ހއ. އިހަވަންދޫގައި ބަންޑާރަ ގޯތި ލިބިފައިވާ ފަރާތްތަކަށް ރަޖިސްޓްރީ ހަވާލު ކޮށްފިއެވެ.
އެގޮތުން މި ފަރާތްތަކަށް ރަޖިސްޓްރީ ހަވާލު ކުރެވިފައިވަނީ އެރަށުގައި ބޭއްވުނު ހާއްސަ ރަސްމިއްޔާތެއްގެ ތެރެއިންނެވެ. މި ރަސްމިއްޔާތު ބުރާސްފަތި ދުވަހުގެ ރޭގެ ވަގުތެއްގައި ބާއްވާފައިވަނީ އިހަވަންދޫ ކައުންސިލްގެ އިދާރާގައެވެ.
އެރަށުގައި ބަންޑާރަ ގޯތި ދޫނުކުރާތާ ގިނަ އަހަރުތަކެއް ވަނީ ވެފައެވެ. މިކަމާގުޅޭ ގޮތުން "ރާއްޖެއެމްވީ" އަށް މައުލޫމާތު ހިއްސާ ކުރައްވަމުން އެރަށު ކައުންސިލްގެ ރައީސް މުހައްމަދު ރަޝީދް ވިދާޅުވީ މި މަސައްކަތަކީ ވަރަށް ގިނަ އަހަރު ތަކަކަށް ދެމިގެން ދިއަ މަސައްކަތެއް ކަމަށެވެ.
އޭނާ ފާހަގަ ކުރެއްވި ގޮތުގައި އޭރު ސަރުކާރުގެ ފަރާތުން މިކަމަށް އެއްވެސް އެހީއެއް ލިބިފައި ނުވެއެވެ. އަދި 2016 ވަނަ އަހަރުން ފެށިގެން ކުރަމުން އައި މި މަސައްކަތް އަލުން އައު އިސްލާހުތަކަކާއެކު 2019 ވަނަ އަހަރު ފަށަން ޖެހުނީ ކޮރަޕްޝަންގެ މައްސަލަތަކެއް ފެންމަތި ވުމާ ގުޅިގެންނެވެ.
3400 އެއްހާ މީހުންގެ އާބާދީއެއް އޮންނަ އިހަވަންދޫއަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ވަރަށް ބޮޑަށް އިހުމާލުވެފައިވެއެވެ. އެގޮތުން ކައުންސިލް ހިންގުމަށް ގިނަ ދަތިތަކެއް ކުރިމަތި ކުރުވި ކަމަށް އެރަށުގެ ކައުންސިލުން ވަނީ ފާހަގަ ކުރައްވާފައެވެ.
ރަޝީދު އިތުރަށް ވިދާޅުވީ މި މަސައްކަތް 12 މަސް ދުވަހުގެ ތެރޭގައި ނިންމާފައިމިވަނީ ދެފުށް ފެންނަ އަދި ހާމަކަން ބޮޑު ސިޔާސަތެއްގެ ދަށުން ކަމަށެވެ. އަދި މިއީ ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހްގެ ރިޔާސީ ވައުދުފުޅެއް ކަމުގައި ވެސް ވަނީ ވިދާޅުވެފައެވެ.
މި މަސައްކަތް ކާމިޔާބު ކަމާއި އެކު ނިންމާލުމުގައި އެމްޓީސީސީ އާއި ގެވަޅު ކޮމިޓީގެ މެންބަރުން، އިދާރި މުވައްޒަފުން އަދި ރައްޔިތުންގެ ވަރަށްބޮޑު އެއްބާރުލުމެއް ލިބިފައިވާކަމަށް ވެސް އެރަށު ކައުންސިލުން މައުލޫމާތު ދެއެވެ.
