ސިދުރަތުﷲ ގެ ކަށުނަމާދު މިރޭ އިޝާއަށް ފަހު، އާ ސަހަރާގައި
އޭނާ މަރުވިއިރު އުމުރުން 31 އަހަރު
ސިދުރަތުﷲ ރަސްފަންނު މޫދާ ދިމާލަށް ދަނިކޮށް އާންމުކޮށްފައިވާ ވީޑިއޯއިން ނަގާފައިވާ ސްކްރީން ޝޮޓެއް
ހުސްވި އޮކްޓޫބަރު މަހުގެ 23 ވަނަ ދުވަހު، އައިޖީއެމް ހޮސްޕިޓަލާ ދިމާލު މޫދުގައި މަރުވެފައި އޮއްވައި، ފެނުނު ގދ. ވާދޫ، ރިމެމްބަރކަދާވަޑު، އުމުރުން 31 އަހަރުގެ މުހައްމަދު ސިދުރަތުﷲ ގެ ކަށު ނަމާދު ބުރާސްފަތި ދުވަހުގެރޭ އިޝާ ނަމާދަށް ފަހު އާސަހަރާ މިސްކިތުގައި ކުރުމަށް ނިންމައިފިއެވެ.
ސިދުރަތުﷲ އަހްމަދުގެ ހަށިގަނޑު ޕޯސްޓް މޯޓަމް ހަދަން އިންޑިއާއަށް ފުރުވާލީ މިހިނގާ ނޮވެމްބަރު މަހުގެ 2 ވަނަ ދުވަހުއެވެ. ޕޯސްޓްމޯޓަމް އަށް ފަހު އޭނާގެ ހަށިގަނޑު ވަޅުލުމަށް ނިންމާފައިވާއިރު، އޭނާގެ ޕޯސްޓްމޯޓަމްގެ ނަތީޖާ އާ ގުޅޭގޮތުން ފުލުހުން އަދި އެއްޗެއް ބުނެފައެއް ނުވެއެވެ.
އެކަމާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން ފުލުހުންގެ މީޑީއާ އޮފިޝަލު ވިދާޅުވީ، ސިދުރަތުﷲ ގެ ހަށިގަނޑު މާލެ ގެނައީ ބުރާސްފަތި ދުވަހުގެ ވަގުތެއްގައި ކަމަށާއި، ޕޯސްޓްމޯޓަމްއާ ގުޅޭ މައުލޫމާތު މިވަގުތު ހިއްސާ ކުރެވެން ނެތް ކަމަށެވެ.
އޭރު ޕޯސްޓްމޯޓަމް ހެދެން ދެން ސިދުރަތުﷲ ގެ ހަށިގަނޑު ބާއްވައިފައި އޮތީ، ގަލޮޅު ސަހަރާގެ މޯޗަރީގައެވެ.
ސިދުތަރުﷲ ގެ މަރާ ގުޅިގެން އޭނާގެ ހަށިގަނޑު ޕޯސްޓްމޯޓަމް ހަދަން ފުލުހުން ނިންމީ އެއީ ގުދުރަތީ މަރެއްކަން ކަށަވަރު ނުކުރެވޭތީއެވެ. މަރުވެފައި އޮއްވައި ފެނުނު ސިދުރަތުﷲ ގެ ހަށިގަނޑުގައި ޒަހަމްތަކެއް ހުރިކަމަށް އާއިލާއިންވެސް ފާހަގަކޮށްފައިވާއިރު އާއިލާއިންވެސް ތުހުމަތު ކުރަނީ، ސިދުރަތުﷲ މަރާލާފައިވާ ކަމަށެވެ.
ފުލުހުންގެ އިދާރާއިން ވަނީ، މި މަހުގެ 22 ވަނަ ދުވަހުގެ ހެނދުނު، 9:00 އާއި 10:00 އާއި ދެމެދު ސިދުރަތުﷲ ރަސްފަންނާއި ދިމާއަށް މޫދަށް އެރެން ދާ މަންޒަރު ފެންނަ ސީސީޓީވީ ފުޓޭޖުވެސް އާއްމުކޮށްފައެވެ.
