އައިންތުގެ ޓެކްސީއަށް ގެއްލުންދޭތީ މަޖިލީހަށް ހުށައެޅި ކުއްލި މައްސަލަ ބަލައިގަނެ ބަހުސް ފަށައިފި
މި މައްސަލައަށް ބަހުސް ކުރަން ފެންނަ ކަމަށް 35 މެމްބަރުން ވޯޓުދެއްވި
އައިމިނަތު ވަހީދާ ދުއްވަމުން އަންނަ ޓެކްސީއަށް ބަޔަކު މީހުން ގެއްލުންދީފައި
މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާތީ އެކަމާ ގުޅޭ ގޮތުން މަޖިލީހަށް ހުށައެޅި ކުއްލި މައްސަލަ ބަލައިގަނެ، ބަހުސް ފަށައިފިއެވެ.
މެދު ހެންވޭރު ދާއިރާގެ މެމްބަރު އަލީ އާޒިމް މި މައްސަލަ މަޖިލީހުގެ ސަމާލުކަމަށް ގެނައުމަށް ނިންމާފައިވަނީ އެކިފަހަރު މަތިން އައިންތުއަށް ފުރައްސާރަ ކުރަމުންދާތީ އާއި ތަކުރާރުކޮށް އެކި ފަހަރުމަތިން އޭނާގެ ކާރަށް ގެއްލުންދޭތީ އެވެ. މި މައްސަލައަށް ބަހުސް ކުރަން ފެންނަ ކަމަށް 35 މެމްބަރުން ވޯޓުދެއްވިއެވެ.
އެމްޑީޕީގެ ޕީޖީ ލީޑަރު ވިދާޅުވީ އެ އަމަލުތަކަކީ ވަރަށް ދަށު ދަރަޖައިގެ އަމަލެއް ކަމަށާއި، އެ އަމަލުގެ ސަބަބުން އާމްދަނީ ހޯދުމަށް އައިންތު ކުރާ މަސައްކަތަށް ހުރަސް އެޅިފައިވާ ކަމަށެވެ. އެހެންކަމުން އާމްދަނީ ހޯދުމަށް އަންހެނުން ކުރާ އެފަދަ މަސައްކަތަށް ހިތްވަރު ދިނުމަށް ކުއްލި މައްސަލާގައި ވަނީ ގޮވާލައްވާފައެވެ.
އައިންތުގެ ޓެކްސީއަށް ފަސް ފަހަރެއްގެ މަތިން ގެއްލުންދީ ބިއްލޫރިގަނޑު ތަޅާލާފައިވުމާއި ގުޅިގެން އޭނާ ވަނީ އެކަން ސޯޝަލް މީޑިއާގައި ހިއްސާކޮށްފައެވެ. އެގޮތުން އެންމެ ފަހުން އޮކްޓޫބަރު މަހުގެ 27 ވަނަ ދުވަހު އޭނާގެ ކާރު ބިއްލޫރިގަނޑު ތަޅާލުމާއި ގުޅިގެން ޔޫތު މިނިސްޓަރު އަހުމަދު މަހުލޫފު ވަނީ އޭނާއަށް އެހީތެރިކަން ފޯރުކޮށްދީފައެވެ. އަދި މި މައްސަލަ މިހާރު ފުލުސް ކޮމިޝަނަރ އަދި ޖެންޑަރ މިނިސްޓްރީ އާއި ހަމައަށް ވެސް ގެންގޮސްފައިވާ ކަމަށެވެ.
މިނިސްޓަރު ވިދާޅުވީ، މިކަން ކުރާ ބަޔަކު އެނގޭ ކަމަށާއި މިކަމަކީ ވަރަށް ދަށު ދަރަޖައިގެ އަމަލެއް ކަމަށެވެ. އަދި އައިންތުގެ ކާރަށް ގެންލުން ދެމުންދާ މީހާ ވަރަށް އަވަހަށް އިންސާފުގެ ކުރިމައްޗަށް ގެނެސް ހައްގު އަދަބު ލިބޭނެ ކަމަށް މިނިސްޓަރ ވިދާޅުވިއެވެ.
