މާލޭގެ ޓްރާންސްޕޯޓް ހިދުމަތް ތަރައްގީ ކުރުމަށް ކުރަމުންދާ މަސައްކަތް ނައިބު ރައީސް ބައްލަވާލައްވައިފި
މި މަސައްކަތުގައި ހަރަކާތްތެރިވަމުންދާ އެސްޓީއޯ އާއި މާލެ ސިޓީ ކައުންސިލްގެ އިސް ފަރާތްތަކާ ނައިބު ރައީސް ބައްދަލުކުރެއްވި
ނައިބު ރައީސް މާލޭ ސަރަހައްދުގައި އާންމު ދަތުރުފަތުރުގެ ހިދުމަތް ތަރައްގީ ކުރުމަށް ވަމުންދާ ތައްޔާރީތައް ބައްލަވާލުމުގެ ތެރެއިން
ރައީސުލްޖުމްހޫރިއްޔާގެ ނައިބު ފައިސަލް ނަސީމް، މާލޭ ސަރަޙައްދުގައި އާންމު ދަތުރުފަތުރުގެ ހިދުމަތް ތަރައްގީ ކުރުމަށް ވަމުންދާ ތައްޔާރީތައް ބައްލަވާލައްވައިފިއެވެ.
ހޮނިހިރު ދުވަހު ހަވީރު ނައިބު ރައީސް ވަނީ، މާލެ ސަރަހައްދުގެ އާންމު ދަތުރުފަތުރުގެ ހިދުމަތް ފުޅާކުރުމުގެ ގޮތުން ވެސްޓުޕާކު ސަރަހައްދުގައި ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) އިން ތަރައްގީކުރަމުން ގެންދާ ބަސްހުއްޓި ބިނާކުރުމުގެ މަސައްކަތް ގޮސްފައިވާ ހިސާބު ބައްލަވާލައްވާފައެވެ.
މީގެ އިތުރުން ނައިބު ރައީސް ވަނީ ކުރީގެ ދަރުމަވަންތަ ސްކޫލް ހުރި ސަރަހައްދުގައި މާލޭ ސިޓީ ކައުންސިލްގެ ފަރާތުން އަލަށް ހަދަމުންދާ ޕާކިންގ ޒޯނުގެ މަސައްކަތް ކުރިއަށްދާގޮތް ބައްލަވާލައްވާފައެވެ.
ނައިބު ރައީސްގެ މި ޒިޔާރަތުގައި އެ މަނިކުފާނު ވަނީ އާއްމު ދަތުރުފަތުރުގެ ނިޒާމު ހަރުދަނާކުރުމުގެ މަސައްކަތުގައި ޝާމިލުވާ އެސްޓީއޯ އާއި މާލެ ސިޓީ ކައުންސިލްގެ އިސް ބޭފުޅުންނާ ބައްދަލުކުރައްވާ، އެ ބޭފުޅުންނާއި މަޝްވަރާ ކުރައްވާފައެވެ. މިގޮތުން މާލެ ސަރަޙައްދުގެ އާންމު ދަތުރުފަތުރުގެ ނިޒާމުގެ މަސައްކަތުގެ ތެރެއިން މާލޭގެ ކާރޫބާރޫ ބޮޑު ޓްރެފިކަށް ލުޔެއް ލިބޭނޭހެން ކަންތައްތައް އިންތިޒާމް ކުރަމުން ގެންދިއުމަށް ނައިބު ރައީސް އިރުޝާދުދެއްވިއެވެ.
ނައިބު ރައީސް ފައިސަލް ނަސީމްގެ މި ޒިޔާރަތުގައި އެ މަނިކުފާނުގެ އަރިހުގައި، މިނިސްޓަރ އޮފް ހެލްތު އަހުމަދު ނަސީމާއި، މިނިސްޓަރ އޮފް ސްޓޭޓް ފޮރ ޓްރާންސްޕޯޓް އެންޑް ސިވިލް އޭވިއޭޝަން އަހުމަދު އާދިލާއި، މާލޭ ސިޓީ ކައުންސިލްގެ މޭޔަރު ޝިފާ މުހައްމަދާއި ރައީސުލްޖުމްހޫރިއްޔާގެ އޮފީހުގެ މިނިސްޓަރު އަހުމަދު ސަމީރު ބައިވެރިވެވަޑައިގެންނެވިއެވެ.
