ސައިބަރކްރައިމްއާ ގުޅޭ ގާނޫނެއް ނެތުމުން ފުލުހުންގެ މަސައްކަތަށް ބުރޫއަރާ: އިމްރާން

އިންޓަނެޓް މެދުވެރިކޮށް އަރައިގަންނަ ކުށްތަކުގައި ހެކި ހޯދުމަށް ގާނޫނީ އޮނިގަނޑެއް ނެތުމުން ފުލުހުންގެ މަސައްކަތަށް ބުރޫއަރާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

މިނިސްޓަރު އެހެން ވިދާޅުވީ، ޔުނިވަރސަލް ޕީރިއޮޑިކް ރިވިއު (ޔޫޕީއާރު) ގެ ތިންވަނަ ސައިކަލްގައި، ދިވެހިރާއްޖޭގެ ރިވިއު ސެޝަންގައި ވާހަކަ ދައްކަވަމުންނެވެ. އިމްރާންގެ ވާހަކަގައި މައިގަނޑު ގޮތެއްގައި އަލިއަޅުއްވައިލެއްވީ ރައީސް އިބްރާހިމް މުހައްމަދު ސޯލިހު ސަރުކާރާއި ހަވާލުވެވަޑައިގަތް ފަހުން ހޯމް މިނިސްޓްރީގެ މެންޑޭޓުގެ ތެރެއިން ސަރުކާރުން ހާސިލްކޮށްފައިވާ ކަންތައްތަކަށެވެ.

އެގޮތުން ފުލުހުންގެ މަސައްކަތަށް އަލިއަޅުއްވާލައި އިމްރާން ވިދާޅުވީ، ފުލުހުންގެ މުއައްސަސާ ދެމިއޮންނާނީ ވަކި އުމުރަކަށް، ވަކި ޖިންސަކަށް ނުވަތަ ވަކި ގައުމަކަށް ބެލުމެއްނެތި ހުރިހާ ރައްޔިތުންގެ ސަލާމަތާއި ރައްކާތެރިކަން ކަށަވަރު ކޮށްދިނުމަށްޓަކައި ކަމަށެވެ.

އާއްމު ފަރުދުންނަށް މުޖުތަމައުގެ ތެރެއިން ނުވަތަ އޮންލައިންކޮށް ވެސް ލިބެމުންދާ އިންޒާރުތަކަށް ފުލުހުން ވަރަށް ގާތުން ބަލަމުންދާ ކަމަށެވެ. ނަމަވެސް ވަކިން ހާއްސަކޮށް އޮންލައިންކޮށް ހިންގާ ކުށްތައް ތަހުގީގު ކުރުމުގައި ފުލުހުންނަށް ގޮންޖެހުންތައް ދިމާވާ ކަމަށް ވިދާޅުވިއެވެ.

ހެއްކާ ބެހޭ ގާނޫނުގެ އިތުރުން ސައިބަރކްރައިމް ގާނޫނާއެކު ފުލުހުންނަށް ދިމާވާ އެފަދަ ކަންތައްތަކަށް ހައްލެއް ލިބިގެންދާނެ މިނިސްޓަރު ވިދާޅުވިއެވެ. އެޓާނީ ޖެނެރަލްގެ އޮފީހުން ވަނީ މި ދެ ބިލް ވެސް މަޖިލީހަށް ފޮނުވާފައެވެ. ނަމަވެސް އެއިން އެއްވެސް ބިލެއް އަދި މިހާތަނަށް އެޖެންޑާކޮށްފައެއް ނުވެއެވެ.

އިމްރާން ވިދާޅުވި ގޮތުގައި، ފުލުހުންގެ ސްޓްރެޓެޖިކް ޕްލޭންއާ ގުޅުވައިގެން މިހާރު މަޖިލީހަށް ހުށައެޅިފައިވާ ފުލުހުންގެ ބިލާއެކު ފުލުހުންގެ މުއައްސަސާ މިހާރަށްވުރެ އިތުރަށް ހަރުދަނާވެ ރައްޔިތުންގެ ބައިވެރިވުން އިތުރުކޮށް ފުލުހުންގެ މުއައްސަސާ ސިޔާސީ ނުފޫޒުން އެއްކިބާވެގެން ދާނެ ކަމަށެވެ. ސަރުކާރުގެ ފަރާތުން ފުލުހުންގެ ބިލް މަޖިލީހަށް ހުށަހަޅާފައި ވަނީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފްއެވެ. އެ ބިލަށް އާއްމުންގެ ހިޔާލު ހޯދައި ބިލް އޮތީ ކޮމިޓީ މަރުހަލާގައެވެ.

މިނިސްޓަރު ވިދާޅުވީ، ބަސް ބުނުމުގެ މިނިވަންކަން ކަށަވަރު ކުރުމަށްޓަކައި މިނިވަން މީޑިއާއެއް އޮތުން އެއީ އެންމެ މުހިއްމު އެއްކަން ކަމަށެވެ. މިނިވަން ނޫސްވެރިކަމަށާއި، ނޫސްވެރިންނަށް ރަނގަޅު ގޮތް ހޯދައި ދިނުމަށް ރާއްޖެއިން އަބަދު ވެސް މަސައްކަތްކުރާނެ ކަމުގެ ޔަގީންކަން އިމްރާން ވަނީ ދެއްވާފައެވެ.