ރިސޯޓުތަކާއި ފަތުރުވެރިންގެ ފެސިލިޓީތަކުން ރެންޑަމް ސާމްޕަލް ނަގަނީ
6 ނޮވެމްބަރު 2020 | ހުކުރު 14:03ފަތުރުވެރިކަން ކުރިއަށް ގެންދިއުމުގައި އެންމެންގެ ސަލާމަތާއި ރައްކާތެރިކަން މުހިންމު
ޓޫރިޒަމް މިނިސްޓަރު ޑރ. އަބްދުﷲ މައުސޫމް
ރިސޯޓުތަކާއި އެހެނިހެން ފަތުރުވެރި ފެސިލިޓީތަކުގައި މަސައްކަތްކުރާ މުވައްޒަފުން ކޮވިޑް-19 އަށް ޓެސްޓް ކުރުމަށް ރެންޑަމް ސާމްޕަލް ނެގުމަށް ހަމަޖެހިފައިވާ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މިކަން ހާމަކޮށް މިނިސްޓަރު މައުސޫމް ކުރެއްވި ޓްވީޓެއްގައި ވިދާޅުވެފައިވަނީ ފަތުރުވެރިކަން ކުރިއަށް ގެންދިއުމުގައި އެންމެންގެ ސަލާމަތާއި ރައްކާތެރިކަން މުހިންމު ކަމަށެވެ.
ރާއްޖޭގެ ފަތުރުވެރިންނަށް ހިދުމަތް ދެމުންދާ ބައެއް ރިސޯޓުތަކުގައި ކޮވިޑް-19 ފެތުރެމުންދާ މި ހާލަތުގައި، އެ ތަންތަނުގައި މަސައްކަތްކުރާ މުވައްޒަފުންގެ ރައްކާތެރިކަން ކަށަވަރުކުރުމަށް ޓޫރިޒަމް މިނިސްޓްރީން ދަނީ ހެލްތް ޕްރޮޓެކްޝަން އޭޖެންސީ (އެޗްޕީއޭ) އާއި ގުޅިގެން މަސައްކަތް ކުރަމުންނެވެ.
ރާއްޖެއެމްވީ އަށް މައުލޫމާތު ދެއްވަމުން ޓޫރިޒަމް މިނިސްޓަރު މައުސޫމް ވިދާޅުވީ، ކޮވިޑާ ގުޅިގެން ސަރުކާރާއި އެޗްޕީއޭ އާއި މިނިސްޓްރީން ރިސޯޓުތަކުގައި މަސައްކަތްކުރާ މުވައްޒަފުންގެ ރެންޑަމް ސާމްޕަލް ނެގުމުގެ މަޝްވަރާތައް ކުރިއަށް ގެންގޮސްފައިވާ ކަމަށާއި އެކަމަށް ވާންޖެހޭ އެންމެހާ ތައްޔާރީތައް މިހާރު ވެފައިވާ ކަމަށެވެ.
މިނިސްޓަރު ވިދާޅުވީ، ސާމްޕަލް ނެގުމުގައި ކުރިއާލާ ރިސޯޓުތަކަށް އަންގަމުންދާނެ ކަމަށާއި، އަދި އެންމެ ބޮޑު އިސްކަމެއް ދެމުންދާނީ އެ ރިސޯޓެއްގައި ފަތުރުވެރިންނާ އެންމެ ގާތުން މަސައްކަތްކުރާ މުވައްޒަފުންގެ ސާމްޕަލްތައް ނެގުމަށް ކަމަށެވެ.
މިނިސްޓަރު މިިގޮތަށް ވިދާޅުވިއިރު، ރާއްޖޭގެ 30 ރިސޯޓެއްގައި ކޮވިޑް-19 ޖެހިފައިވާ މީހުން ތިބި ކަަމަށް އެޗްޕީއޭގެ ތަފާސް ހިސާބުތަކުން ދައްކައެވެ. އޭގެ ތެރޭގައި ހިމެނެނީ 52 ފަތުރުވެރިއަކާއި، ރިސޯޓުތަކުގައި މަސައްކަތްކުރާ 120 މުވައްޒަފަކެވެ.
މީގެ އިތުރުން ގެސްޓް ހައުސްތައް އަލުން ހުޅުވާލި ފަހުން، ބައެއް ގެސްޓް ހައުސް ތަކުން ފަތުރުވެރިން ކޮވިޑް-19 އަށް ޕޮޒިޓިވް ވުމާއި ގުޅިގެން އެޗްޕީއޭއިން ވަނީ ރިޕޯޓް ކޮށްފައެވެ.
