ކާރެއް ކޮންޓްރޯލު ނުކުރެވި ހަރަމްފުޅަށް ވަންނަ ގޭޓުގައި ޖެހިއްޖެ!

މައްކާގައި ކާރެއް ކޮންޓްރޯލު ނުކުރެވި ހަރަމްފުޅުގެ ފެންސްތަކެއް ފަޅާލައި ހަރަމްފުޅަށް ވަންނަ ގޭޓުގައި ޖެހިއްޖެއެވެ.

ހުކުރު ދުވަހުގެ ރޭގަނޑު ސައުދީ ގަޑިން 10:25ހާއިރު ހިނގި މިހާދިސާގެ ތަފްސީލުތަކެއް އަދި އާއްމުކޮށްފައި ނުވާއިރު, ޙަރަމްފުޅު ސަރަހައްދުގައި ޖަހާފައިވާ ފެންސްތަކެއް ފަޅާލައި ކާރު ހަރަމްފުޅަށް ވަންނަ ގޭޓުގައި ޖެހޭ ވީޑިއޯ މީސް މީޑިއާގައި ވަނީ އާންމުވެފައެވެ.

ކާރު ކޮންޓްރޯލް ނުކުރެވި، ވަދެގެން ދިޔަ މަގުގައި ހުރި ޕްލާސްޓިކް ފެންސްތައް ވަނީ ފަޅާލާފައެވެ. ފެންސްތައް ފަހަނަޅައި ގޮސް ކާރު ޖެހުނީ ހަރަމްފުޅަން ވަންނަން ހުންނަ ބޮޑެތި ގޭޓްތަކުގެ ތެރެއިން ގޭޓް ނަންބަރު 89 ގައިކަމަށް މީޑިއާ ރިޕޯޓުތައް ބުނެއެވެ. މި ހާދިސާގައި ކާރުން ޖެހުމުން ފެންސްތަކާއި ގޭޓް ހަލާކުވި ނަމަވެސް، އެއްވެސް މީހަކަށް އަނިޔާ ލިބިފައިނުވެއެވެ.

މި ހާދިސާއާއި ގުޅިގެން ކާރު ދުއްވަން އިން މީހާ ހައްޔަރުކޮށް، ޕްރޮސިކިއުޓަރުންނާ ހަވާލުކޮށްފައިވާއިރު މިއީ އޭނާ ގަސްތުގައި ކުރި ކަމެއްކަން ނުވަތަ އެކްސިޑެންޓެއް ކަމެއް މިހާތަނަށް ކަމާއި ގުޅުންހުރި ވުޒާރާއަކުން ހާމަކޮށްފައެއް ނުވެއެވެ. ހައްޔަރުކޮށްފައިވަނީ ސައުދީއަށް ނިސްބަތްވާ ރައްޔިތެކެވެ.