ދައުލަތުން ހުށަހެޅި ހެކި ހާޒިރު ނުކުރެވިގެން އަނަސްގެ މަރުގެ ޝަރީއަތް ކެންސަލް
މިއަދުގެ އަޑުއެހުން ކެންސަލް ކުރީ ދައުލަތުން ހުށަހެޅި ހެކި ހާޒިރު ނުކުރެވިގެން
ވަޅިން ހަމަލާދީ މަރާލާވިފައިވާ ރ. މީދޫ ފެންފިޔާޒުގޭ މުޙައްމަދު އަނަސް
ރ. މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގައި ދައުވާ ސާބިތު ކުރުމަށް ދައުލަތުން ހުށަހަޅާފައިވާ ހެކި ޝަރީއަތުގެ އަޑުއެހުމަށް ހާޒިރު ނުކުރެވުމުން، ބުރާސްފަތި ދުވަހަށް ތާވަލް ކުރި އަޑުއެހުން ކެންސަލް ކޮށްފިއެވެ.
އަނަސްގެ މަރުގެ މައްސަލިގައި މިހާރު ކުރިއަށް ދަނީ ހެކިބަސް ނެގުމުގެ މަރުހަލާއެވެ.
އަނަސްގެ މަރުގެ މައްސަލައިގައި މިދިޔަ އޮކްޓޯބަރު މަހުގެ 19 ވަނަ ދުވަހު ބޭއްވި އަޑުއެހުމުގައި ވަނީ އަނަސް އޭޑީކޭއަށް ގެންދިޔައިރު ޑޮކްޓަރެއްގެ ހައިސިއްޔަތުން ހަށިގަނޑަށް އެޓެންޑްވި ޑޮކްޓަރު އަދި މި މައްސަލައިގެ އެކްސްޕާރޓް އޮޕީނިއަންއެއް ހޯދުމަށް ޑރ. އިބްރާހިމް މޫމިންގެ ހެކިބަސް ނަގާފައެވެ.
އެ އަޑުއެހުމުގައި ކުރި ސުވާލުތަކަށް ޖަވާބު ދެއްވަމުން ޑރ އިބްރާޙިމް ވިދާޅުވެފައި ވަނީ، ޙާދިސާ ހިނގިއިރު ވެސް އަދި މިހާރު ވެސް މަސައްކަތް ކުރައްވަމުން ގެންދަވަނީ އޭޑީކޭގައި އޮޕަރޭޝަންސް ޑޮކްޓަރެއްގެ ގޮތުގައި ކަމަށެވެ. އަދި އަނަސްގެ ހަށިގަނޑަށް އެޓެންޑް ވީއިރު، އީއާރް ޑޮކްޓަރުން ބަލި މީހާ ރަނގަޅު ކުރެވޭތޯ މަސައްކަތް ކުރަމުން ދިޔަ ކަމަށާއި، އޭރު އެއްވެސް ވިންދު އަދި ޙަރަކާތް ވެސް ނެތް ކަމަށެވެ. އަދި އޭރު ހަށިގަނޑުގެ އެކި ތަންތަނުގައި ބޮޑެތި ޒަޙަމްތައް ފެންނަން ހުރި ކަމަށާއި، މެޑިކޯ ލީގަލް ރިޕޯޓުގައި އެކަމުގެ ތަފްސީލުތައް ހިމަނާފައިވާނެކަން ޑޮކްޓަރު ފާހަގަ ކުރެއްވިއެވެ.
ޑޮކްޓަރު އިތުރަށް ވިދާޅުވެފައިވަނީ، އެންމެ ފުރާނައަށް ނުރައްކާވާ ގޮތަށް ހުރި ޒަޙަމްތަކަކީ ކަރާއި، މޭމައްޗަށް ދީފައިވާ އަނިޔާގެ ޒަޙަމްތައް ކަމަށެވެ. އަދި އޭގެ އިތުރުން ވެސް 24 ވަރަކަށް ޒަޙަމް ފެންނަން ހުރި ކަމަށާއި، މި ޒަޙަމްތަކަކީ ވަގުތުން މީހާ މަރުވާ ޒާތުގެ ޒަޙަމްތަކެއްކަން ޑޮކްޓަރ ފާހަގަ ކުރެއްވިއެވެ.
ދައުލަތުން ކުރި ސުވާލުތަކާ ގުޅިގެން ހެކިބަސް ދެއްވަމުން ޑޮކްޓަރ އިތުރަށް ވިދާޅުވެފައިވަނީ، އަނަސް މަރުވެފައިވަނީ ލިބުނު އަނިޔާތަކުގެ ސަބަބުން ހަށިގަނޑުން ލޭމަދުވެ. އެކަމުގެ ނަތީޖާއެއްގެ ގޮތުން ކަމަށެވެ.
މި މައްސަލައިގައި ދިފާއުން ކުރި ސުވާލުތަކަށް ޖަވާބު ދެއްވަމުން ޑޮކްޓަރ ވިދާޅުވެފައި ވަނީ، އަނަސްގެ ހަށިގަނޑު ހޮސްޕިޓަލަށް ގެނައި އިރުވެސް އޭނާ އޮތީ މަރުވެފައި ކަމަށާއި، ގެނައި އިރުވެސް ހަށިގަނޑުގެ އެއްވެސް ހަރަކާތެއް ނެތް ކަމަށެވެ. އަދި ބައެއް ޒަޙަމްތަކަށް ބަލާއިރު ފުއްޕާމެއަށް ވެސް ޒަޙަމްގެ އަސަރުތައް ކޮށްފައިވާ ކަމަށް ވިދާޅުވިއެވެ.
ޑޮކްޓަރ އިތުރަށް ވިދާޅުވެފައިވަނީ، ލިބިފައިވާ ތަޖުރިބާގެ އަލީގައި ވިދާޅުވާނަމަ، އަނަސް މަރުވި ކަމަށް ބެލެވެނީ ލިބިފައިވާ ޒަޙަމްތަކާއި އަނިޔާގެ ސަބަބުން ކަމަށެވެ.
މި މައްސަލައިގައި އަނަސްއަށް ޙަމަލާ ދިނުމުގައި ޢަމަލީ ގޮތުން ބައިވެރިވި ކަމުގެ ދަޢުވާ ލިބޭ 3 މީހުންނަކީ ޅ. ކުރެންދޫ އަސުރުމާގޭ އަޙްމަދު ޒަޔާނާއި، މ. ދިމިޝްގު، އުސްމާން ޝަރީފް އަދި މ. ލޮނުމިދިލިގޭ އަފްރާހު އަބްދުއްރައްޒާޤުއެވެ.
އޭގެ އިތުރުން، ތޫނު އެއްޗެއް ބޭނުން ކޮށްގެން ޤަސްތުގައި މީހަކު މެރުމުގައި ބައިވެރިވުމުގެ ދަޢުވާ އުފުލާފައިވަނީ 4 މީހެއްގެ މައްޗަށެވެ. އެއީ، ލ. ގަން ތުނޑީ ނަންނާރިގޭ، ޖުނައިހު ޢަބްދުﷲ އާއި، ސ. ފޭދޫ ވެސްޓަންވިލާ ހަސަން މަހްފޫޒާއި، ތ. ކިނބިދޫ ގުލްފާމުގޭ، މުޙައްމަދު ޝާޒާއި، ދަފްތަރު ނަންބަރު 1746، ސިމާހް މޫސާ އެވެ.
އަނަސް މަރާލުމުގެ ހާދިސާ:
އަނަސް މަރާލާފައިވަނީ، 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭ ލިޓަސް ގަރާޖް ތެރޭ ވަޅިން ހަމަލާދީގެން ނެވެ. ފުލުހުން ބުނެފައިވަނީ އަނަސް މަރާލީ އެހެން ބަޔަކަށް ދޭން ރާވައިގެން ދިޔަ ހަމަލާއެއްގައި އޮޅިގެން ކަމަށެވެ.
ފުލުހުން އެހެން ބުނެފައި އެވަނީ، އަނަސް މަރާލީ އޭނާ ލައިގެން ހުރި ޓީޝާޓްގެ ސަބަބުން ކަމަށާއި އެއީ އޮޅިގެން ދިން ހަމަލާއެއް ކަމަށް، އޭރު ވެރިކަމުގައި ހުންނެވި ކުރީގެ ރައީސް އަބްދުﷲ ޔާމީން ވެސް ވިދާޅުވެފައި ވަނިކޮށެވެ.
މީގެއިތުރުން ފުލުހުން ބުނެފައިވަނީ، އަނަސް މަރާލީ ދެ ގުރޫޕެއްގެ ދެމެދުގައި އުފެދިފައިވާ ރުޅިވެރިކަމެއްގެ ތެރޭގައި އެއްގުރޫޕަކަށް ނިސްބަތްވާ މީހުން ހަނދުވަރުދޭ ގޯޅި ތެރޭގައި ތިބިކަން އެނގިގެން އެ މީހުން މަރާލަން ރާވައިގެން އެތަނަށް ދިޔަ ވަގުތު އެތަނުގައި ހުރި ސައިކަލެއްގެ މަތީގައި އިނދެފައި އަނަސްއަށް އެމީހުން ފެނިގެން ބިރުން ދުވެފައި ލިޓަސް ތެރެއަށް ވަނުމުން އަނަސް އެއީ އެ ގުރޫޕަށް ނިސްބަތްވާ މީހެއް ކަމަށް ހީކޮށް އޮޅިގެން ކަމަށެވެ. އަދި 8 މީހަކު 4 ސައިކަލެއްގައި ދިޔައީ މީހަކު މަރާލުމަށް ވަޅި ހިފައިގެން ވަރަށް ހާމަކަން ބޮޑު ގޮތެއްގައި ކަމަށާއި އެމީހުން ދިޔައިރު އެމީހުން ހޯދަމުން ދިޔަ މީހުން އެ ސަރަހައްދުން ގޮސްފައިވާ ކަމަށެވެ.
ފުލުހުން ބުނެފައިވާ ގޮތުގައި، އަނަސްގެ ހަށިގަނޑުގެ 25 ތަނަކަށް ވަނީ ވަޅި ޖަހާފައެވެ. އަދި ލިބިފައިވާ ޒަހަމުތަކުގެ ސީރިއަސްކަމުން އަނަސް އެތަނުގެ ތެރޭގައި މަރުވެފައިވާ ކަމަށް ގަބޫލު ކުރެވޭ ކަމަށް ވެސް ފުލުހުން ބުންޏެވެ.
ފުލުހުން ބުނެފައިވަނީ، ޢާއްމުން އެއްވެ އަނަސް ވެއްޓިފައިވާ މަންޒަރު ބަލައި ފޮޓޯ ނަގާ ހެދިއިރުވެސް އެއްވެސް މީހަކު އޭނާ ހޮސްޕިޓަލަށް ގެންދިއުމަށް މަސައްކަތް ކޮށްފައި ނުވާ ކަމަށާއި ލިޓަސްގެ މުވައްޒަފުންތަކެއް އަނަސްގެ ގައިން ފައިބަމުން ދިޔަ ލޭ މަނާކުރެވޭތޯ ބަލަމުން ދިޔަ ކަމަށެވެ. އަދި އޭނާ އޭޑީކޭ ހޮސްޕިޓަލަށް ގެންދިޔައީ ފުލުހުން ކަމަށާއި ވަގުތުން ދެވެން ހުރި ފަރުވާ ޑޮކްޓަރުން ދިން ނަމަވެސް އޭރު އޭނާ މަރުވެފައިވާ ކަމަށް ޑޮކްޓަރުން ބުނެފައިވާ ކަމަށް ފުލުހުން ބުންޏެވެ.
ފުލުހުން ބުނެފައިވާ ގޮތުގައި، އަނަސް އަކީ އޭނާ މަރާލުމުގެ ދެ އަހަރެއްހާ ދުވަސް ކުރިން ލިޓަސްގައި މަސައްކަތް ކުރި މީހެކެވެ. އަދި ޖުލައި މަހުގެ 31 ވަނަ ދުވަހުގެ ރޭ އަނަސް ލިޓަސް ކައިރިއަށް ދިޔައީ ކުރިން އޭނާއާއެކު އެތަނުގައި އުޅުނު ރަހުމަތްތެރިންނާ ބައްދަލު ކުރުމަށް ކަމަށް ވެސް ފުލުހުން ބުނެފައި ވެއެވެ.
