ކޮވިޑްގެ ހާލަތު ގޯސްވެ ގްރީސް ލޮކްޑައުން ކުރަނީ

ޔޫރަޕްގެ ގައުމުތަކުގައި ކޮވިޑްގެ ހާލަތު ގޯސްވެފައިވުމުން ގްރީސްއިން ރައްކާތެރިކަމުގެ ފިޔަވަޅު އެޅުމުގެ ގޮތުން ލޮކްޑައުންއަކަށް ދިޔުމަށް ނިންމާފައިވާ ކަމަށް އެގައުމުގެ ތަރުޖަމާނު ސްޓެއިލޮސް ޕެޓްސަސް ވިދާޅުވެއްޖެ އެވެ.

ޔޫރަޕްގެ އެހެން ގައުމުތަކާއި ހިލާފަށް ގްރީސްއިން ކޮވިޑް-19 އަށް ޕޮޒިޓިވްވާ މީހުންގެ އަދަދު ދަށެވެ. އެކަމަކު އޮކްޓޯބަރު މަހުގެ ފަހުކޮޅު އެގައުމުން ވެސް ޕޮޒިޓިވްވާ މީހުންގެ އަދަދުވަނީ ކޮންމެސް ވަރަކަށް މަތިވެލާފައެވެ.

ޕެޓްސަސް ވިދާޅުވީ އެގައުމުން ކޮވިޑް-19 ގެ ރައްކާތެރިކަމުގެ ފިޔަވަޅެއްގެ ގޮތުގައި ކުރިޔަށް އޮތް ދެ ހަފްތާ ލޮކްޑައުންއަކަށް ދިޔުމަށް ނިންމާފައިވާ ކަމަށާއި އެހެންކަމުން ޒަރޫރީ ބޭނުމަށް ފިޔަވައި މަގުމައްޗަށް ނުކުމެ އުޅުން މަނާވާނެ ކަމަށެވެ. އަދި ކެފޭ ރެސްޓޯރެންޓް، އޮފީސްތަކުގެ އިތުރުން ފިހާރަތައް ބަންދުވާނެ ކަމަށާއި، އެކަމަކު ޓޭކްއަވޭގެ ހިދުމަތް ދެވޭނެ ކަމަށް ޕެޓަސް ވިދާޅުވިއެވެ.

ގްރީސްއަކީ މުޅި ދުނިޔެއިން 83 ވަނައަށް އެންމެ ގިނަ މީހުން ކޮވިޑަށް ޕޮޒިޓިވްވި ގައުމެވެ. އެގައުމުން މިހާތަނަށް 42،080 މީހުން ކޮވިޑަށް ޕޮޒިޓިވްވެފައިވާއިރު، ފާއިތުވެދިޔަ 24 ގަޑިއިރު ތެރޭ އެކަނިވެސް އެގައުމުން 1،151 މީހުން ވަނީ ކޮވިޑަށް ޕޮޒިޓިވްވެފައެވެ.