ދ. އަތޮޅުގައި ހިންގަމުން އަންނަ ކަނޑިންމަ ރިސޯޓުން އިތުރު ދެ މީހަކު ކޮވިޑް19 އަށް ޕޮޒިޓިވް ވެއްޖެއެވެ.

ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފައިވާ ގޮތުގައި ކަނޑިންމައިން ނެގި 33 ސާމްޕަލެއް އާދިއްތަ ދުވަހުގެ ރޭ ކޮވިޑް-19 އަށް ޓެސްޓްކޮށްފައިވާ ކަމަށެވެ. ނެގިފައިވަނީ ފުރަން ހަމަޖެހިފައިވާ 21 ފަތުރުވެރިންނާއި 12 މުވައްޒަފުންގެ ސާމްޕަލް ކަމަށެވެ. އޭގެ ތެރެއިން ޕޮޒިޓިވް ވެފައިވަނީ ދެ މުވައްޒަފެއްގެ ސާމްޕަލް ކަމަށްވެސް އެޗްޕީއޭއިން ބުނެއެވެ.

އެޗްއީއޯސީން ބުނީ، އިތުރު 149 ސާމްޕަލް ނަގާފައިވާކަމަށާއި މި ސާމްޕަލްތައް އާދިއްތަ ދުވަހުގެ ރޭ ޓެސްޓުކުރުމަށް ހަމަޖެހިފައިވާ ކަމަށެވެ.

އާދިއްތަ ދުވަހު ވެސް ކަނޑިންމަ ރިސޯޓުން 17 މީހަކު ކޮވިޑް-19 އަށް ޕޮޒިޓިވް ވެފައި ވެއެވެ.

ކަނޑިންމަ ރިސޯޓުން މަރުވި މީހަކު ކޮވިޑް-19 އަށް ޕޮޒިޓިވްވުމާއި ގުޅިގެން އެ ރިސޯޓުގައި ހެލްތް އެޗްއީއޯސީގެ ޓީމެއް ހަރަކާތްތެރިވާން ވަނީ ފަށާފަށެވެ.

ކަނޑިންމަ ރިސޯޓުން ބަލިވެގެން ހުކުރު ދުވަހު ހަވީރު ދ. އަތޮޅު ހޮސްޕިޓަލަށް ގެންދެވުނު ދިވެއްސަކު ވަނީ ހުކުރު ދުވަހުގެރޭ މަރުވެފައެވެ. އުމުރުން 60 އަހަރުގެ އެ މީހާގެ ގައިން ކޮވިޑުގެ އަލާމާތްތައް ހުރުމާއި ގުޅިގެން ހެދި ޓެސްޓުތަކުން އޭނާ ވަނީ ކޮވިޑް-19 އަށް ޕޮޒިޓިވްވެފައެވެ.

ކަނޑިންމަ ރިސޯޓުގައި ކޮވިޑް-19 ފެތުރެމުންދާތީ، އެޗްއީއޯސީން ވަނީ އެރިސޯޓްގައި ތިބި މީހުންގެ ތެރެއިން ހައިރިސްކް މީހުން ފެސިލިޓީއަކަށް ގެންދިއުމުގެ މަސައްކަތް ކުރިއަށްދާ ކަމަށާއި، އަދި ކޮންޓެކްޓް ޓްރޭސިންގ އާއި އިތުރު ސާމްޕަލް ނެގުމުގެ މަސައްކަތް ކުރިއަށްދާ ކަމަށް ބުނެފަ އެވެ.

އެޗްއީއޯސީން ވަނީ ހޮނިހިރު ދުވަހުން ފެށިގެން ކަނޑިންމަ ރިސޯޓަށް އަރާ ފޭބުން މަނާ ކޮށްފަ އެވެ. އަދި އެ ރިސޯޓުގައި ތިބި ފަތުރުވެރިންގެ ތެރެއިން ފުރަން ތިބި ފަތުރު ވެރިންނަށް ފުރައިގެންދެވޭނީ ކޮންޓެކްޓަކަށް ނުވާނަމަ ޕީ.ސީ.އާރް ޓެސްޓް ހެދުމަށްފަހު ނެގެޓިވް ވުމުން ކަމަށްވެސް އެޗްއީއޯސީން ބުނެއެވެ.