަށް ވަނީ، 42 ގެސްޓްހައުސްއަކަށް ހުއްދަދީފައިއެވެ. ތަފާސްހިސާބުތައް ދައްކާގޮތުން، ޓްރާންސިޓް ކަރަންޓީން ފެސިލިޓީގެ ގޮތުގައި ބޭނުންކުރާ ގެސްޓްހައުސްތަކުގައި 1،958 އެނދު ހުރެއެވެ.
ކޮވިޑް-19 އާ ގުޅިގެން މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތައް ބަންދުކޮށްފައި ވަނީ މިދިޔަ މާޗު މަހުގެ 17 ވަނަ ދުވަހުއެވެ. އަދި އަލުން ގެސްޓް ހައުސްތައް ހުޅުވާފައިވަނީ މިދިޔަ އޮކްޓޯބަރު މަހުގެ 15 ވަނަ ދުވަހުއެވެ. ގެސްޓް ހައުސްތައް ހުޅުވުމުގެ ހުއްދަ ދެމުންދަނީ، އެކަމަށް ކަނޑައެޅިފައިވާ ހާއްސަ އުސޫލުތަކެއް ދަށުން، އެ އުސޫލުތަކާ އެއްގޮތަށް ޚިދުމަތް ދެވޭ ތަންތަނަށެވެ.
