ރާއްޖޭގެ ރިކަވަރީ ރޭޓް 92 އިންސައްތައިގައި

ރާއްޖޭގައި ކޮވިޑް-19 ޖެހިގެން ރަނގަޅުވި މީހުންގެ އަދަދު 92 އިންސައްތައަށްވުރެ މައްޗަށް އަރައިފިއެވެ.

އެޗްޕީއޭއިން އާންމުކޮށްފައިވާ މައުލޫމާތުތައް ދައްކާގޮތުން ބުރާސްފަތި ދުވަހުގެ ނިޔަލަށް 10733 މީހަކު ވަނީ ބަލިން ރަނގަޅުވެފައެވެ. އެއީ ބަލި ޖެހުނު މީހުންގެ 92.4 އިންސައްތައެވެ. މި ރޭޓަށް ބަލާ އިރު ރާއްޖޭގެ ރިކަވަރީ ރޭޓް މިވަނީ މީގެ ކުރިން މަތިނުވާ މިންވަރަށް މަތިވެފައެވެ. ދެވަނަ ވޭވްގެ ކުރިން ރިކަވަރީ ރޭޓް ޖުލައި މަހުގައި ހުރީ 80 އިންސައްތައިގައެވެ.

Advertisement

ރާއްޖޭގައި މިހާތަނަށް ޕޮޒިޓިވްވެފައިވަނީ 11616 މީހުންނެވެ. އަދި މީގެ ތެރެއިން މިވަގުތު ފަރުވާ ދެމުންދަނީ 839 މީހުންނަށެވެ. އެއީ ޕޮޒިޓިވްވި މީހުންގެ 7.2 އިންސައްތައެވެ. ހޮސްޕިޓަލާއި ފެސިލިޓީތަކުގައި އެޑްމިޓްކޮށްގެން ފަރުވާދޭ މީހުންގެ އަދަދު ވެސް ވަނީ ދަށްވެފައެވެ. އެގޮތުން 47 މީހަކަށް ފަރުވާ ދެމުން އަންނަ އިރު އެއީ 5.6 އިންސައްތައެވެ.

ޕޮޒިޓިވްވާ މީހުންގެ އަދަދު މަދުވި ނަމަވެސް އަންލިންކް ކޭސްތައް ވަނީ ނިމިގެންދިޔަ ހަފްތާގައި އިތުރުވެފައެވެ. އެގޮތުން 26 ވަނަ ހަފްތާގައި މި އަދަދު 33 ގައި ހުރި އިރު އޭގެ ކުރީ ހަފްތާގައި މި އަދަދު ހުރީ 30 ގައެވެ. އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވީ އެންމެ ފަހުން މިދިޔަ ހަފްތާގައި ވެސް އަންލިންކް ކޭސްތައް ނުވަތަ ކޮންޓެކްޓުންގެ ބޭރުން އިތުރަށް ފެނުނު ޖުމްލަ އަދަދު ޕަސެންޓޭޖް އުޅެނީ 25 ގައި ކަމަށެވެ. އެހެންކަމުން ކޮންމެވެސް ވަރަކަށް ކޮންޓެކްޓުންނާއި ނުގުޅޭގޮތަށް ކޭސްތައް ފެންނަމުންދާ ކަމަށެވެ.

މީގެ އިތުރުން ޑރ. ނަޒްލާ ވިދާޅުވީ އެކްޓިވް ސަރވިއަލަންސްގެ ތެރެއިންވެސް މީހުން ޕޮޒިޓިވް ވަމުންދާ ކަމަށެވެ. އެގޮތުން ފާއިތުވި ތިން ހަތަރު ދުވަހަށް ބަލާލި ނަމަވެސް އެކްޓިވް ސަރވިއަލަންސްގެ ތެރެއިން ޕޮޒިޓިވްވި މީހުންގެ އަދަދު އުޅެނީ 7 ނޫނީ 8 އިންސައްތައިގެ ކަމަށެވެ.

މީގެ އިތުރުން ނިމިގެން ދިޔަ ހަފްތާގައި ފުލޫ ކްލިނިކަށް ދެއްކި މީހުންގެ ތެރެއިން ޕޮޒިޓިވްވި މީހުންގެ ނިސްބަތް ވެސް ވަނީ އިތުރުވެފައެވެ. އެގޮތުން 25 ވަނަ ހަފްތާގައި މި އަދަދު 5.1 އިންސައިގައި ހުރުމަށްފަހު ނިމިގެން ދިޔަ ހަފްތާގައި މި އަދަދު ވަނީ 8.5 އިންސައްތައަށް އިތުރުވެފައެވެ.

ނަމަވެސް މި މުއްދަތުގައި ހޮސްޕިޓަލުގެ ބެޑް ކެޕޭސިޓީގެ އޮކިއުޕެންސީ ވަނީ ދަށްވެފައެވެ. އެގޮތުން 25 ވަނަ ހަފްތާގައި 32 ގައި މި އަދަދު ހުރުމަށްފަހު 26 ވަނަ ހަފްތާގައި ވަނީ 28ށް ދަށްވެފައެވެ. އަދި ލެވެލް 1ން ނެއްޓި 0ށް ދަށްވެފައިވެއެވެ. މި އަދަދުތަކާ އެކު ލުއިދިނުމުގެ މަރުހަލާ ބަލާ ޕޮއިންޓް ވެސް ވަނީ ދަށްވެފައެވެ. ނަމަވެސް ލުއިދޭނީ އަންލިންކް ކޭސްތައް ދަށް ކުރެވުމުން ކަމަށް އެޗްއީއޯސީން ވަނީ ބުނެފައެވެ.

އެޗްޕީއޭގެ ޑޭޝްބޯޑު ދައްކާގޮތުން ބުރާސްފަތި ދުވަހު ޕޮޒިޓިވްވީ 17 މީހުންނެވެ. މި 17 މީހުންގެ ތެރޭގައި ހިމެނެނީ ބަންގުލަދޭޝްގެ 2 މީހުންނާއި، ސްރީލަންކާގެ 4 މީހުންނާއި 11 ދިވެހިންނެވެ.

ރާއްޖޭގައި މިހާތަނަށް 11616 މީހުން ޕޮޒިޓިވްވެފައިވާ އިރު މީގެ ތެރެއިން 63.8 އިންސައްތަ ނުވަތަ 7411 މީހުންނަނީ ދިވެހިންނެވެ. ބަންގުލަދޭޝްގެ 3016 މީހުން ޕޮޒިޓިވްވެފައިވެއެވެ. އެއީ ޕޮޒިޓިވްވި މީހުންގެ 25.9 އިންސައްތައެވެ. ދެން އެންމެ ގިނައިން ޕޮޒިޓިވްވީ އިންޑިއާ މީހުންނެވެ. އެއީ 702 މީހުންނެވެ.