ހުޅުލެ އާއި މޭލެއާ ދެމެދު ފެރީގެ ހިދްމަތް ދެމުން އައި އަގު ބޮޑު ކޮށްފި އެވެ.

އެއރޕޯޓް ފެރީ އޮޕަރޭޓާރސް އެސޯސިއޭޝަނުން ބުނެފައި ވާގޮތުން އެ އެސޯސިއޭޝަންގެ ފަރާތުން ވިއްކަމުން ގެންދާ, މާލެ އާއި ހުޅުލެއާ ދެމެދު ދެމުންދާ ފެރީގެ ޓިކެޓުން ޖީއެސްޓީ ނަގަން ޖެހުމާ ގުޅިގެން ޓިކެޓްގެ އަގު ބޮޑު ކޮށްފައިވާ ކަމަށެވެ.

އެގޮތުން މިހާރު 10ރ. ފިޔާއަށް ވިއްކާ ޓިކެޓް 11ރ. އަށް އަގު ބޮޑުކޮށްފައިވާ ކަމަށާއި ބޮޑު ކުރި އަގުގައި ޓިކެޓް ވިއްކަމުން ދާނީ މި މެއި މަހުގެ 10 ވަނަ ދުވަހުން ފެށިގެން ކަމަށް އެ އެސޯސިއޭޝަނުން ބުނެއެވެ.

އެ އެސޯސިއޭޝަނުން ބުނީ ދަންވަރު 12:00ގެ ފަހުން ދެވޭ ފެރީގެ ހިދްމަތުން މިހާރު ނަގަމުން އަންނަ 20ރ. ގެ ޓިކެޓްގެ އަގު 21ރ. އަށް ބޮޑު ކޮށްފައިވާ ކަމަށެވެ.

އެ އެސޯސޮއޭޝަންގެ އިސްވެރިއެއް "ރާއްޖެއެމްވީ"އަށް މައުލޫމާތު ދެމުން ވިދާޅުވީ މީގެ ކުރިން މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް ޖީއެސްޓީ ދައްކަމުންދިޔައީ ޓިކެޓްގައި ވަކިން ޖީއެސްޓީ ނުހިމަނާ ކަމަށެވެ. ނަމަވެސް މީރާއަށް ދައްކަންޖެހޭ ޓެކްސް ދެއްކުމުން އޮޑިވެރިންނަށް ދެކޮޅު ނުޖެހޭ ކަމަށާއި މިދިޔަ މަހު ވެސް މީރާއަށް 16،000ރ. ރުފިޔާ އޭނާއަށް ދައްކަން ޖެހުނު ކަމަށެވެ.