ގޮންޖެހުންތަކާއެކު ވެސް އިންސާނީ ކަރާމާތަށް ގަދަރުކުރާ މުޖުތަމައެއް ބިނާކުރުމުގެ ކާމިޔާބު މަސައްކަތްތަކެއް ކުރެވޭ: އޭޖީ
5 ނޮވެމްބަރު 2020 | ބުރާސްފަތި 02:33އެއްގައުމުން އަނެއް ގައުމެއްގެ ކިބައިން ކަންކަން ދަސްކުރަން ލިބިގެންދާ ފުރުސަތު ބަލައިގަންނަނީ އުފަލާއެކު
އެޓާނީ ޖެނެރަލް އިބްރާހިމް ރިފްއަތު،
ގޮންޖެހުންތަކާއެކު ވެސް ރާއްޖޭގައި އެކަކު އަނެކަކަށް އިހުތިރާމްކުރާ އަދި އިންސާނީ ކަރާމާތަށް ގަދަރުކުރާ މުޖުތަމައެއް ބިނާކުރުމުގެ ކާމިޔާބު މަސައްކަތްތަކެއް ކުރެވެމުންދާ ކަމަށް އެޓަރނީ ޖެނެރަލް އިބްރާހިމް ރިފްއަތު ވިދާޅުވެއްޖެއެވެ.
ޔުނިވަރސަލް ޕީރިއޮޑިކް ރިވިއު (ޔޫޕީއާރު) ގެ ތިންވަނަ ސައިކަލްގައި ބުދަ ދުވަހުގެ ރޭ ތަގުރީރު ކުރައްވަމުން އޭޖީ ރިފްއަތު ވިދާޅުވީ، ނޮވެންބަރު 2018 ގައި، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރާއްޖޭގެ ވެރިކަމާ ހަވާލުވެވަޑައިގެންނެވީ، އިންސާނީ ހައްގުތައް ދިރުވުމާއި، ޑިމޮކްރަސީ ހަރުދަނާކުރުމާއި، މޫސުމީ ބަދަލުތަކާ ދެކޮޅަށް މަސައްކަތްކުރުމުގެ ވައުދައިގެން ކަމަށެވެ. މި ކަންކަން ފުރިހަމަކުރުމަށް ތަންފީޒުކުރަންޖެހޭ ސިޔާސަތުތައް ތަންފީޒުކުރުމުގައި ދިވެހި ސަރުކާރުން މަސައްކަތް ކުރަމުންދާ ކަމަށް ރިފްއަތު ވިދާޅުވިއެވެ.
ރިފްއަތު ވިދާޅުވީ ރާއްޖެއިން ބައިނަލްއަގުވާމީ މުޖުތަމައުއާ ގުޅުން ބަދަހިކުރަމުންދާ މި ދަނޑިވަޅުގައި ހިއްވަރާއި ސާބިތުކަމާއެކު، ގޮންޖެހުންތަކާ ކުރިމަތިލައި، ރާއްޖޭގައި ދިމިޤްރާތީ އުޞޫލުތައް އާލާކޮށް، އެކަކު އަނެކަކަށް އިޙްތިރާމްކުރާ އަދި އިންސާނީ ކަރާމާތަށް ގަދަރުކުރާ މުޖުތަމައެއް ބިނާކުރުމުގެ މަސައްކަތްތައް ކުރަމުންދާ ކަމަށެވެ.
ބައިނަލްއަގުވާމީ މުޖުތަމައުއާއި ރާއްޖެއާ ދެމެދު އޮންނަ ގުޅުމަށް އަލިއަޅުއްވާލައްވާ ރިފްއަތު ވިދާޅުވީ އެއްގައުމުން އަނެއް ގައުމެއްގެ ކިބައިން ކަންކަން ދަސްކުރަން ލިބިގެންދާ ފުރުސަތު ރާއްޖޭން ބަލައިގަންނަނީ އުފަލާއެކު ކަމަށާއި، ރާއްޖެއިން ކުރަމުން މިގެންދާ މަސައްކަތުގައި، އެކުވެރި ގައުމުތަކުން ބިނާކުރަނިވި ގޮތެއްގައި ރާއްޖެއަށް ދެމުންގެންދާ އެއްބާރުލުމާއި އެހީތެރިކަން ފާހަގަކުރާ ކަމަށެވެ.
މީގެ އިތުރުން ރިފްއަތު ވިދާޅުވީ ކުރިމަތިވެފައިވާ ކޮވިޑް-19 ބަލިމަޑުކަމުގެ ސަބަބުން ރާއްޖެއިން ހޯދަމުން އައި ކުރިއެރުންތަކަށް ކޮންމެވެސް މިންވަރަކަށް މަޑުޖެހިފައިވާ ކަމަށެވެ. އަދި ބަލި ފެތުރުން ކޮންޓްރޯލް ކުރުމަށް ފުރަބަންދުކުރުން ފަދަ މިހާތަނަށް ތަޖުރިބާކޮށްފައިނުވާ ފިޔަވަޅުތަކެއް އަޅަން ޖެހުނުކަމުގައިވީ ނަމަވެސް، އެ ފިޔަވަޅުތަކުގެ ސަބަބުން އިންސާނީ ހައްގުތަކަށް ކުރާ ނޭދެވޭ އަސަރު ވީހާވެސް ކުޑަކުރެވޭކަން ސަރުކާރުން ކަށަވަރުކުރި ކަމަށް ރިފްއަތު ވިދާޅުވިއެވެ.
އެގޮތުން، ދާދި ފަހުން ތަސްދީގުކުރެވުނު އާންމު ސިއްހަތުގެ ކުއްލި ނުރައްކަލުގެ ގާނޫނަށް އިޝާރާތް ކުރައްވާ ރިފްއަތު ވިދާޅުވީ މި ފަދަ ބަލިމަޑުކަމެއްގައި، ހާލުގައިޖެހޭ ފަރާތްތަކަށް، ޚާއްސަކޮށް އަންހެނުންނާއި، ކުޑަކުދިންނާއި، ޚާއްސަ އެހީއަށް ބޭނުންވާ މީހުންނާއި، ރާއްޖޭގައި އުޅޭ ބިދޭސީ މަސައްކަތްތެރިންނަށް ކާބޯތަކެއްޗާއި، ބޯ ހިޔާވަހިކަމާއި، މާލީ އެހީތެރިކަންފަދަ އެހީތައް ފޯރުކޮށްދޭންޖެހޭ ކަމަށެވެ.
ރާއްޖޭގައި ދިރިއުޅޭ ފަރާތްތަކަކީ ރައްކާތެރި އިންސާނީ ހައްގުތަކަށް އިޙްތިރާމްކުރާ މުޖުތަމައެއްގައި، މިނިވަންކަމާއި ގަދަރާއެކު ދިރިއުޅޭ ބައެއްކަން ކަށަވަރުކުރުމަށް ދިވެހި ސަރުކާރުން ވެފައިވާ ވައުދު ފުއްދުމުގައި، ސަރުކާރު ތިބީ ސާބިތުވެ ކަމަށް ރިފްއަތު ވިދާޅުވިއެވެ.
ރިފްއަތު ވިދާޅުވީ އިންސާފުވެރި އަދުލު އިންސާފުގެ ނިޒާމެއް ގާއިމްކުރުމަށާއި، އަދުލު އިންސާފުގެ ނިޒާމަށް ރައްޔިތުންގެ އިތުބާރު ހޯދުމަށްޓަކައި މިހާރުކުރަމުންދާ މަސައްކަތްތައް ކުރުމުގައި ދެމިތިބޭނެ ކަމަށެވެ. އަދި މި މަސައްކަތުގައި، ބައިނަލްއަގުވާމީ މުޖުތަމައުން ރާއްޖެއަށް ފުރިހަމައަށް އެއްބާރުލުން ލިބޭނެ ކަމުގެ ޔަގީންކަން ރިފްއަތު ދެއްވިއެވެ.
