ކޮވިޑް-19 އާ ގުޅިގެން އުމްރާގެ އަޅުކަން އަދާކުރުން މަޑުޖައްސާލާފައި އޮތް އޮތުން ނިމުމަކަށް ގެނައުމާއި ގުޅިގެން ބޭރުގެ ގައުމުތަކުން 10،000 މީހުން އުމުރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސްފިއެވެ.

އުމުރާގެ އަޅުކަން އަދާކުރަން ސައުދީއަށް އެތެރެވާ އެންމެންވެސް ތިން ދުވަހުގެ މުއްދަތަކަށް އެކަހެރިވާން ޖެހޭނެ ކަމަށް ހައްޖު އަދި އުމްރާގެ ޑެޕިއުޓީ މިނިސްޓަރު އަމްރު އަލް މައްދަޙު ވަނީ ވިދާޅުވެފައެވެ. އަޅުކަމަށްދާ މީހުންނަށް ސައުދީ ގައި މަޑުކުރެވޭނީ 10 ދުވަހުގެ މުއްދަތަށެވެ.

މިނިސްޓްރީ އޮފް ހައްޖު އެންޑް އުމްރާއިން ކަނޑައަޅާފައިވަ އުސޫލުގައިވާ ގޮތުން، ސައުދީ ފިޔަވައި އެހެން ގައުމުތަކުން އުމްރާއަށް އާދެވޭނީ 18 އަހަރާއި 50 އަހަރާއި ދެމެދުގެ މީހުންނަށެވެ. އަދި، އެއްވެސް ޖަމާއަތަކާއި ނުގުޅި އުމްރާއަށް ނުދެވޭއިރު ހުއްދަ ދިނުމަށް ހަމަޖެހިފައިވަނީ 50 މީހުން ހަމަނުވާ ޖަމާއަތްތަކަށް އެކަންޏެވެ.

ކޮންމެ އަހަރަކުވެސް ދުނިޔޭގެ އެކި ކަންކޮޅުތަކުން މިލިއަނެއްހާ މީހުން އުމްރާގެ އިތުރުން ހައްޖުގެ އަޅުކަން އަދާކުރަން ސައުދީއަށް ޖަމާވެއެވެ. ހައްޖަކީ ކުޅަދާނަކަން ލިބިގެންވާ ކޮންމެ މުސްލިމެއްގެ މައްޗަށް ވާޖިބެކެވެ. ކޮވިޑުގެ ބިރާ ހެދި މި އަހަރުގެ ހައްޖުގެ އަޅުކަން އަދާކުރުމުގެ ފުރުސަތު ދީފައިވަނީ ސައުދީ ގައި ދިރިއުޅޭ ފަރާތްތަކަށް އެކަންޏެވެ. އެ ފުރުސަތު ލިބުނީ 6000 މީހުންނަށެވެ.

ހައްޖުގެ އަޅުކަމަށް ކޮންމެ އަހަރަކުވެސް ގިނަ އަދަދެއްގެ މުސްލިމުން އަންނައިރު، އޭގެ ސަބަބުން ސައުދީގެ އިގްތިސާދަށް އަހަރަކަށްވުރެ އަހަރެއް ލިބޭ އާމްދަނީ އަންނަނީ އިތުރުވަމުންނެވެ.