ހުރާއިން ފަތުރުވެރިއަކު ކޮވިޑަށް ޕޮޒިޓިވްވުމާއި ގުޅިގެން ރޭންޑަމް ސާމްޕަލް ނަގައިފި
6 ނޮވެމްބަރު 2020 | ހުކުރު 23:39ފަތުރުވެރިޔާ މިހާރުވަނީ އައިސޮލޭޝަން ފެސިލިޓީގައި އައިސޮލޭޓް ކުރެވިފައި
ކ ހުރާ
ކ. ހުރާއިން ފަތުރުވެރިއަކު ކޮވިޑް-19 އަށް ޕޮޒިޓިވްވުމާއި ގުޅިގެން ރޭންޑަމް ސާމްޕަލް ނެގުމަށް މަސައްކަތްކުރަމުންދާ ކަމަށް އެރަށުން ހާމަކޮށްފި އެވެ.
ހުރާގެ އިމަރޖެންސީ އޮޕަރޭޝަން ސެންޓަރުން ނެރެފައިވާ ބަޔާނެއްގައި ބުނެފައިވަނީ މިފަތުރުވެރިޔާ ކޮވިޑަށް ޕޮޒިޓިވްވުމުން އައިސޮލޭޝަން ފެސިލިޓީއެއް ގެންދިޔުމަށްފަހު މިހާރު އައިސޮލޭޓް ކުރެވިފައިވާ ކަމަށެވެ. އަދި މިއައިސޮލޭޝަން ފެސިލިޓީއަކީ އެފަތުރުވެރިޔާ ހުރި ގެސްޓް ހައުސްގައި ބާކީ ތިބި ގެސްޓުންނާއި މުވައްޒަފުން އެކަހެރިކޮށް ހުރެވޭނެ ގޮތަށް ތައްޔާރުކޮށްފައިވާ ފެސިލިޓީއެއް ކަމަށް ބުނެފައިވެ އެވެ. އަދި ކޮވިޑަށް ޕޮޒިޓިވްވި މީހާގެ ހާލު ރަނގަޅުކަމަށްވެސް ވަނީ ބުނެފައެވެ.
މީގެއިތުރުން ޕޮޒިޓިވްވި ފަތުރުވެރިޔާ އާއި ޑައިރެކްޓް ކޮންޓެކްޓްވި ފަރާތްތައް މިހާރު ކަރަންޓީނު ކުރެވިފައިވާކަމަށްވެސް މިބަޔާނުގައި ބުނެފައިވެ އެވެ.
އަދި ރަށުގައި ބަލި އޮތްތޯ ދެނެގަތުމަށް މިހާރު ރޭންޑަމް ސާމްޕަލްތަކެއް ނެގުމަށް ހުރާ ސިއްހީ މަރުކަޒާ ގުޅިގެން މަސައްކަތްކުރަމުން އަންނަ ކަމަށްވެސް ބަޔާނުގައި ބުނެފައިވެ އެވެ. އެގޮތުން ސާމްޕަލްތައް ނަގާނީ ރަށުގެ ގެސްޓް ހައުސްތަކުންނާއި، ރެސްޓޯރެންޓްތަކާއި ފިހާރަތައް އަދި އާންމު ޚިދުމަތްދޭ ތަންތަނުން ކަމަށްވެސް ބަޔާނުގައި ބުނެފައިވެ އެވެ. ސާމްޕަލް ނެގުމުގެ މަސައްކަތް ހުކުރު ދުވަހު ކުރިޔަށް ގެންދެވޭނެ ކަމަށް ވަނީ ބުނެފައެވެ.
އަދި މިހާލަތުގައި ރަށުގެ ހުރިހާ ރައްޔިތުންވެސް ރައްކާތެރިކަމުގެ ފިޔަވަޅުތައް އެޅުމަށް ވަނީ އެދިފައެވެ.
ކޮވިޑް-19 ގެ ސަބަބުން ރާއްޖޭގެ ބޯޑަރުތައް ބަންދުކުރުމަށްފަހު އަލުން ހުޅުވާލާފައިވަނީ ޖުލައި މަހުގެ 15 ވަނަ ދުވަހު އެވެ. ނަމަވެސް ގެސްޓް ހައުސްތައް ހުޅުވާލާފައިވަނީ އޮކްޓޯބަރ މަހުގެ 15 ވަނަ ދުވަހު އެވެ.
ގެސްޓް ހައުސްތައް ހުޅުވާލުމަށް އެޗްޕީއޭއިން ހުއްދަ ދީފައިވަނީ އަމަލުކުރަންޖެހޭ ގައިޑް ލައިނެއް އެކުލަވާލުމަށްފަހު އެވެ.
މިގައިޑްލައިނާ އެއްގޮތަށް އަމަލުނުކުރާނަމަ ކޮވިޑު ފެތުރިގެން ގޮސް އެކަމުގެ ނޭދެވޭ އަސަރު މުޅި ރާއްޖެއަށް ކުރާނެ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން މީގެކުރިން ވަނީ ބުނެފައެވެ.
އަނެއްކޮޅުން ކޮވިޑް-19 ގެ ސަބަބުން ރާއްޖޭގެ ބޯޑަރު ބަންދުކުރުމަށް ފަހު އަލުން ހުޅުވި ފަހުން ރާއްޖެ އައި ޓޫރިސްޓުންގެ ތެރެއިން މި މަހު ހަތަރަކާ ހަމައަށް ކޮވިޑަށް ޕޮޒިޓިވްވީ 122 މީހުން ކަމަށް ޓޫރިޒަމްގެ ތަފާސްހިސާބުތަކުން ވަނީ ދައްކާފައެވެ.
