ރިލްވާނުގެ މައްސަލައިގެ ތަހުގީގަށް ބޭރުގެ މާހިރަކު ރާއްޖެ އަތުވެއްޖެ
ރިލްވާންއަށް އިންސާފު ހޯދައި ދިނުމަކީ ސަރުކާރުގެ ވައުދެއް
ރިލްވާން ގެއްލުވައިލިތާ ހަ އަހަރު ފުރުމާއި ގުޅިގެން އޭނާގެ އާއިލާއިން އިން ރާއްޖެ ޓީވީގެ ފަށާއިރު ޕްރޮގްރާމް ގައި
މިނިވަން ނޫހުގެ ނޫސްވެރިޔާ އަހުމަދު ރިލްވާނު މަރާލި މައްސަލަ ތަހުގީގުކުރާ ޓީމުގައި ބައިވެރި ކުރަން ނިންމި ބޭރުގެ މާހިރު ރާއްޖެ އަތުވެއްޖެއެވެ.
ވީނުވީއެއް ނޭނގި ގެއްލުނު ނޫސްވެރިޔާ ރިލްވާންގެ މައްސަލަ ތަހުގީގުކުރާ ޓީމުގައި އިތުބާރު ކުރެވޭ ބޭރުގެ އިންވެސްޓިގޭޓަރަކު ބައިވެރިކުރަން ނިންމިކަން ހާމަކުރެއްވީ ރިލްވާން ގެއްލުވާލިތާ ހަ އަހަރު ފުރުމާއި ގުޅިގެން އޮގަސްޓު މަހުގެ 8 ވަނަ ދުވަހު، ރައީސް އިބްރާހިމް މުހައްމަދު ސޯލިހުއެވެ.
ބޭރުގެ ތަޖުރިބާކާރަކު ރާއްޖެ އައިސްފައިވާކަން ރައީސް އޮފީހުން ވަނީ ''ރާއްޖެއެމްވީ'' އަށް ކަށަވަރު ކޮށްދީފައެވެ. ނަމަވެސް އެކަމާއި ގުޅޭ އިތުރު މައުލޫމާތު ސާފުވާ ގޮތް ވަނީ ނުވެފައެވެ.
ރިލްވާނުގެ މަރުގެ މައްސަލާގައި ތަޖުރިބާކާރަކު ގެންނަން ސަރުކާރުން މަސައްކަތް ކުރަމުންދާއިރު, ރިލްވާންގެ މައްސަލައަށް އިންސާފު ނުލިބި ލަސްވަމުންދާ ކޮންމެ ދުވަހަކީ އާއިލާއަށް ލިބޭ އިތުރު ހިތްދަތިކަމެއް ކަމަކަށްވާއިރު، ރިލްވާންއަށް އިންސާފު ހޯދުމަށް މެދުކެނޑުމެއްނެތި މަސައްކަތް ކުރައްވަމުން ގެންދަވާނެ ކަމަށް ރައީސް ސޯލިހު ވަނީ ވިދާޅުވެފައެވެ.
ގަދަކަމުން ގެންގޮސް ރިލްވާން ގެއްލުވާލާފައި ވަނީ 2014 ވަނަ އަހަރުގެ އޮގަސްޓް މަހުގެ 8 ވަނަ ދުވަހުގެ ރޭ ހުޅުމާލެއިންނެވެ. ނަމަވެސް މަރު ކޮމިޝަނުން މިހާތަނަށް ހާމަކޮށްފައިވާ މައުލޫމާތުން އެނގޭ ގޮތުގައި ބަޔަކު ރިލްވާނަށް ފާރަލާ ހުޅުމާލެއިން ކާރަކަށް ގަދަކަމުން އަރުވާފައިވެއެވެ.
ރިލްވާން ގަދަކަމުން ކާރަކަށް އަރުގައިވެގެން ދިޔަ ރޭގައި، އޭނާ ގެންދިޔައީ ހުޅުމާލޭގައި ފަޅުގައި އަޅާފައި އޮތް ޑިންގީއަކަށް ކަމަށެވެ. އަދި އެ ޑިންގީގައި އޭނާ ގެންދިޔައީ ކަނޑުގައި އޮތް އުޅަނދަކަށް ކަމަށާ، އޭނާ މަރާލީ އުޅަނދުގައި ކަމަށް މަރު ކޮމިޝަނުން ބުނެފައިވެއެވެ.
ރިލްވާން މަރާލުމުގެ ކުރިން އޭނާއަށް ޝަހާދަތް ލައިދިން ކަމަށާއި، އޭނާ މަރާލީ ކުފުރުވުމުން ކަމަށް ބުނެ ކަމުގައި މިހާތަނަށް މައުލޫމާތު ލިބިފައިވާ ކަމަށް މަރު ކޮމިޝަނުން ވަނީ ބުނެފައެވެ. އަދި އޭނާ މަރާލުމަށް ފަހު ގައިގައި ދާ އޮޅުމަށް ފަހު ކަނޑުފައްތާފައިވާ ކަމަށް އިންޓެލް މައުލޫމާތު ލިބިފައި ވާކަމަށް މަރު ކޮމިޝަނުން ހާމަކޮށްފައިވެއެވެ.
