އެޗްޕީއޭގެ ގައިޑްލައިންތަކާއި ހިލާފަށް އިދިކޮޅުން ބޭއްވި މުޒާހަރާގެ ތެރެއިން ޝުޖާއު ހައްޔަރުކޮށްފި
3 ނޮވެމްބަރު 2020 | އަންގާރަ 18:14ސުޖާއު ހައްޔަރުކުރީ ޕީޕީއެމް އޮފީސް ކުރިމަތިން
އެޗްޕީއޭގެ ގައިޑްލައިންތަކާއި ހިލާފަށް ބޭއްވި މުޒާހަރާގެ ތެރެއިން ޕީއެންސީގެ ނައިބު ރައީސް އިބްރާހީމް ޝުޖާއު ހައްޔަރުކުރަނިކޮށް
އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ބަޑި ބުރާސްފަތި ނަމުގައި އެޗްޕީއޭގެ ގައިޑްލައިންތަކާއި ހިލާފަށް ބޭއްވި އެއްވުމުގެ ތެރެއިން ޕީއެންސީގެ ނައިބު ރައީސް އަދި ބާރަށު ދާއިރާގެ ކުރީގެ މެމްބަރު އިބްރާހީމް ޝުޖާއު ހައްޔަރުކޮށްފިއެވެ.
ޝުޖާއު ހައްޔަރުކޮށްފައި ވަނީ ބަޑި ބުރާސްފަތީގެ ނަމުގައި ޕީޕީއެމް އޮފީސް ކުރިމަތީގައި އެޗްޕީއޭގެ ގައިޑްލައިންތަކާއި ހިލާފަށް ކުރި މުޒާހަރާގެ ތެރެއިންނެވެ.
ނޮވެމްބަރު 3 ފާހަގަކުރުމަށް "ބަޑި ބުރާސްފަތި" ގެ ނަމުގައި އިދިކޮޅުން ބާއްވަން ބޭނުންވި ޖަލްސާއާ ގުޅޭގޮތުން އެޗްޕީއޭއަށް ފޮނުވި ސިޓީގެ ޖަވާބުގައި އެ ޖަލްސާ ވާޗުއަލްކޮށް ބޭއްވުމަށް އެޗްޕީއޭއިން ވަނީ އަންގައިފައެވެ. އަދި އެކަމާއި ނުރުހުން ފާޅުކޮށް ޝުޖާއު ވިދާޅުވީ އެޗްޕީއޭއިން ދައްކާ ވާހަކަ ދިމާނުވާ ކަމަށާއި، އިދިކޮޅު ކޯލިޝަނުން ޖަލްސާއެއް ބާއްވަން ނުވަތަ ކަމެއްކުރަން ރާވާއިރަށް ވާރޗުއަލްކޮށް އެކަމެއް ކުރަން އެޗްޕީއޭއިން އެންގުމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ. އަދި މިގޮތަށް ވާރޗުއަލްކޮށް ކަންކަން ބޭއްވުމަށް ފަސް އަހަރުގެ ދައުރެއް ނިންމަން ދޭގޮތަށް އިދިކޮޅު ކޮލިޝަނުން ބަލަހައްޓައިގެން ނުތިބޭނެ ކަމަށްވެސް ޝުޖާއު ވިދާޅުވި އެވެ.
މީގެ ކުރިން ވެސް އިދިކޮޅު ކޯލިޝަނުން ވަނީ އެޗްޕީއޭގެ ގައިޑްލައިންތަކާއި ހިލާފަށް އެއްވުންތަކާއި ސައިކަލު ބުރުތައް ބާއްވާފައެވެ. އަދި އިދިކޮޅު ކޯލިޝަނުން ބޭއްވި އެއްވުންތަކާއި ގުޅިގެން ފުލުހުން ވަނީ އިދިކޮޅު ކޯލިޝަނުގެ އިސް މެންބަރުން ފުލުހަށް ހާޒިރުކޮށް ޖޫރިމަނާ ކޮށްފައެވެ.
