ރާއްޖެއާ ގުޅޭގޮތުން ތައްޔާރުކޮށްފައިވާ ރިޕޯޓް ޔޫޕީއާރުން ބަލައިގެންފި

މި މަހުގެ 4 އިން 6 އަށް ކުރިޔަށް ދިޔަ ދިވެހިރާއްޖޭގެ ޔުނިވާސަލް ޕީރިއޮޑިކް ރިވިއުގައި، ޔޫޕިއާރު ވޯކިން ގްރޫޕުން ދިވެހިރާއްޖެއާ ގުޅޭގޮތުން ތައްޔާރުކޮށްފައިވާ ރިޕޯޓް ހުކުރު ދުވަހު ބޭއްވި ސެޝަންގައި ބަލައިގެންފިއެވެ.

އެ ރިޕޯޓުގައި ނޮވެމްބަރު 4 ގައި ބޭއްވުނު ރާއްޖޭގެ ރިވިއު ސެޝަންގައި ބައިވެރިވި 95 މެންބަރު ގައުމަކުން ދިވެހިރާއްޖެއަށް ހުށަހަޅާފައިވާ ރެކޮމެންޑޭޝަންތައް ހިމަނާފައިވާ ކަމަށް އެޓާނީ ޖެނެރަލްގެ އޮފީހުން މައުލޫމާތުދެއެވެ.

Advertisement

ދިވެހިރާއްޖޭގެ ސެޝަންގައި ވާހަކަ ދެއްކި ހުރިހާ ގައުމުތަކުން ވަނީ، ދިވެހިރާއްޖޭގެ ހިންގުމުގެ ނިޒާމާއި، ގާނޫނީ އޮނިގަނޑާއި، އަދުލު އިންސާފުގެ ނިޒާމު އިސްލާހުކުރުމަށްޓަކައި ރާއްޖެއިން ކުރަމުންދާ މަސައްކަތްތަކަށް ތައުރީފްކޮށްފައެވެ. އަދި އަންހެނުންނާއި، ކުޑަކުދިންނާއި، އެނޫންވެސް މުޖުތަމައުގެ ހާއްސަ ރައްކާތެރިކަން ބޭނުންވާ ފަރާތްތަކުގެ ހައްގުތައް ރައްކާތެރިކުރުމަށްޓަކައި ދިވެހިރާއްޖެއިން ކުރަމުންދާ މިންނަތް މަސައްކަތްތައް ފާހަގަކުރުމާއެކު، ގައުމުތަކުން ވަނީ އެކަމަށް ތައުރީފުކޮށް، ރާއްޖެއިން ހޯދަމުންދާ ތަރައްގީ އާއި ކާމިޔާބީ ބައިނަލްއަގުވާމީ މުޖުތަމައުން ބަލައިގަންނަކަން ފާހަގަކޮށްފައެވެ.

ދިވެހިރާއްޖޭގެ ޔޫޕީއާރުގެ މި ސައިކަލްގައި 95 ގައުމަކުން ވަނީ ދިވެހިރާއްޖެއަށް 259 ރެކޮމެންޑޭޝަންސް ހުށަހަޅާފައެވެ. އެ ރެކޮމެންޑޭޝަންސްތަކުގެ ތެރޭގައި މައިގަނޑުގޮތެއްގައި ހިމެނެނީ، ހިންގުމުގެ ނިޒާމު ހަރުދަނާކުރުމަށާއި، އިންސާނީ ހައްގުތަކާބެހޭ ބައިނަލްއަގުވާމީ މުއާހަދާތަކުގައި ބައިވެރިވުމަށާއި، ޖެންޑާ އިކުއަލިޓީ ގާއިމުކުރުމަށާއި، ކުޑަކުދިންގެ ހައްގުތައް ރައްކާތެރިކުރުމަށާއި، އިންސާނީ ވަގުފާރި ހުއްޓުވުމަށާއި، މޫސުމީ ބަދަލުތަކުން ކުރާ އަސަރު ކުޑަކުރުމަށް މިހާރު ވެސް ކުރަމުންދާ މަސައްކަތްތައް އެގޮތުގައި ދެމެހެއްޓުމަށް ހުށަހަޅައި، ގައުމުތަކުން ދީފައިވާ ރެކޮމެންޑޭޝަން ތަކެވެ.

ގައުމުތަކުން ހުށަހަޅާފައިވާ ރެކޮމެންޑޭޝަންތަކަށް ދިވެހިރާއްޖެއިން ޖަވާބުދާރީވާނީ 14 ޑިސެމްބަރުގެ ކުރިން ކަމަށް އޭޖީ އޮފީހުން ބުންޏެވެ. ދިވެހިރާއްޖެއިން މި ރެކޮމެންޑޭޝަންތައް ގަބޫލުކުރާކަން ނުވަތަ ނޫންކަން ކަނޑައެޅުމުގައި، ކަމާބެހޭ ފަރާތްތަކާ މަޝްވަރާކޮށް، ގާނޫނުއަސާސީއާއި، ދިވެހިރާއްޖޭގައި އަމަލުކުރެވެމުންދާ ގާނޫނުތަކަށާއި، އިސްލާމްދީނުގެ އަސްލުތަކަށް ރިއާޔަތްކުރާނެ ކަމަށް ސަރުކާރުން ބުންޏެވެ.

ޔޫޕީއާރު ސައިކަލަކީ، ރާއްޖޭގެ ތާރީހުގައިވެސް، ކެބިނެޓްގެ ގިނަ މިނިސްޓަރުން ހިމެނިވަޑައިގެންނެވި އިސް ފަންތީގެ ޑެލެގޭޝަންއަކުން ރާއްޖެ ތަމްސީލު ކުރެވިގެންދިޔަ ފުރަތަމަ ފަހަރެވެ. އަދި ރިވިއު ސެޝަންގައި ބައިވެރިވެވަޑައިގެންނެވި މިނިސްޓަރުން މުހިންމު ދާއިރާތަކުން އިންޓަވެންޝަން ދެއްވާފައިވާއިރު، މި އިންޓަވެންޝަން ތަކުގައި އިންސާނީ ހައްގުތައް ކުރިއެރުވުމުގައި ދިވެހިރާއްޖޭން ހޯދާފައިވާ ކާމިޔާބީއާއި، ތަންފީޒުކުރެވެމުންދާ ސަރުކާރުގެ ސިޔާސަތުތަކާއި، ސަރުކާރުގެ ސްޓްރެޓީޖިކް އެކްޝަން ޕްލޭންގައި ފާހަގަކޮށްފައިވާ މުހިންމު ކަންކަމަށް ވަނީ އަލިއަޅުއްވާލައްވާފައެވެ.

ރިޕޯޓް އެޑޮޕްޓްކުރުމާއިއެކު، ޔޫޕީއާރުގެ ތިންވަނަ ސައިކަލްގައި ދިވެހިރާއްޖޭގެ ރިވިއު ނިމުނީއެވެ. ޔޫޕީއާރު ޕްރޮސެސްއަކީ ކޮންމެ ހަތަރު އަހަރާއި ބައިން ކުރިއަށްދާ ޕްރޮސެސްއެއް ކަމަށް ވުމުން، ދިވެހިރާއްޖޭގެ ރިވިއު ދެން އޮންނާނީ 2025 ގައެވެ.