ރޮނާލްޑޯ ކޮވިޑް-19 އިން ރަނގަޅުވެއްޖެ
ރޮނާލްޑޯ ކޮވިޑް-19 އަށް ޕޮޒިޓިވްވީ މި މަހުގެ 13 ވަނަ ދުވަހު
ޔުވެންޓަސްއަށް ކުޅެމުން އަންނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯ
ޔުވެންޓަސްއަށް ކުޅެމުން އަންނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ކޮވިޑް-19 އިން ރަނގަޅުވެއްޖެއެވެ.
ރޮނާލްޑޯ ކޮވިޑް-19 އަށް ޕޮޒިޓިވްވީ ޔުއެފާ ނޭޝަންސް ލީގުގެ ދެ މެޗެއްގައި ކުޅުމަށް ޕޯޗުގަލުގެ ގައުމީ ޓީމާއެކު އުޅެނިކޮށް މި މަހުގެ 13 ވަނަ ދުވަހުއެވެ. ފްރާންސްގައި އެ ގައުމާ ދެކޮޅަށް ކުޅުނު މެޗުގައި ކުޅުމަށްފަހު އެނބުރި ޕޯޗުގަލަށް ދިޔަ ފަހުން ކުރި ޓެސްޓުން ރޮނާލްޑޯ ވައިރަހަށް ޕޮޒިޓިވްވިއެވެ.
ކޮވިޑް-19 އަށް ޕޮޒިޓިވްވުމުން އެންމެ ފުރަތަމަ ޕޯޗުގަލުގައި ރޮނާލްޑޯ އައިސޮލޭޓްވިއިރު، އޭނާ ވަނީ ހާއްސަ އިހުތިޔާރެއްގެ ދަށުން އަމިއްލަ ޖެޓުގައި އޭގެ ދެ ދުވަސް ފަހުން އެނބުރި އިޓަލީއަށް ގޮސް އައިސޮލޭޓްވެފައެވެ.
މީގެ ކުރިން ދެ ފަހަރެއްގެ މަތިން ރޮނާލްޑޯ ވައިރަހަށް ޓެސްޓު ކުރިއިރު، ދެ ފަހަރުވެސް އޭނާ ވަނީ ކޮވިޑް-19 އަށް ޕޮޒިޓިވްވެފައެވެ. އެގޮތުން ޔުއެފާ ޗެމްޕިއަންސް ލީގުގައި ބާސެލޯނާއާ ދެކޮޅަށް ޔުވެންޓަސް ކުޅުނު މެޗުގެ ކުރިން އަންގާރަ ދުވަހުގެރޭ ކުރި ޓެސްޓުގެ ނަތީޖާވެސް ވަނީ ޕޮޒިޓިވް ކަމަށް ދައްކާފައެވެ.
އެކަމަކު ހުކުރު ދުވަހުގެރޭ ޔުވެންޓަސްއިން ވަނީ އެންމެ ފަހުން ކުރި ޓެސްޓުން ރޮނާލްޑޯ ކޮވިޑް-19 އަށް ނެގެޓިވްވެފައިވާ ކަމަށް ބުނެފައެވެ. އެއާއެކު ރޮނާލްޑޯގެ އައިސޮލޭޝަން މިހާރު ވަނީ ނިމުމަކަށް އައިސްފައެވެ.
ކޮވިޑް-19 އަށް ޕޮޒިޓިވްވެފައި ވަނިކޮށް ހާއްސަ އިހުތިޔާރެއްގެ ދަށުން ރޮނާލްޑޯ އިޓަލީއަށް ދިޔުމުން، ކޮވިޑް-19 ގެ އުސޫލާ ރޮނާލްޑޯ ޚިލާފުވިކަމަށް ބުނެ އިޓަލީގެ އިދާރާތަކުން މިހާރު އަންނަނީ އެ މައްސަލަ ބަލަމުންނެވެ. އިޓަލީގެ ކުޅިވަރާ ބެހޭ ވަޒީރު ވިންޗެންޒޯ ސްޕަޑަފޯރާ ދާދި ފަހުން ވިދާޅުވީ ކޮވިޑް-19 އާ ގުޅިގެން އިޓަލީގެ ސަރުކާރުން ހަދާފައިވާ ސިއްހީ އުސޫލުތަކާ ރޮނާލްޑޯ ޚިލާފުވި ކަމަށާއި، އެހެންކަމުން އެ މައްސަލަ ބަލަމުން އަންނަ ކަމަށެވެ.
އެކަމަކު ވަޒީރުގެ ވާހަކަތަކަށް ރައްދު ދެމުން ރޮނާލްޑޯ މީގެ ކުރިން ބުނީ އެއްވެސް އުސޫލަކާ ޚިލާފު ނުވާ ކަމަށާއި، އޭނާ ދަތުރުކުރީ ހުރިހާ ހުއްދައެއް ހޯދައިގެން ކަމަށެވެ. އަދި އޭނާ އުސޫލާ ޚިލާފުވެފައިވާ ކަމަށް ބުނެ ދައްކަނީ ހަގީގަތާ ޚިލާފު ދޮގު ވާހަކައެއް ކަމަށްވެސް ވަނީ ބުނެފައެވެ.
ރޮނާލްޑޯ ކޮވިޑް-19 އިން ރަނގަޅުވިއިރު، ޔުވެންޓަސްއިން ދެން މެޗެއް ކުޅޭނީ އަންނަ އާދީއްތަ ދުވަހުގެރެއެވެ. އެރޭ އިޓާލިއަން ލީގުގައި ރަށުން ބޭރުގައި ޔުވެންޓަސް ނުކުންނާނީ ސްޕެޒިއާއާ ދެކޮޅަށެވެ.
