މަޝްރޫޢުތައް ކުރިއަށް ގެންދިއުމުގައި ވަކި ދާއިރާއެއް ތަފާތެއް ނުކުރަން: މިނިސްޓަރ
ފޮނަދޫ ދާއިރާގެ މެމްބަރ މޫސާ ސިރާޖު ވަނީ ހައުސިންގ މިނިސްޓަރާއި ސުވާލުކުރައްވާފައި
މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް
ޕީއެސްއައިޕީ މަޝްރޫޢުތައް ރަށްރަށުގައި ކުރިއަށް ގެންދާއިރު ވަކި ދާއިރާއެއް ޚާއްސަކޮށްގެން މަޝްރޫޢުތައް ކުރިއަށް ގެންދިއުމާއި މަޝްރޫޢުތައް އަވަސްކުރުމާއި ލަސްކުރުމުގައި އެއްވެސް ވަރަކަށް ނުފޫޒު ނުފޯރުވާކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވަޒީރުންނާއި ސުވާލުކުރުމުގެ އެޖެންޑާގެ ދަށުން ފޮނަދޫ ދާއިރާގެ މެމްބަރ މޫސާ ސިރާޖު ވަނީ ހައުސިންގ މިނިސްޓަރާއި ސުވާލުކުރައްވާފައެވެ. އެއީ ކޮވިޑް-19ގެ ސަބަބުން ޕްރޮޖެކްޓްތަކުގައި ސޮއިކުރުން މަޑުޖައްސާލާފައިވާއިރު 37 މިލިއަން ރުފިޔާ ޚަރަދުކުރާ ގޮތަށް އިސްކަމެއްދީގެން ބަޖެޓްގައި ހިމެނިފައިނުވާ ޕްރޮޖެކްޓެއްގައި ސޮއިކުރަން ޖެހުނު ސަބަބަކީ ކޮބައިތޯ އާއި ބަޖެޓްގައި ހިމެނިފައި ނުހުންނަ ޕްރޮޖެކްޓްތަކުގައި ސޮއިކުރުމުގައި އަމަލުކުރަމުން އަންނަ ގޮތަކީ ކޮބައިތޯ ވަނީ ސުވާލުކުރައްވާފައެވެ. ސިރާޖު ވަނީ މިސުވާލާ ގުޅުވައި ލ ފޮނަދޫ މަގު ހެދުމުގެ ފޭސް 2 ގެ މަސައްކަތް މިއަހަރުގެ ބަޖެޓްގައި ހިމަނާފައިވާއިރު އެމަސައްކަތް ކުރިއަށް ނުގެންގޮސް މިއަހަރުގެ ބަޖެޓްގައި ހިމެނިފައިނުވާ ރ ދުވާފަރުގެ މަގު ހެދުމުގެ މަޝްރޫޢުގައި 9 ސެޕްޓެމްބަރ ގައި ސޮއިކުރީ ކޮން އުސޫލަކުންތޯ ސުވާލުކުރައްވާފައެވެ.
މިސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ ދުވާފަރުގެ މަގު ހެދުމުގެ މަސައްކަތް ކުރިއަށްދަނީ އައު ޕްރޮޖެކްޓެއްގެ ގޮތުގައި ނޫންކަމަށެވެ. ޕްރޮޖެކްޓް އެންމެ ފުރަތަމަ ހަވާލުކޮށްފައިވަނީ އެރަށުގެ 13 މަގެއް ހެދުމުގެ މަސައްކަތްކަމަށާއި އެމަސައްކަތަކީ މިސަރުކާރު ވެރިކަމާއި ހަވާލުވިއިރުވެސް ހިނގަމުންދާ މަޝްރޫޢެއްކަމަށެވެ. އެރަށުގެ މަގުގެ މައްސަލަ، 13 މަގެއް ހަދައިގެން ހައްލުނުވާނެތީ އެމަޝްރޫޢަށް 9 މަގެއްގެ މަސައްކަތް އިތުރުކުރެވުނު ކަމަށް މިނިސްޓަރ ވިދާޅުވިއެވެ. އަދި މިމަސައްކަތުގެ 82 އިންސައްތަ މަސައްކަތް ކުރިއަށް ގޮސްފައިވާތީ ދެން އިތުރަށް ހުރި މަސައްކަތް އެއާ އެކީގައި ގުޅުވައިގެން ކުރިއަށް ގެންދިއުމަށް އެ މަސައްކަތް ހަވާލުކުރީ ކަމަށް މިނިސްޓަރ ވިދާޅުވިއެވެ.
އުސޫލެއްގެ ގޮތުން އޮންނަ ގޮތަކީ ޕްރޮޖެކްޓެއްގެ މަސައްކަތް އަދި ކޮންމެ ގޮތަކަށް ހުރިނަމަވެސް އިތުރުކުރަން ޖެހިއްޖެނަމަ 15 އިންސައްތަ އަށްވުރެ ވޭރިއޭޝަން ބޮޑުވެއްޖެ ކަމަށްވާނަމަ ދެން އެ ވޭރިއޭޝަންގެ ގޮތުގައި އެ މަސައްކަތް އިތުރަށް ކުރިއަށް ނުގެންދިއުން ކަމަށް މިނިސްޓަރ ވިދާޅުވިއެވެ. އެހެންކަމުން އެއަށްވުރެ އިތުރުވާނަމަ ކޮންޓްރެކްޓެއްގައި ސޮއިކުރާނެ ކަމަށާއި އެއީ އުސޫލެއްގެ ގޮތުން މިހާރު ގެންގުޅޭގޮތް ކަމަށް މިނިސްޓަރ ވިދާޅުވިއެވެ.
އެހެންނަމަވެސް އެޕްރޮޖެކްޓްގެ މަސައްކަތް މިހާރު ކުރިއަށްގެންދަނީ ބަޖެޓްގައި އެކޯޑްގެ ދަށުން ކަމަށާއި މިޕްރޮޖެކްޓްގެ މަސައްކަތަށް ދީފައިވާ ބަޖެޓްގެ އިތުރަށް އަދި ޚަރަދުނުވާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ފޮނަދޫގެ މަގުހެދުމުގެ މަސައްކަތް ކުރިއަށްދާކަމަށެވެ. ދުވާފަރުގެ މަސައްކަތް ކުރިއަށް ގެންދިއުމަށް ހަވާލުކުރިއިރު ދުވާފަރުގެ މަގު ހެދުމުގެ މަސައްކަތް ނިމިފައިވާ މިންވަރާއި ކައިރިކުރާ މިންވަރަށްވެސް ފޮނަދޫގެ މަސައްކަތް ކުރިއަށް ނުދާކަމަށް މިނިސްޓަރ ވިދާޅުވިއެވެ.
ބުދަ ދުވަހުގެ ޖަލްސާގައި ގިނަ މެމްބަރުންތަކެއް ވަނީ އެދާއިރާތަކުގެ މަޝްރޫޢުތައް ކުރިއަށް ނުގޮސް މަޑުޖެހިފައިވާތީ އެކަމާއި ގުޅޭގޮތުން މިނިސްޓަރަށް ސުވާލުތައް އަމާޒުކުރައްވާފައެވެ. އަދި ބައެއް ދާއިރާތަކުގެ މަޝްރޫޢުތައް ކުރިއަށްދާއިރު އަނެއް ބައި ދާއިރާތަކުގެ މަޝްރޫޢުތައް ކުރިއަށްނުދާތީ އެކަމުގެ ކަންބޮޑުވުން މެމްބަރުން ފާޅުކުރެއްވިއިރު ބަޖެޓްގައި ހިމެނިފައިނެތް މަޝްރޫޢުއެއް ކުރިއަށްދަނީ ކީއްވެތޯވެސް މެމްބަރުންވަނީ ސުވާލުކުރައްވާފައެވެ.
އެސުވާލުތަކަށް ޖަވާބު ދެއްވަމުން މިނިސްޓަރ ތަކުރާރުކޮށް ވިދާޅުވީ އެފަދަ ގޮތަކަށް އަމަލުކުރައްވަމުން ނުގެންދަވާކަމަށެވެ. އެއްވެސް ދާއިރާއެއް ތަފާތުކޮށް މަޝްރޫޢުތައް ކުރިއަށް ނުގެންދާކަމަށް މިނިސްޓަރ ވިދާޅުވިއެވެ.
