ކްރިމިނަލް ކޯޓުގެ ގާޒީގެ މަގާމަށް ކުރިމަތިލުމުގެ ފުރުސަތު ހުޅުވާލައިފި

ކްރިމިނަލް ކޯޓުގެ ގާޒީގެ މަގާމަށް ކުރިމަތިލުމުގެ ފުރުސަތު ހުޅުވާލައިފިއެވެ.

ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފައިވަނީ މި މަގާމަށް ކުރިމަތިލައްވާ ފަނޑިޔާރުން ނޮވެމްބަރު މަހުގެ 9 ވަނަ ދުވަހުގެ ކުރިން ސިޓީ އަކުން އެކަން ޖޭއެސްސީގެ ރަސްމީ އީމެއިލް،admin@jsc.gov.mvއަށް ފޮނުވުމަށް އެދޭ ކަމަށެވެ.

މި މަޤާމަށް ކުރިމަތިލާ ފަރާތްތަކުގެ ޝަރުޠުތަކުގެ ގޮތުގައި މުސްލިމަކު ކަމުގައިވުމާއި، ސުންނަތް ޖަމާޢަތުގެ މީހަކު ކަމުގައިވުން، ބުއްދި ހަމައަށް ހުރި މީހަކު ކަމުގައިވުން، ޤާނޫނުއަސާސީގެ ދަށުން ނުވަތަ ޤާނޫނެއްގެ ދަށުން އިންތިޚާބުކޮށްފައިވާ ނުވަތަ ޢައްޔަނުކޮށްފައިވާ ސިޔާސީ މަޤާމެއް ފުރަމުންދާ މީހަކުކަމުގައި ނުވުން، ސިޔާސީ ޕާޓީއެއްގެ މެންބަރަކު ކަމުގައި ނުވަތަ ސިޔާސީ ޕާޓީއެއްގައި ޙަރަކާތްތެރިވާ މީހަކު ކަމުގައި ނުވުން ހިމެނެއެވެ.

މި މަޤާމަށް ކުރިމަތިލެވޭނީ ޢުމުރުން 25 އަހަރު ފުރިފައިވާ މީހަކު ކަމުގައިވާން ޖެހެއެވެ. އަދި އިސްލާމީ ޝަރީޢާ ނުވަތަ ޤާނޫނު ނުވަތަ ޤާނޫނާއި އިސްލާމީ ޝަރީޢާގެ ރޮނގުން ފުރަތަމަ ޑިގްރީ ޙާޞިލުކޮށްފައިވުން ތައުލީމީ ޝަރުޠުތަކުގެ ތެރޭގައި ހިމެނެއެވެ. އަދި ތަޖުރިބާގެ ގޮތުގައި ފަނޑިޔާރުކަމުގައި ނުވަތަ ޤާނޫނީ ވަކީލުކަން ކުރުމުގައި ނުވަތަ މިދެކަމުގައި މަދުވެގެން 2 އަހަރު ދުވަހުގެ ތަޖުރިބާ ލިބިފައިވާން ޖެހެއެވެ.

ކްރިމިނަލް ކޯޓުގެ ޤާޟީގެ މުސާރައިގެ ގޮތުގައި ހަމަޖައްސާފައިވަނީ 30،000ރ. އެވެ. އަދި ލިވިންގެ އެލަވަންސްގެ ގޮތުގައި 15،000ރ. ވަނީ ހަމަޖައްސާފައެވެ. މީގެ އިތުރުން ކްރިމިނަލް ކޯޓުގެ ޤާޟީގެ ރިސްކު އެލަވަންސްގެ ގޮތުގައި ލިބޭ 3،300ރ. އާއެކު ޖުމްލަ 48،300ރ. މުސާރައާއި އިނާޔަތުގެ ގޮތުގައި ލިބޭނެއެވެ.

ކްރިމިނަލް ކޯޓަށް ފަނޑިޔާރަކު ހޯދަން އިއުލާންކޮށްފައިވާއިރު، ދާދި ފަހުން އެ ކޯޓުގެ ފަނޑިޔާރު އިބްރާހިމް އަލީ ވަނީ މަގާމުން އިސްތިއުފާދެއްވާފައެވެ. އޭނާ އިސްތިއުފާދެއްވީ މަގާމުން ވަކިކުރުމުގެ މައްސަލަ ރައްޔިތުންގެ މަޖިލިހުގައި ހިނގަމުން ދަނިކޮށެވެ.