މާލެ ސިޓީގައި ރޭގަނޑު 12 ޖަހަންދެން ބޭރުގައި އުޅެވޭ ގޮތަށް ހުއްދަ ދީފި

ހޮނިހިރު ދުވަހުގެރޭ 12 އިން ފެށިގެން 4 ޖަހަންދެން ބޭރަށް ނިކުމެ އުޅުމާއި، މަގުމަތީގައި އުޅަނދު ދުއްވުމުގެ ހުއްދަ ދޭން ނިންމާއި، މާލޭގައި ހިންގާ ކާފިޔު ގަޑިތަކަށް ބަދަލު ގެނެސްފިއެވެ.

ހެލްތް ޕްރޮޓެކްޝަން އެޖެންސީން ބުނީ ހުޅުމާލެ އާއި، ވިލިމާލޭގައި ރޭގަނޑު 12:00 އިން ފެށިގެން ފަތިހު 4:00 އަށް އެއްގަމު އުޅަނދު ފަހަރު ދުއްވުމާއި މަގުމައްޗާއި އާންމު ތަންތަނަށް މީހުން ނުކުތުން މަނާކުރުން ހިމެނޭ ކަމަށެވެ.

މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް ޢަމަލުކުރުމަށްވެސް އެންމެހައި ފަރާތްތަކަށް އެޗްޕީއޭއިން ވަނީ އިލްތިމާސްކޮށްފައެވެ.

މާލޭގައި ކާފިޔު ހިންގަން ފަށާފައިވަނީ ކޮވިޑް-19 އިން ރައްކާތެރިވުމުގެ ފިޔަވަޅެއްގެ ގޮތުންނެވެ. ކޮވިޑް-19 ގެ ކޭސްތައް މަދުވާވަރަކުން އެޗްޕީއޭއިން ގެންދަނީ މާލޭގައި އަޅާފައިވާ ފިޔަވަޅުތަކަށް މަޑު މަޑުން ލުއިދެމުންނެވެ. މި ފަހަކަށް އައިސް ކޮވިޑަށް ޕޮޒިޓިވްވާ ކޭސްތަކުގެ އަދަދު އުޅެނީ 80 އިން ދަށުގައެވެ.