13 ރަށަކުން 49 ގެސްޓްހައުސް އަށް ހުއްދަ ދީފި
މިހާތަނަށް އެންމެ ގިނަ އަދަދެއްގެ ގެސްޓްހައުސްތައް ހުޅުވާފައި ވަނީ ތޮށްޑޫގައި
ރާއްޖޭގެ ގެސްޓްހައުސް އެއް
ކޮވިޑް-19 ގެ ސަބަބުން ރާއްޖޭގެ ގެސްޓްހައުސްގެ ވިޔަފާރި ހުއްޓާލާފައި އޮތުމަށްފަހު އަލުން ގެސްޓްހައުސްތައް ހުޅުވާލި ފަހުން ރާއްޖޭގެ 13 ރަށަކުން 49 ގެސްޓްހައުސް އަކަށް އޮޕަރޭޓް ކުރުމުގެ ހުއްދަ ޓޫރިޒަމް މިނިސްޓްރީ އިން ދީފި އެވެ.
ޓޫރިޒަމް މިނިސްޓްރީ އިން އާންމުކޮށްފައިވާ އެންމެ ފަހުގެ މައުލޫމާތުތައް ދައްކާގޮތުން ގެސްޓްހައުސް ވިޔަފާރި ފެށުމުގެ ހުއްދަ ދެވުމާއިއެކު ނޮވެމްބަރ މަހުގެ އެއް ވަނަ ދުވަހުގެ ނިޔަލަށް ހުއްދަ ދީފައި ވަނީ ނ. ފޮއްދޫ، ކ. ހުރާ، ވ. ފުލިދޫ، ވ. ތިނަދޫ، އއ. މަތިވެރި؛ ކ. މާފުށި، އއ. ތޮއްޑޫ، އއ. އުކުޅަސް، ކ. ގުރައިދޫ، އއ. ރަސްދޫ، ކ. ހިންމަފުށި، އއ. ރަސްދޫ އަދި އައްޑޫ ސިޓީ ފޭދޫ އާއި އެ ސިޓީގެ މަރަދޫފޭދޫގައި ހުރި 49 ގެސްޓްހައުސް އަކަށެވެ.
މިނިސްޓްރީގެ މައުލޫމާތުތައް ދައްކާގޮތުން މިހާތަނަށް އެންމެ ގިނަ އަދަދެއްގެ ގެސްޓްހައުސްތައް ހުޅުވާފައި ވަނީ ތޮއްޑޫގައިއެވެ. އެއީ ނުވަ ގެސްޓްހައުސްއެވެ.
ރާއްޖޭގެ ބޯޑަރު ތިން މަސް ދުވަހަށް ވުރެ ގިނަ ދުވަހު ބަންދުކޮށްފައި އޮތުމަށް ފަހު އަލުން ބޯޑަރު ހުޅުވާލި ފަހުން 40،000 އަށް ވުރެ ގިނަ ފަތުރުވެރިން ވަނީ ރާއްޖެ އައިސްފައެވެ. އެގޮތުން އެންމެ ގިނަ އަދަދެއްގެ ފަތުރުވެރިން އެއްދުވަހާ ރާއްޖެ އައިސްފައިވާ ދުވަހެއްގެ ގޮތުގައި ފާހަގަކުރެވިގެން ދިޔައީ ނޮވެމްބަރު މަހުގެ އެއް ވަނަ ދުވަހެވެ.
އެދުވަހު 1،582 ފަތުރުވެރިން ވަނީ ރާއްޖެ އައިސްފައެވެ.
