އެމްސީ އަކީ މިލްކް ކްރެބް، އެއީ ސްކޫލް ދައުރުގައި ކީ ވަނަމެއް: ސީޕީ ހަމީދު

އެމްސީ އަކީ މިލްކް ކްރެބް ކަމަށާއި، އެއީ މަޖީދިއްޔާ ސްކޫލުގައި ތައުލީމް ހާސިލްކުރެއްވި އިރު ކްލާސް ކުދިން ދިން ވަނަމެއް ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމުގައި ވާހަކަ ދައްކަވަމުން ހަމީދު ވަނީ އެމްސީ (މިލްކް ކްރެބް) ކިޔުނު ގޮތް ހިއްސާކުރައާވަފައެވެ. އެގޮތުން ހަމީދު ވިދާޅުވީ މަޖީދިއްޔާ ސްކޫލުގެ ގްރޭޑް 9 ގައި އުޅެމުން އައި އިރު ކްލާހުގައި ހިމެނޭ އެންމެންނަށް ވަނަމެއް ދިނުން އޮންނަ ކަމަށެވެ. އަދި އެއިރުވެސް ހަމުގެ ކުލަ ތަންކޮޅެއް ދޮންވެފައި ކުޑަކޮށް ހުންނާތީ އަދި ފިޝަރީސް ސައިންސް އަކީ އޮޕްޝަނަލް މައްދާއެއްގެ ގޮތުގައި ކިޔަވަމުން އައި މާއްދާއަކަށްވެފައި ކުރިއަށް ގެންދިޔަ ފިލާވަޅެއްގެ ތެރެއިން ނަން ދެވުނު ކަމަށެވެ.

ހަމީދު ވިދާޅުވީ ރަށްޓެހިން ވެސް އަދި ވަޒީފާގެ ދާއިރާ ތެރޭގައި އެންމެން ވެސް ދަންނަނީ އެ ނަމުން ކަމަށާއި، އޭގެ ތެރެއިން އެންމެނަން ފަރިތަވެގެން އައިސް އަދިވެސް ކިޔަނީ އެ ނަން ކަމަށެވެ.

ސްކޫލް ހަޔާތާއި ގުޅޭގޮތުން ހަމީދު ވިދާޅުވީ އުމުރުން އެއް އަހަރުގައި މާލެއަށް ކިޔަވަން އައިންސުރެ އުޅެމުން އައީ ބޮޑު ދައިތައެއް ކައިރީގައި މައިންބަފައިންނާއި ވަކިން ކަމަށާއި، ގާތްގަނޑަކަށް އުމުރުން 11 ނުވަތަ 12 އަހަރު ވަންދެން ހުރީ ބޮޑު ދައިތައާއި އެކީގައި ކަމަށެވެ. އަދި އެލްކޭޖީ ޔޫކޭޖީން ފަށައިގެން ގްރޭޑް 4 ހަމައަށް އުޅުނީ އިސްކަންދަރު ސްކޫލުގައި ކަމަށާއި، ފަހުން މަޖީދިއްޔާ އަށް ބަދަލުވި ކަމަށެވެ. އަދި ސްކޫލް ދައުރުގެ ވަރަށް އެހެންކަހަލަ ހަނދާންތައް ހުންނަ ކަމަށެވެ.

ހަމީދު ވިދާޅުވީ އޭނާއާއި އެކު އެއިރު އެއްކްލާހެއްގައި ކިޔަވަން އުޅުނު ފަރާތްތައް އިސް މަގާމުތަކުގައި މިހާރު އެބަތިބި ކަމަށެވެ. އަދި ހާއްސަކޮށް މި ފަހަކަށް އައިސް ސްޕްރީމް ކޯޓުގެ އެއް ފަނޑިޔާރެއްގެ ގޮތުގައި މަސައްކަތް ކުރައްވަމުން ގެންދަވާ އައިޝާ ޝުޖޫންއާއި ކުރީގެ އެޓަރނީ ޖެނެރަލް އަނިލް އަދި ޕަބްލިކް ބޭފުޅުން އެބަ އުޅުއްވާ ކަމަށެވެ.