ވޭލްސްގެ ސްކޮޑުގައި ބޭލް ހިމަނައިފި

މި މަހު ވޭލްސްއިން ކުޅެން ތާވަލުކޮށްފައި އޮތް ތިން މެޗަށް އެކުލަވާލި ސްކޮޑުގައި ޓޮޓެންހަމް ހޮޓްސްޕާއަށް ކުޅެމުން އަންނަ ފޯވާޑް ގެރެތު ބޭލް ހިމަނައިފިއެވެ.

ބޭލްގެ ކަކުލަށް މީގެ ކުރިން އަނިޔާވެފައިވަނީ މިދިޔަ ސެޕްޓެމްބަރު މަހު ކުޅުނު ޔުއެފާ ނޭޝަންސް ލީގުގެ މެޗުތަކަށް ތައްޔާރުވުމަށް ވޭލްސްއާއެކު ފަރިތަކުރަމުން ދަނިކޮށެވެ. އޭގެ ފަހުން ވޭލްސްއިން ކުޅުނު ތިން މެޗުގައިވެސް ބޭލް ހިމަނާފައެއް ނުވެއެވެ.

ރެއާލް މެޑްރިޑުގެ ލޯނު އެއްބަސްވުމެއްގެ ދަށުން ބޭލް މި ނިމުނު ޓްރާންސްފާގައި ޓޮޓެންހަމާ ގުޅުނުއިރު، އޭރުވެސް އޭނާ ހުރީ އަނިޔާގައެވެ. އެ އަނިޔާއިން ރަނގަޅުވެ މިދިޔަ އޮކްޓޯބަރު މަހުގެ ފަހުކޮޅު ބޭލް ވަނީ އެނބުރި ކުޅުމުގެ ތެރެއަށް އައިސްފައެވެ. އަދި އިނގިރޭސި ޕްރިމިއާ ލީގުގައި މިދިޔަ އާދީއްތަ ދުވަހުގެރޭ ބްރައިޓަން އަތުން 2-1 ން ޓޮޓެންހަމް މޮޅުވީ ބޭލް ކާމިޔާބުކުރި ލަނޑުންނެވެ.

ވޭލްސްގެ ސްކޮޑުގައި ބޭލް ހިމެނިއިރު، މި މަހު ވޭލްސްއިން ތިން މެޗެއް ކުޅޭނެއެވެ. އެގޮތުން މި މަހު 12 ވަނަ ދުވަހު ބައިނަލްއަގުވާމީ އެކުވެރިކަމުގެ މެޗެއްގައި އެމެރިކާއާ ދެކޮޅަށް ވޭލްސް ނުކުންނާނެއެވެ. އަދި އޭގެ ފަހުން ޔުއެފާ ނޭޝަންސް ލީގުގައި އަޔަލެންޑާއި ފިންލެންޑާ ދެކޮޅަށްވެސް ވޭލްސް ނުކުންނާނެއެވެ.

މި ތިން މެޗާ ކުރިމަތިލާއިރު، ގެވެށި އަނިޔާގެ މައްސަލައެއްގެ ތުހުމަތުގައި ފުލުހުން ސުވާލުކުރަމުންދާތީ ވޭލްސްގެ ކޯޗުގެ މަގާމުން ރަޔާން ގިގްސް ވަނީ އެކަހެރިކޮށްފައެވެ. ފުޓްބޯލް އެސޯސިއޭޝަން އޮފް ވޭލްސް (އެފްއޭޑަބްލިއު) އިން ނެރުނު ބަޔާނެއްގައި ބުނެފައިވަނީ މި މަހު ވޭލްސްއިން ކުޅެން ހަމަޖެހިފައި އޮތް ތިން މެޗުގައިވެސް ގިގްސް ޓީމަށް އިރުޝާދު ނުދޭނެ ކަމަށެވެ. އަދި އޭގެ ބަދަލުގައި ޓީމާ ވަގުތީ ގޮތުން ހަވާލުވާނީ އެސިސްޓަންޓް ކޯޗު ރޮބާޓް ޕޭޖް ކަމަށް މި ބަޔާނުގައި ވަނީ ބުނެފައެވެ.

ގިގްސް އޭނާގެ ލޯބިވެރިޔާއަށް ހަމަލާ ދިނުމުގެ މައްސަލައެއް ބަލަމުން އަންނައިރު، މި މައްސަލަ ގިގްސްގެ މައްޗަށް ސާބިތުވެއްޖެނަމަ، އޭނާއަށް ވޭލްސްގެ ކޯޗުކަން ގެއްލޭނެއެވެ. އެކަމަކު އެއީ އަސްލެއް ނެތް ތުހުމަތުތަކެއް ކަމަށް ބުނެ ގިގްސް ވަނީ އެ ތުހުމަތުތަކަށް އިންކާރުކޮށްފައެވެ.

ވޭލްސްގެ ކޯޗުކަމަށް މެންޗެސްޓާ ޔުނައިޓެޑުގެ ލެޖެންޑް ގިގްސް ހަމަޖައްސާފައިވަނީ 2018 ވަނަ އަހަރުއެވެ. ޔުނައިޓެޑަށް 700 އަށް ވުރެން ގިނަ މެޗު ކުޅެދީފައިވާ ގިގްސް މީގެ ކުރިން އެ ޓީމަށްވެސް އިރުޝާދު ދީފައިވާއިރު، އޭނާގެ އިރުޝާދުގެ ދަށުން ވޭލްސްއިން މިހާތަނަށް ވަނީ 24 މެޗު ކުޅެފައެވެ. އޭގެ ތެރެއިން 12 މެޗުން ވޭލްސް މޮޅުވެފައިވާއިރު، އަށް މެޗުން ވަނީ ބަލިވެފައެވެ. އަނެއް ހަތަރު މެޗު ނިމުނީ އެއްވަރުވެގެންނެވެ.