އިންތިހާބާއެކު އެމެރިކާގައި ކޮވިޑް ޖެހުނު މީހުންގެ އަދަދު ރެކޯޑު އަދަދަކަށް

ރިޔާސީ އިންތިހާބާއެކު އެމެރިކާގައި ކޮވިޑް ޖެހުނު މީހުންގެ އަދަދު ރެކޯޑު އަދަދަކަށް ރިޕޯޓު ކޮށްފިއެވެ.

އެމެރިކާގައި މިހާރު ހިނގަމުން ދާ ރިޔާސީ އިންތިހާބުގައި 141 މިލިއަން މީހުން މިހާތަަށް ވޯޓު ލާފައި ވާއިރު އެގައުމުގައި ބުރާސްފަތި ދުވަހު ވަނީ ރެކޯޑު އަދަދަކަށް ކޮވިޑް-19 ގެ ކޭސްތަކެއް ރިޕޯޓު ކޮށްފައެވެ.

އެގޮތުން ބުރާސްފަތި ދުވަހު އެމެރިކާ އިން 118،000 ކޮވިޑްގެެ ކޭސް ރިޕޯޓު ކޮށްފައިވާއިރު މިއީ މިހާތަނަށް އެގައުމުގައި އެއް ދުވަސް ތެރޭގައި އެންމެ ގިނަ އަދަދަކަށް މީހުންނަށް މި ބަލި ޖެހުނު ދުވަހެ އެވެ. އަދި މިއީ އެގައުމުގައި ކޮވިޑް-19 އަށް ޕޮޒިޓިވް ވި މީހުންގެ އަދަދު އެއް ލައްކަ އަށް ވުރެ މައްޗަށް އެރި ދެވަނަ ދުވަހެެވެ.

އެމެރިކާއަކީ އެންމެ ގިނަ އަދަދަކަށް މުޅި ދުނިޔެއިން ވެސް ކޮވިޑް-19 އަށް މީހުން ޕޮޒިޓިވްވި ކަމަށް ރިޕޯޓު ކުރެވިފައިވާ ގައުމަށް ވީއިރު އެގައުމަކީ 24 ގަޑީއިރުގެ ތެރޭގައި ކޮވިޑް ޖެހުނު މީހުންގެ އަދަދު 1 ލައްކައަށް އެރި ފުރަތަމަ ގައުމެ އެވެ.

އެގޮތުން ފާއިތުވި ހޮނިހިރު ދުވަހުގައި އެގައުމުގައި ކޮވިޑް ޖެހުނު މީހުންގެ އަދަދު ވަނީ 100،233 އަށް އަރާފައެވެ. އެމެރިކާގެ ސިއްހީ މާހިރުން މި ބައްޔަށް އެގައުމުގައި ދުވާލެއްގެ މައްޗަށް އެއް ލައްކަ އަށް ވުރެ ގިނަ މީހުން ޕޮޒިިޓިވް ވާނެ ކަމަށް ލަފާކޮށްފައި ވީނަމަވެސް މިއަދަދަށް މީހުން ޕޮޒިޓިވްފެވައި މި ވަނީ ސިއްހީ މާހިރުން ލަފާ ކުރި ތާރީހަށް ވުރެ މާ އަވަހަށް ކަމަށް އެގައުމުން ދަނީ ބުނަމުންނެވެ.

މިހާތަނަށް އެމެރިކާއިން މި ބަލި ޖެހުނު މީހުންގެ އަދަދު 9.6 މިލިއަނަށް މިވަނީ އަރާފައެވެ. އަދި އެގައުމުން ކޮވިޑް-19 ގެ ސަބަބުން 234،000 އަށް ވުރެ ގިނަ މީހުން ވަނީ މަރުވެފައެވެ.