އެޑިއުކޭޝަން މިނިސްޓަރގެ އިލްތިމާސަކީ ސްކޫލް މުޖުތަމައު އަކީ ކާރިސާތަކަށް ތައްޔާރުވެތިބި، ބާރުވެރި ބަޔަކަށްވުން
5 ނޮވެމްބަރު 2020 | ބުރާސްފަތި 16:53މި ފަދަ ކާރިސާތަކަށް ހޭލުންތެރިވެ، ތައްޔާރުވެތިބުމުގެ މުހިއްމުކަމުގެ މައްޗަށް ވާހަކަދެއްކެވި
އެޑިއުކޭޝަން މިނިސްޓަރ އައިޝަތު އަލީ
ސުނާމީ ފަދަ ކާރިސާތަކަށް ސްކޫލް މުޖުތަމައު ތައްޔާރުވެ, ބާރުވެރި ބަޔަކަށް ވުމަށް އެޑިއުކޭޝަން މިނިސްޓަރ އައިޝަތު އަލީ އިލްތިމާސްކުރައްވާއިފިއެވެ.
ބައިނަލްއަޤްވާމީ ގޮތުން ފާހަގަކުރާ ސުނާމީއަށް ހޭލުންތެރި ކުރުމުގެ ދުވަހުގެ މުނާސަބާގައި، އެޑިއުކޭޝަން މިނިސްޓަރ ދެއްވި ހިތާބުގައި ވަނީ މިފަދަ ކާރިސާތަކަށް ހޭލުންތެރިވެ، ތައްޔާރުވެތިބުމުގެ މުހިއްމުކަމުގެ މައްޗަށް ވާހަކަދައްކަވާފައެވެ. އެގޮތުން މިފަދަ ދުވަހެއް ރާއްޖޭގައި ފާހަގަކުރާ ސަބަބުތަކަށް އަލިއަޅުއްވާލައްވާ މިނިސްޓަރ ވިދާޅުވީ އެއީ ދުރާލާ ތައްޔާރުވުމަށް ހެލުންތެރިކުރުވުން ކަމަށާއި މިފަދަ ހާލަތަކަށް ތައްޔާރުވުމުގެ ގާބިލުކަން އިތުރުކުރުމާއި އެފަދަ ހާލަތެއްގައި ސްކޫލް ފެންވަރުގައި މިފަދަ ކަންކަމަށް ހުރި ޕްލޭންތަކާއި ވަސީލަތްތައް ތަރައްގީކޮށް، ބެލެނިވެރިންނާއި ދަރިވަރުންގެ އިތުރުން މުވައްޒަފުންވެސް ހޭލުންތެރިކުރުވުން ވަރަށް މުހިއްމު ކަމަށެވެ.
މީގެއިތުރުން، ރާއްޖޭގެ އާބާދީގެ ބޮޑު ބައެއް ހިއްސާކުރާ ކުޑަކުދިންނާއި، ޒުވާނުންނަކީ ސުނާމީއަށް ހެލުންތެރި ބަޔަކަށް ހެދުމާއި މުޖުތަމައުގެ ކާރިސީ ހިރާސް ކުޑަކުރުމާއި ސްކޫލްތަކުގެ ހޭލުންތެރިކަމާއި ވިލުންވެރިކަން އިތުރުކުރުން ވެސް މި ދުވަސް ފާހަގަކުރުމުގެ މަގްސަދުތަކުގެ ތެރޭގައި ހިމެނެއެވެ.
ރާއްޖޭގެ ސްކޫލްތަކަކީ ސުނާމީ ފަދަ ކާރިސާތަކުގައި ރައްކާތެރި ތަންތަނުގެ ގޮތުގައި ހެދުމަކީ މުހިއްމު ކަމެއް ކަން ފާހަގަކުރައްވާ މިނިސްޓަރ ވިދާޅުވީ އެއީ މިފަދަ ކާރިސާތަކުގެ މައުލޫމާތު އެންމެ ފުރަތަމަ ފޯރުކޮށްދޭ ތަންތަނަކީ ސްކޫލްތައް ކަމަށް ވާތީ ކަމަށެވެ. އަދި މިފަދަ ކާރިސާތަކުގެ މައުލޫމާތު ސްކޫލްތަކުގެ ޒަރިއްޔާއިން ދެވިގެންދާއިރު ސްކޫލްތަކުގެ ވިލުންވެރިކަން އިތުރުކުރުމަށް ގިނަ މަސައްކަތް ތަކެއް ކުރެވެމުންދާ ކަމަށް މިނިސްޓަރ ވިދާޅުވިއެވެ.
އޭގެތެރޭގައި ސްކޫލްތަކުގެ އިމަރޖެންސީ އޮޕަރޭޝަން ޕްލޭންތައް ރާއްޖޭގެ ހުރިހާ ސްކޫލްތަކެއްގައި އެކުލަވާލާ ތަންފީޒުކުރުމާއި ފަޔަރ ޑްރިލްއާއި އިވެކިއޭޝަން ޑްރިލްތައް ކުރިއަށްގެންދާކަން މިނިސްޓަރގެ ހިތާބުގައިި ފާހަގަކުރެއްވިއެވެ. މީގެއިތުރުން، ކާރިސާތަކުން ލިބޭ ގެއްލުންތައް ކުޑަކުރުމުގެ މަފްހޫމް ކަރިކިއުލަމްގައި ހިމަނާ، އެންޑިއެމްއޭ އާއި ގުޅިގެން ތަމްރީންތައް ދެވެމުންދާ ކަމަށް ވިދާޅުވިއެވެ.
